दुर्घटनामे एक स्वास्थ्यकर्मीसहित तीन जानेक मृत्यु
पहुरा समाचारदाता
धनगढी, २६ अगहन । कैलालीके अलग–अलग ठाउँमे सवारी दुर्घटनामे तीन जानेक मृत्यु हुइल बा ।
गैल रात पौने १० बजेक ४० मिनेटमे कैलाली धनगढी उप–महानगरपालिका वडा नं. १८ डिपो बजारस्थित धनगढीसे फुलबारीओर जैटी जाईबेर मोटरसाइकल डल्लवके पाछे टक्कराके दुर्घटना हुइल रहे ।
कैलारी गाउँपालिका वडा नं. ०३ हसुलिया बैठना बर्ष अन्दाजी ४० के कमलेश चौधरीसे चलाइल सु.प.प्र.०१००११ प ७०७१ नं. के मोटरसाइकल उहे दिशाओर जैटी धनगढी–१४ बि गाउँ बैठना बर्ष ३५ के सन्तोष सार्कीसे हक्टी रहल डल्लबके पाछे टक्राके दुर्घटना हुईबेर मोटरसाइकल चालक घाहिल हुइल रहिट । सेती प्रादेशिक अस्पताल धनगढीमे हुकान उपचारके क्रममे साढे ११ बजे मृत्यु हुइल जिल्ला प्रहरी कार्यालय कैलाली जनैले बा । लाश अब्बे अस्पतालके लाश घरमे धारल बा ।
मोटरसाइकल, डल्लब ओ डल्लब चालकहे नियन्त्रणमे लेके अनुसन्धान हुइटी रहल बा । मृतक कमलेश चौधरी कैलारी गाउँपालिका वडा नम्बर १ स्थित मनाउ आधारभूत स्वास्थ्य चौकीके सिआहेव (पाँचौ) तहमे कार्यरत रहिट ।
ओस्टेक करके गैल रात ११ः३० बजेके समयमे जिल्ला कैलाली टिकापुर नगरपालिका वडा नं. ०८ फाँटास्थित
हुलाकी सडक खण्डमे चालक वडा नं. ०१ शक्तिनगर शिविर बैठना वर्ष २१ के रामकुमार चौधरीसे चलाइल सु.प.प्र.०१–००८ प ०८१३ नं. के मोटरसाइकल सत्तीसे राजापुरओर जैटी रहल अवस्थामे अचानक अनियन्त्रित हुके उहे सडकखण्डके दाहिन किनारमे पल्टेबेर चालकके मुरीमे चोट ओ उहे मोटरसाइकल पाछे सवार बर्ष २२ के बिनोद चौधरीके समेत मुरीमे चोटल लागल बा ।
अवस्था गम्भीर रहलमे घाहिल दुनु जनहनहे उपचारके लाग टिकापुर अस्पतालमे लैगिलबेला बिनोद चौधरीहे डाक्टर मृत घोषणा करल रहे ।
मोटरसाइकल चालक राजकुमार चौधरीहे सामान्य उपचार पश्चात साढे १ बजे थप उपचारके लाग मेडिकल कलेज कोहलपुर रिफर करल बा ।
ओस्टेक करके मंगरके साँझ पौने साते जिल्ला कैलाली गोदावरी नगरपालिका वडा नं. ०४ गोदावरीस्थित भीमदत्त राजमार्गमे चालक जिल्ला कैलाली धनगढी उप–महानगरपालिका ०४ बोराडाँडी बैठना बर्ष ५४ के नन्द सिंह बोहरासे चलाइल सु.प.प्र.०१–००१ क २०६० नं. के खालि ट्रक (बझाङ–धनगढी) गौरब होटल आघे रोक्के धारल अवस्थामे उहे दिशासे अत्तरीयाओर जैटी रहल चालक जिल्ला कञ्चनपुर शुक्लाफँटा नगरपालिका वडा नं. ११ कलुवापुर बैठना बर्ष ३० के हिक्मत महरासे चलाइल म.२ प ९११७ नं. के मोटरसाइकल ट्रकसे एक्कासी ब्रेक लगाईबेर मोटरसाइकल दाहिन साईडओर पल्टेबेर दुर्घटना हुइल रहे ।
घाहिल हिक्मत महरा साढे आठ बजे उपचारके क्रममे सेती प्रादेशिक अस्पताल धनगढीमे मृत्यु हुइल बा । ट्रक ओ चालकहे थप अनुसन्धानके लाग ईलाका प्रहरी कार्यालय मालाखेतीमे धारल बा ।
