कैलारीमे आजसे निःशुल्क आँखी चेकजाँच शिविर सुरु

पहुरा समाचारदाता
हसुलिया, १ पुस । कैलालीके कैलारी गाउँपालिकामे आजसे निशुल्क आँखी चेकजाँच शिविर सुरु हुइल बा ।
च्यारिटी हेल्थ फाउण्डेशन, धनगढी नेत्रालय प्रा.लि. धनगढीके प्राविधिक सहयोग तथा कैलारी गाउँपालिकाके आयोजना तथा सहकार्य ओ व्यवस्थापनमे निशुल्क आँखी चेकजाँच शिविर सुरु हुइल हो । शिविर कैलारी गाउँपालिकाके ९ वडामे आँखी सम्बन्धी रोगके निःशुल्क स्वास्थ्य शिविर सञ्चालन हुइना बा ।
निशुल्क आँखी चेकजाँच स्वास्थ्य शिविर उदघाटन गाउँपालिका उपाध्यक्ष भगवतीकुमारी चौधरीके अध्यक्षतामे हुइल रहे । कार्यक्रममे सम्बोधन करटी उहाँ मानव शरिरके आँखी महत्वपूर्ण अंग रहल ओरसे यकर स्याहार ओ कुछ समस्या अइलेसे लापारवाही नैकरके समयमे चेकजाँच कैना जरुरी रहल बटैली ।

गाउँघरमे आर्थिक समस्याके कारण समयमे चेकजाँच कराई नैसेकल ग्रामीण क्षेत्रके लाग यी शिविर उपलब्धीपूर्ण रहल उहाँ बटैली । कार्यक्रममे धनगढी नेत्रालय प्रालिके अध्यक्ष गजेन्द्रबहादुर चन्द आँखी सम्बन्धी रोगके जाँच तथा उपचार, औषधी उपलब्ध करैना, स्वास्थ्य परिक्षणके क्रममे छनौट हुइल मोतिबिन्दु, आँखीक परेलाके अप्रेशन तथा आँखीमे मासु पलाइल रोगीके धनगढी नेत्रालयसम एकतर्फि यातायात सहित निःशुल्क अप्रेशन सेवा, आवस्यकता अनुसार लग्गे दुर लेखपढ कैना चस्माफे उपलब्ध करैना बटैलै ।

कैलारी गाउँपालिका स्वास्थ्य शाखा प्रमुख नरेशकुमार चौधरी असौ टिसरा बरस आँखी चेकजाँच शिविर संचालन करल बटैलै । गैल बरसके आँखी जाँच शिविरमे ३३ सय ६१ जाने चेकजाँच, ११ सय १३ जनहनहे निशुल्क चश्मा वितरण, १७ सय ९० जनहनहे निशुल्क औषधी वितरण, ५ सय ५८ जनहनहे निशुल्क शल्यक्रिया सिफारिस, ३ सय ८ जनहनके धनगढी नेत्रालयमे निशुल्क शल्यक्रिया कैगिल उहाँ जनैलै ।
निशुल्क आँखी चेकजाँच शिविरमे उददघाटन कार्यक्रममे प्रमुख प्रशासकीय अधिकृत खगेन्द्र राज जोशी, वडा नम्बर १ वडा अध्यक्ष धोजहरिपाल बोहरा, वडा नम्बर ५ वडा अध्यक्ष विष्णु प्रसाद चौधरीलगायत धनगढी नेत्रालयके टिम, कैलारी गाउँपालिका स्वास्थ्य शाखा टिमफे सहभागिता रहे । कार्यक्रमके संचालन स्वास्थ्य शाखा प्रमुख नरेशकुमार चौधरी ओ स्वागत मन्तव्य सामाजिक विकास शाखा प्रमुख यगम कलेल करल रहिट ।

निशुल्क आँखी स्वास्थ्य चेकजाँच शिविर अन्र्तगत आज हसुलियाके साझा हलमे हुइटी बा । ओस्टेक करके पुस २ गते हसुलिया स्वास्थ्य चौकी वार्ड नं ३ मे, पुस ३ गते के–गाउँ आधारभूत स्वास्थ्य केन्द्र वडा नं ४, पुस ४ गते पवेरा स्वास्थ्य चौकी वडा नं ५, पुस ५ गते रतनपुर स्वास्थ्य चौकी वडा नं ७, बसौटी स्वास्थ्य चौकी वडा नं २, पुस ८ गते बसौटी स्वास्थ्य चौकी, पुस ९ गते बनकट्टा आधारभुत स्वास्थ्य केन्द्र वार्ड नं ६ ओ पुस ११ गते गदरिया स्वास्थ्य चौकी वार्ड नं ९ मे संचालन कैना जनागिल बा । ओस्टेक पुस १२ गते, उदासीपुर प्राथमिक स्वास्थ्य केन्द्रमे सञ्चालन हुइना जनागिल बा । शिविरमे नाम दर्ता शुल्क रु. २५ तोकल बा ।

