प्रगतीशिल सामुदायिक वनके ३१ औं वार्षिक साधारण सभा

जीवन चौधरी
भजनी, २३ अगहन । कैलाली जिल्लाके भजनी नगरपालिका–४ धनौरामे रहल प्रगतीशिल सामुदायिक वन उपभोक्ता समुहके ३१ औं वार्षिक साधारण सभा तथा सार्वजनिक सुनुवाई कार्यक्रम सम्पन्न हुइल बा ।

समुहके अध्यक्ष दिपक चौधरीके अध्यक्षतामे हुइल कार्यक्रममे सुदूरपश्चिम प्रदेशके पूर्व भुमि व्यवस्था तथा कृषि सहकारी मन्त्री विनिता चौधरी वरका पहुना ओ भजनी नगरपालिकाके पूर्व मेयर शेरबहादुर चौधरी विशिष्ट पहुना रहिट । कार्यक्रममे बरका पहुना विनिता चौधरी यी सामुदायिक वनसे नीति ओ विधि पालन करटी आइल बटैली । पूर्व मेयर चौधरी सामुदायिक वनके सक्कु पदाधिकारी ओ सदस्यहुकनके मिलाके गैलेसे विकास करे सेक्ना बटैलै ।

कार्यक्रममे हरियाली पार्वती सामुदायिक वनके अध्यक्ष राहुल बुढा, दलित महिला अधिकार मञ्चके जगत विक, सब डिभिजन वन कार्यालय भजनीके वन रक्षक प्रकाश विकलगायतसे यी सामुदायिक वनसे पारदर्शि रुपमे काम करटी आइल बटैलै ।
सिएसीसी भजनीके अध्यक्ष खोजराम चौधरी सामुदायिक वनसे बन संरक्षणमे भारी योगदान डेहल बटैलै । सब डिभिजन वन कार्यालय भजनीके रेन्जर कपिल बास्तोला वन जंगलमे डडेलो नियन्त्रणके लाग अग्नी रेखा निर्माण कैना जरुरी रहल बटैलै । पहुरा दैनिकके पहलमानपुर समाचारदाता जीवन चौधरी सामुदायिक वनके बार्षिक साधारण सभाके शुभकामना डेटी कार्यक्रम हुईबेर पहुनाहुकनहे समयके महत्व बुझडेना आग्रह करलै ।

बार्षिक उत्सावके अवसरमे सामुदायिक वनसे धनौरा आधारभूत स्वास्थ्य चौकीहे एक ठो टेबुल ओ एक ठो कुर्सी, राष्ट्रिय मावि खैलाडहे स्टेशनरी सामान धारेक ¥याग सहयोग करल बा । ओस्टेक करके सामुदायिक वनसे इलेक्ट्रिक चुल्हफे वितरण करल बा ।

कार्यक्रममे अतरानी चौधरी ११ लाख १९ हजार ९९७ रुप्या बराबरके आय व्यय प्रस्तुत करल रहिट । कार्यक्रममे थारु महालोक गायक मनिराम चौधरी वन संरक्षण सम्बन्धी गीत सुनाके मनोरञ्चन प्रदान करल रहिट । कार्यक्रममे स्वागत मन्तव्य उपाध्यक्ष बेलसरा साउद ओ संचालन उपभोक्ता देशु चौधरी करल रहिट । कार्यक्रममे पहुनाहुकनहे चडरी ओह्राके सम्मान ओ कदरपत्र डैगिल बा ।

ओस्टेक करके लैगिक हिंसा विरुद्धके १६ दिने अभियान अन्र्तगत हानिकारक रुढीवादी परम्परा तथा प्रथा सम्बन्धी लैङिक हिंसा उत्तरदायी जनचेतनामुलक कार्यक्रम संचालन कैगिल बा । डिसिएके आर्थिक सहयोगमे दलित महिला अधिकार मञ्च नेपालके आयोजनामे हानिकारक रुढीवादी परम्परा तथा प्रथा सम्बन्धी लैङिक हिंसा उत्तरदायी जनचेतनामुलक कार्यक्रम संचालन करल रहे ।