गाउँपालिकासे मृतक स्वास्थ्यकर्मी कमलेशके परिवारहे आर्थिक सहयोग

पहुरा समाचारदाता
हसुलिया, १ पुस । दुर्घटनामे ज्यान गुमाइल स्वास्थ्यकर्मी कमलेश चौधरीके परिवारहे कैलारी गाउँपालिकासे आर्थिक सहयोग करले बा ।
स्वर्गिय स्वास्थ्कर्मी चौधरी कैलारी गाउँपालिका वडा नम्बर १ मनाउँ आधारभूत स्वास्थ्य चौकीमे सिआहेव पाँचौ तहमे कार्यरत रहल रहिट । गैल अगहन २५ गते बेरीजुन उहाँ मोटरसाइल दुर्घटनामे ज्यान गु्माइल रहिट । सोम्मारके रोज बैठलक कार्यपालिकाके बैठकसे मृतक चौधरीके परिवारहे सहनुभूतिके लाग पचास हजार सहयोग कैना निर्णय करल रहे ।
कार्यपालिकासे निर्णय हुइलपाछे सोम्मारके रोज उहाँक घर पुगक मृतक स्वास्थ्यकर्मीके गोसिनीया कोपिला चौधरीहे गाउँपालिका अध्यक्ष राजसमझ चौधरी, वडा नम्बर ३ के वडा अध्यक्ष सन्तराम चौधरी, गाउँपालिकाके प्रमु्ख प्रशासकीय अधिकृत खगेन्द्र राज जोशी, सामाजिक विकास शाखाके प्रमुख यगम कलेललगायत सहयोग स्वरुपके चेक हस्तान्तरण करल रहिट ।
उहे अवसरमे गाउँपालिका अध्यक्ष राजसमझ चौधरी गाउँपालिकासे कुशल, इमान्दार स्वास्थ्यकर्मी गुमाइल बटैलै । उहाँक दिवंगत आत्मके चिरशान्तीके कामना करटी मृतक परिवारप्रति गहिर संवेदनाफे प्रकट करलै ।
