सरोकारवालाके दिगोपनके लाग योजना सम्बन्धी कार्यशाला
पहुरा समाचारदाता
धनगढी, २ पुस । सामाजिक सदभावका लागि नागरिक सहभागिता कार्यक्रम अन्र्तगत सरोकारवालासंगके दिगोपनके लाग योजना सम्बन्धी कार्यशाला गोष्ठी सम्पन्न हुइल बा ।
कुर्वे विष्ट्रोके आर्थिक सहयोगमे मानव अधिकारका लागि महिला एकल महिला समुह सुदूरपश्चिम प्रदेशके आयोजनामे योजना सम्बन्धी कार्यशाला हुइल हो ।
कार्यक्रममे ‘कैलारी गाउँपालिका एकल महिला, दन्द प्रभावित महिला र सिमान्तकृत महिला गाउँ तथा वडा समुह संचालन सम्वन्धी निर्देशिका २०८१’ ओ कैलारी गाउँपालिका वडा नम्बर ६ के रहल बनकट्टा शान्ति संग्राहलय कार्यविधि गाउँपालिकाहे हस्तान्तरण कैगिल बा ।
कैलारी गाउँपालिका अध्यक्ष राजसमझ चौधरीक वरका पहुनामे हुइल कार्यक्रममे उहाँ मानव अधिकारका लागि महिला एकल महिला समुहसे संचालन करल गतिविधिसे द्वन्दपीडित, एकल महिला तथा सीमान्तकृत समुदायके महिला लाभान्वित हुइल बटैलै ।
छोट बजेटमे ढेर उपलब्धी हुइल डेखल बा, गाउँपालिका अध्यक्ष कहलै, ‘परियोजनाके गतिविधिहे आव स्थानीयतहसे निरन्तरता डेना प्रयास करी । ओस्टेफे गाउँपालिका वडा कार्यालय द्वन्दपीडित, एकल महिला तथा सीमान्तकृत समुदायके महिला लाभान्वित हुइना मेरके कार्यक्रम संचालन करटी आइल बा । स्थानीय तह लग्गेक सरकार हुइल ओरसे कुहीहे मर्का नैपर्ना मेरके आघे बह्रना तयार बा ।’
गाउँपालिका अध्यक्ष वडा नम्बर ६ मे रहल शान्ति संग्राहलय इतिहासके रुपमे रहल ओरसे संचालन प्रतिवद्धताफे जनैलै ।
कैलारीमे रहल महिला समुहहे सक्रिय बनाके आघे बह्रनाफे उहाँ बटैलै ।
विशिष्ट पहुना गाउँपालिका उपाध्यक्ष भगवतीकुमारी चौधरी भौतिक विकास संगे मानविय विकास जरुरी रहल बटैली । एकल महिलाहुकनहे ढेर चुनौतीके सामना करे पर्नाफे उहाँ बटैली । उहाँ कहली, ‘महिलाहुक्रे पाछे परल बटै, पारल बटै ओम्नेफे एकल महिला, द्वन्दपीडित महिला झन समस्या खेपे पर्ना समस्या बा ।’
‘कैलारी गाउँपालिका एकल महिला, द्वन्द प्रभावित महिला र सिमान्तकृत महिला गाउँ तथा वडा समुह संचालन सम्वन्धी निर्देशिका २०८१’ मानव अधिकारका लागि महिला एकल महिला समुह सुदूरपश्चिम प्रदेशके सल्लाहकार गोमा आचार्य प्रस्तुत करल रहिट । ओस्टेक वडा नम्बर ६ के रहल शान्ति संग्राहलय संचालन कार्यविधि प्रस्तुत सामाजिक विकास शाखा प्रमुख तथा शान्ति संग्राहलय सचालक समितिके सदस्य सचिव यगम कलेल प्रस्तुत करल रहिट ।
ओस्टेक सामाजिक सदभावका लागि नागरिक सहभागिता कार्यक्रम अन्र्तगत सामाजिक लेखा परिक्षण हुइल बा ।
कुर्वे विष्ट्रोके आर्थिक सहयोगमे मानव अधिकारका लागि महिला एकल महिला समुह सुदूरपश्चिम प्रदेशके आयोजनामे सामाजिक लेखा परिक्षण हुुइल हो । परियोजना कैगिल गतिविधि ओ बजेटबारे परियोजना संयोजक वेद अवस्थी जानकारी डेहल रही ।
कार्यक्रम मानव अधिकारका लागि महिला एकल महिला समुह सुदूरपश्चिम प्रदेश अध्यक्ष सुमन शर्माके अध्यक्षतामे हुइल रहे । कार्यक्रममे उहाँ एकल तथा द्वन्द महिलाहुकनके विच पहिले काम कैना ढेर समस्या आइल बटैली । कार्यक्रममे सहभागी कराईबेर एक दसरहे आरोप प्रत्यारोप लगाइल, बादविवाद, एक दुसरके बाट काटल, एक दुसरके बाट नैओनाइल अवस्था रहे, उहाँ कहली । परियोजनाके सात बर्षे अवधिके ढेर महिला समुह गठन करके क्षमता अभिवृद्धि करके बोले सेक्ना बनाइल उहाँ बटैली । महिला समुहहुक्रे बचत कैना ओ आवश्यक परलबेला ओकर सदुपयोग समेट करल बटैली । अभिनफे हरेक व्यक्ति आ आपन कथा पीडा रहल ओरसे परियोजना गाउँपालिकाहे हस्तान्तरण कैसेकल ओरसे आव जिम्मेवारी बहन कैना पालिकाके रहल बटैली ।
कार्यक्रममे सक्कु वडाके अध्यक्षहुक्रे, कार्यपालिका सदस्य, प्रमुख प्रशासकीय अधिकृत खगेन्द्रराज जोशी, टमान शाखाके प्रमुुख, स्थानीय महिला अगुवा, मानव अधिकारका लागि महिला एकल महिला समुह सुदूरपश्चिम प्रदेशके उपाध्यक्ष, लगायतके टिमके सहभागिता रहे । कार्यक्रमके संचालन परियोजना संयोजक वेद अवस्थी करल रही । ओ स्वागत मन्तव्य केन्द्रीय सदस्य भगवती हमाल करल रही ।
