राजीपुरमे मनोविमर्श तथा परामर्श सेवा केन्द्रके उदघाटन

पहुरा समाचारदाता
धनगढी, ६ पुस । कैलालीके गौरीगंगा नगरपालिका वडा नम्बर ४ राजीपुरमे मनोविमर्श तथा परामर्श सेवा केन्द्र संचालनमे अइल बा ।

महिला पुनस्र्थापना केन्द्र ओरेकके आर्थिक तथा प्राविधिक सहयोगमे गौरीगंगा नगरपािलकासंगके समन्वय ओ सहकार्यमे मनोविमर्श तथा परामर्श सेवा केन्द्रके उदघाटन हुइल हो ।

गौरीगंगा नगरपालिका वडा नं. ४ के वडा अध्यक्ष राम बहादुर चौधरीके अध्यक्षतामे हुइल एक कार्यक्रमके विच उ मनोविमर्श तथा परामर्श सेवा केन्दके उदघाटन गौरीगंगा नगरपालिकाके नगर उपप्रमुख तथा न्यायीक समिती संयोजक भोजबहादुर बम करल रहिट । यिहे विच नगर स्तरीय युवा संजाल गठन तथा पुनगर्ठन कार्यक्रमफे हुइल रहे ।

कार्यक्रमके वरका पहुना रहल नगर उपप्रमुख बम अशोक जातके रुखुवक टेलुवा लगाके मनोविमर्श तथा परामर्श सेवा केन्दके उदघाटन करल रहिट । कार्यक्रममे सम्बोधन करटी उहाँ लैङिक हिंसा होए वा टमान मेरिक समस्यामे परल होए ।यहाँ सेवा लेना सहजुल हुइना बटैलै । समाजमे टमान मेरिक विकृति विसंगती बह्रटी गैल बा,’ नगर उपप्रमुख बम कहलै,‘आर्थिक रुपमे कोई धनी हुइही, मानसिक समस्या हुई सेकठै । ओसिन मनैनहे भुख निन्द नैलागठ यैसिन बेला मनोपरामर्श आवश्यकता परठ ।

उ कार्यक्रममे युवा शिक्षा तथा खेलकुद शाखा प्रमुख हरिश पन्त, गणेण जोशी, महिला बालबालिका तथा जेष्ठ नगाररिक शाखा प्रमुख भावना जोशी, वडा नं. ५ के वडा अध्यक्ष, वडा नं. ४ के जनप्रतिनिधिहुक्रे, इलाका प्रहरी कार्यलय राजीपुरके प्रहरी प्रमुख, टोल विकास समितिके संयोजक, मेलमिलाप कर्ता, महिला स्वास्थ्य स्वयसेविका ओ ११ वडाके युवा तथा समुह संजालके सदस्याके उपस्थिति रहे । मनोविमर्श तथा परामर्श सेवा केन्द्र सञ्चालन कैनाके उद्देश्य ओ मनोविमर्श परामर्श केन्द्रके निर्देशिका बारे जानकारी ओरेकके जिल्ला संयोजक गीता चौधरी करल रहिट ।

कार्यक्रमके संचालन ओरेकके सामाजिक परिचालक बिष्णु रेग्मी ओ स्वागत वडा महिला सदस्य मथुरा अधिकारी करल रहिट ।
कार्यक्रममे महिला वडा सदस्य मथुरा अधिकारीके संयोजकत्वमे ७ सदस्यीय मनोविमर्श तथा परामर्श सेवा केन्द्रके व्यस्थापन समिति गठन कैगिल बा ।

ओस्टेक करके मौसमी चौधरीके अध्यक्षतामे २० सदस्यीय नगरस्तरीय युवा संजाल गठन पुनःगठन हुइल बा । उदघाटन हुइल मनोविमर्श तथा परामर्श केन्द्रसे नियमित सेवा ओरेक के मनोविमर्श कर्तासे डेना जनागिल बा । यम्ने ओरेकके कर्मचारी तथा व्यवस्थापन ओ पालिका÷वडा कार्यालयके भवन साथे अन्य सहयोग रना बा ।