६ लाख १९ हजारके भन्सार छलिके सामान बरामद

पहुरा समाचारदाता
धनगढी, २७ अगहन । कैलालीके टमान ठाउँसे भारतिय नाकासे भन्सार छलि करके नानल सामान बरामद कैगिल बा ।
प्रहरीसे अलग अलग ठाउँसे रु.६ लाख १९ हजार ३ सय बराबरके अवैध मालसामान बरामद करके आवश्यक कारवाहीके लाग भन्सार कार्यालय पठाइल जिल्ला प्रहरी कार्यालय कैलालीके प्रवक्ता कविन्द्र सिह बोहरा जनैलै ।
वडा प्रहरी कार्यालय धनगढीसे प्रहरी निरीक्षक योगेश खत्रीके कमाण्डमे खटके गैल प्रहरी टोली धनगढी उप–महानगरपालिका वडा नं. ०२ चौराहसे रु. ५ लाख ७० हजार बराबरके ११ थान आइफोन मोबाईल बरामद करले बा ।
ओस्टेक करके जिल्ला प्रहरी कार्यालय कैलालीसे खटके गैल मोटरसाइकल गस्ती टोलीसे धनगढी उप–महानगरपालिका वडा नं. ०२ से रु. ८ हजार बराबरके साडीमे लगैना माला बरामद करले बा ।
ओस्टेक ईलाका प्रहरी कार्यालय हसुलियासे खटके गैल प्रहरी टोलीसे कैलारी गाउँपालिका वडा नं. ०४ हनुमान मन्दिरसे रु.४१ हजार ३ सय बराबरके सुर्ति ओ चकलेट बरामद करले बा ।
