सामाजिक तथा वातावरणीय सवालमे अन्तरक्रिया

पहुरा समाचारदाता
सुखड, २७ अगहन । सीमान्तकृत समुदायके जीविकोपार्जनमे प्रभाव पर्ना नीतिगत, सामाजिक तथा वातावरणीय सवालमे लक्षित वर्ग तथा सरोकारवालाहुकनविच अन्तरक्रिया तथा सवांद कार्यक्रम सम्पन्न हुइल बा ।
एनडीपि के सहयोगमे परिवर्तनका लागि कार्यरत युवा समुह (याक नेपाल) के आयोजनामे तथा घोडाघोडी नगरपालिकाके समन्वयमे सरोकारवालाहुकनविच अन्तरक्रिया तथा सवांद कार्यक्रम कैगिल हो ।

याक नेपालके अध्यक्ष बलबहादुर रोकायके अध्यक्षतामे हुइल रहे । कार्यक्रममे परियोजनासे कैगिल गतिविधि ओ सीमान्तकृत समुदायके जीविकोपार्जनमे प्रभाव पर्ना नीतिगत, सामाजिक तथा वातावरणीय सवालमे छलफल करल रहे ।
घोडाघोडीमे ‘दिगो जिविकोपार्जनका लागि समावेशी विकास परियोजना’ अन्तर्गत वातावरणमैत्री अभ्यास ओ जैविक प्रविधिके प्रवद्र्धन, संरक्षण ओ समुदायके अधिकार तथा भूमिकाके विषयमे जनचेतना बह्रैना, लक्षित वर्गके उपलब्ध स्रोत साधान उप्परके पहुँचके लाग वकालत तथा पैरबी कैना क्षमता अभिवृद्धि कैना, समावेशी विकासके प्रवद्र्धनके लाग सरकारी तथा गैर सरकारी तथा संघ संस्थासंगके सहकार्य ओ साझेदारी विकास कैना, सिकाई तथा असल अभ्यासके प्रचारके लाग स्रोत केन्द्रके स्थापना करेक लाग परियोजना सुरुवाट कैगिल रहे ।
घोडाघोडी नगरपालिकाके नगर प्रमुख खडकबहादुर रावत रासायानिक माल कारण खेती योग्य जमिनके उवरा शक्ति नाश हुइटी गैल बटैलै । उहाँ कहलै,‘ रासायानिक मलके साथे विषादीके प्रयोग बह्रल बा । उहीसे मानव स्वास्थ्यमे नैमजा असर परल बा । जेकर कारण टमान मेरिक रोगफे डेखा परल बा ।’
एकता जैविक विविधता कृषि सहकारीके भक्तीराम सापकोटा रैथाने बोटविरुवा हेरैटी गैल बटैलै । घोडाघोडी नगरपालिकाके कृषि शाखा संयोजक विषादी प्रयोगसंगे ओकर असर ओ प्रयोग कैना न्युनिकरण करे सिखाई पर्ना बटैलै ।
घोडाघोडी–१० के कार्यवाहक वडा अध्यक्ष जालुराम चौधरी गोवर मल प्रयोग करे सेक्लेसे स्वास्थ्य जिन्गी विताई सेक्ना बटैलै ।
घोडाघोडी ताल तथा जैविक संरक्षणके अध्यक्ष हेमबहादुर बम जल, जंगल जमिन मानव जीवनसे जोरल ओरसे यकर संरक्षण जरुरी रहल बटैलै ।

याक नेपालके कार्यकारी निर्देशक डबल बहादुर बम किसानहुकन जैविक मल ओ जैविक विषादी प्रयोगबारे जानकारी डेना आवश्यक रहल बटैलै ।
यिहे विच लिवर्डके परियोजना अधिकृत नविन घिमिरे स्थानीय स्तरमे जैविक विविधता ओ संरक्षण जलवायु अनुकुलन कैसिक मिलाइना ओकरवारे खोजनीति हुइटी रहल बटैलै । कार्यक्रममे सहजीकरण याक नेपालके खाद्य अधिकार परियोजना अधिकृत विनोद सिंह करल रहिट ।
