भादा थारु होमस्टे महोत्सव आयोजना हुइना

पहुरा समाचारदाता
धनगढी, ६ पुस । कैलालीके धनगढी उपमहानगरपालिका–१६ स्थित भादा गाउँमे थारु होमस्टे महोत्सव आयोजना हुइना बा ।

थारु होमस्टे गाउँ भादाके प्रचारप्रसार एवम् प्रवर्द्धन कैना उद्देश्यके साथ थारु होमस्टे महोत्सव आयोजना हुइक लाग बा । उ महोत्सव यिहे पुस १७ से २१ गतेसम आयोजना हुइना आयोजक थारु होमस्टे गाउँ भादा पर्यटन विकास तथा व्यवस्थापन समिति शुकके रोज पत्रकार सम्मेलन करके जानकारी डेहल बा ।

भादामे सन् २०११ से होमस्टे सञ्चालनमे बा । होमस्टेके प्रचारप्रसार तथा प्रवद्र्धनके साथ थारु समुदायके संस्कृति, खानपान, भेषभूषा, सीपकला, प्राकृतिक सम्पदाके सदुपयोग एवम् जगेर्ना कैना उद्देश्यसे हरेक वर्ष महोत्सव आयोजना करटी आइल समितिके अध्यक्ष लक्ष्मीनारायण चौधरी बटैलै ।

महोत्सवमे थारु खानपानके परिकार, थारु सीपकला तथा भेषभूषा, थारु देउथान अवलोकन, लहरुमे गाउँके अवलोकन, थारु संग्राहालयके अवलोकन, काठे पिङलगायत आकर्षणके रुपमे रना जनाइल बा । महोत्सव सम्पन्न करेक लाग मूल आयोजक ओ नौ ठो टमान उपसमिति गठन करल अध्यक्ष जनैलै ।

संरक्षणके लाग सक्कु जाने करी काम, संस्कृति भेष भुषा राखी हमार पहिचान कना मुल नाराके साथे आयोजना हुइना महोत्सवके १ लाख जाने अवलोकन कैना लक्ष्य लेहल ओ उदघाटन सुदूरपश्चिम प्रदेश सरकारके मुख्यमन्त्री कमलबहादुर शाहसे कैना आयोजक जनैले बा ।

दिपेन्द्र चारपाटे माविके खेलमैदानमे हुइना अवसिक १२ औ महोत्सव रहल जनैले बा । महोत्सव अवधिमे भलिवल प्रयोगिताफे हुइना जनागिल बा ।
थ्यग कभलत