लागुऔषध दुव्र्यसनी विरुद्ध जनचेतना जगैटी बाल अधिकार चेतना समूह

पहुरा समाचारदाता
कंञ्चनपुर, २३ अगहन । अनौपचारिक क्षेत्र सेवा केन्द्र (इन्सेक) से बेलौरी नगरपालिकाके विद्यालयमे गठित बालअधिकार चेतना समुहके बालबालिकाहुक्रे लागुऔषध दुव्र्यशनी विरुद्ध जनचेतना जगाइक लाग अग्रसर हुइल बटै ।

बेलौरी नगरपालिका–२ गोकुलपुरस्थित लक्ष्मी मावि ओ बेलौरी नगरपालिका ३ खिरीयास्थित जनजागृती पुष्पलाल स्मृति माध्यमिक विद्यालयमे गठित बाल अधिकार चेतना समूहसे लागुऔषध दुव्र्यसनी विरुद्ध जनचेतना जगाइक दाग सडक नाटक टोली निर्माण करके नगरपालिकाके टमान स्थानमे सडक नाटक प्रदर्शन करटी रहल बटै ।

ओस्टेक सिलसिलामे बेलौरी नगरपालिकाके महिला तथा बालबालिका शाखासे लैङ्गिक हिंसा विरुद्धके १६ दिने अभियानके अवसर पारके बेलौरी नगरपालिका ३ नं. वडा कार्यालयमे शुभकामना आदान प्रदान कार्यक्रममे बालअधिकार चेतना समुहसे लागु औषध दुव्र्यशनीसे समाजमे परटी रहल असर ओ न्यूनिकरणमे सरोकारवालाहुकनके भुमिका विषयमे सडक नाटक तयार पारके प्रदर्शन करले बा ।

मानव अधिकार शिक्षा कार्यक्रम अन्तर्गत स्थानीय समुदायहे अधिकार ओ कर्तव्यप्रति सचेत परटी जिम्मेवार निकायहे जवाफदेही बनैना उद्देश्यसे बाल अधिकार चेतना समूहसे सडक नाटक प्रदर्शन करल हो । सडक नाटक प्रदर्शनमे शिक्षक, विद्यार्थी, अभिभावक, भल्मान्सा, निर्वाचित जनप्रतिनिधि, मानवअधिकार समुहके सदस्य लगायत सयौंके संख्यामे स्थानीयहुकनके उपस्थिति रहे ।

सडक नाटक प्रदर्शन कार्यक्रममे बालबालिकासे लागुऔषध दुव्र्यशनीसे हुइटी लैङ्गिक हिंसा, समाजमे परटी रहल नकरात्मक असर ओ रोकथामके लाग सरोकारवालाहुकनके भुमिका झल्कैना प्रयास करल रहे ।
बेलौरी नगरपालिका–२ के अध्यक्ष कुलबिर चौधरी बालबालिकाहुक्रे प्रदर्शन करल सडक नाटकसे हमार समाजके यथार्थ चित्रण करल बटैटी नाटकसे डेहे खोजल सन्देशहे मनन करके आ आपन घर तथा समाजमे हुइटी लागुऔषध दुव्र्यशनके कारण हुइना लैङ्गिक हिंसा न्यूनीकरणके लाग अपनसे सुरुवात कैना सहभागीहुकनहे आग्रह करलै ।

विओपी थापा चोकके प्रमुख सागर सिंह धामी पछिल्का समयमे बेलौरी नगरपालिका लागुऔषध ओसार पसार तथा सेवन करुइयाके ट्रान्जीट प्वाईन्ट बन्टी जैटी रहल ओरसे यैसिन खाले नाटकमार्फत समाजमे सकरात्मक सन्देस प्रवाह करलमे बालअधिकार चेतना समुहहे धन्यवाद ज्ञापन करलै ।

१५ जाने पात्र रहल सडक नाटकमे बालबालिका, विद्यालय, शिक्षक, वडाअध्यक्ष, स्थानीय मदिरा ब्यापारी, मदिरा सेवन करटी रहल संघरिया, प्रहरी, बालअधिकार चेतना समुहके पदाधिकारी लगायतके लागु औषध दुव्र्यसनी न्यूनिकरणमे हुई सेक्ना भुमिका झल्कन खालके कथा प्रस्तुत करल रहे ।