एमरेड परियोजना मार्फत सञ्चालित गतिविधिके अनुगमन
पहुरा समााचारदाता
हसुलिया, ३ पुस । कैलाली जिल्लाके कैलारी गाउँपालिकामे मर्सिकोर नेपाल ओ सृजनशिल समाजको सृजना (सिसिएस)के साझेदारीमे सञ्चालित आर्थिक विकास मार्फत जोखिम व्यवस्थापन परियोजना (एमरेड) अन्र्तगतके पालिका स्तरीय परियोजना सल्लाहकार समितिसे गतिविधिके अनुगमन तथा बैठक बुधके रोज सम्पन्न हुइल बा ।
जोखिम व्यवस्थापन परियोजना (एमरेड) अन्र्तगत कैलारी–३ खोनपुरमे निर्माण कैगिल जैविक तथा भौतिक तटबन्धके अनुगमन करल बा । मोहना लडियाके कटानी नियन्त्रणके लाग मर्सिकोर नेपाल ओ सृजनशिल समाजको सृजना (सिसिएस)के साझेदारीमे सञ्चालित आर्थिक विकास मार्फत जोखिम व्यवस्थापन परियोजना (एमरेड)से पाँच लाख, गाउँपालिकासे ४ लाख ओ स्थानीय जनश्रमदान तथा क्लवके ८ लाख लागत भौतिक तथा जैविक तटबन्ध करल सिसिएसके प्रोग्राम कोडनेटर मनिराज पाण्डे जनैलै ।
कैलारी–३ खोनपुरमे लालपुर जैविक तटबन्धन योजना निर्माण उपभोक्ता समितिसे जैविक तथा भौतिक तटबन्ध करल रहे । भौतिक तटबन्धहे बाढसे पुहाइल मने जैविक तटबन्धसे मोहनाके कटानी नियन्त्रण करल समितिके अध्यक्ष देउ प्रसाद चौधरी बटैलै ।
गाउँपालिका अध्यक्ष राजसमझ चौधरी मोहना लडियासे खोनपुर ओ लालपुरके सयौं विघा जमिन कटानी करलमे ओ आव यकर गुरु योजना बनाके जाई पर्ना बटैलै ।
मोहना लडिया शिवरत्नपुर ओ खोनपुरके विचमे परठ,’ गाउँपालिका अध्यक्ष कहलै, ‘दक्षिण तटबन्ध करलेसे खोनपुरके बस्ती ओ खेतवारी जोखिममे पर्ना, उत्तर ओर तटबन्ध करलेसे शिवरत्नपुर जोखिममे पर्ना अवस्था बा । तटबन्धके लाग एक करोड बजेट आइल ओरसे दिर्घकालिन समस्या समाधानके लाग आघे बह्रना जरुरी बा ।’
ओस्टेक सामाजिक रुपान्तरण कक्षके अनुगमन करल बा । कौशिला ओ रामसिंह चौधरी घरमे पहिले बहुट कल्हा रहे, जेकर कारण लर्का बच्चामे असर परे लागल लागल जोरी कक्षा लेहलपाछे अब्बे घरमे मेलमिलाप हुके शान्ती छाइल बा ।
कौशिला कहली, ‘पहिले गोसिया÷गोसिनीय विच दैनिक झगरा होए । जिहीसे लैङिक ंिहंसा बह्रल रहे । जोरी कक्षा लेहलपाछे सुधार हुके घरफे विकास हुइल बा ।’
सिसिएसके कैलारी सहजकर्ता मीना चौधरी कैशिला ओ रामसिंह चौधरी जस्टे ढेर जोरीहे तालिम डेहलपाछे सामाजिक परिवर्तन हुइल बटैली ।
अनुगमन टोलीसे कैलारी–७ स्थित रतनपुरमे गन्नाके जुस बनैना मेसिन, नारायणपुरमे डोना टपरीके अनुगमन करल बा ।
ओस्टेक करके कैलारी गाउँपालिका–७ हौसलपुरमे एमरेड परियोजना अन्र्तगत विपद जोखिम न्यूनिकरण कैना तालिम, टमान सामाग्री हस्तान्तरण कैगिल बा । विपद जोखिम न्यूनिकरण सामाग्री उपलब्ध हुइलपाछे बाढ आइलबेला ओक्रे प्रयोग करटी रहल हौसालपुरके श्याम नारायण चौधरी बटैलै । उहाँ कहलै,‘बर्खा बुँदीके बेला हमार बस्तीमे ओक्रे प्रयोग हुइठ ।’
ओस्टेक कैलारी–७ छुटकी बसान्तामे उहे परियोजनासे गन्नाके नाली बनैना कल्टीबेटर, गन्ना पेरना मेसिन ओ दुनाटपरी मेसिन उपलब्ध कैगिल बा । कार्यक्रममे गाउँपालिका अध्यक्ष राजसमझ चौधरी, गाउँपालिका उपाध्यक्ष भगवतीकुमारी चौधरी, प्रमुख प्रशासकीय अधिकृत खगेन्द्रराज जोशी, वडा नम्बर ३ वडा अध्यक्ष सन्तराम चौधरी, वडा नम्बर ७ के वडा अध्यक्ष दिपेन्द्रबहादुर बम, सामाजिक विकास शाखा प्रमुख यगम कलेल, मर्सिकोर नेपालके एमरेड परियोजना वरिष्ठ जेसी अधिकृत संगीता अधिकारी, सिसिएस कैलालीके महासचिव गणेशदेव पार्की, सिसिएस कैलालीके कार्यक्रम अधिकृत मणिराज पाण्डे, सामाजिक परिचालक मिना चौधरी, लेखा अधिकृत आशा भट्ट, मर्सिकोरके सन्दिप पनेरुलगायतके सहभागिता रहे ।
