सरकारहे असफल हुइना छुट नैहोः नेता कोइराला
पहुरा समाचारदाता
धनगढी, ७ पुस । नेपाली कांग्रेसके नेता डा. शेखर कोइराला इ सरकारहे असफल हुइना छुट नैरहल ओ कौनो फेन हालतमे सरकार चले पर्ना बटैले बाटै । नेपाल प्रेस युनियन कैलालीसे अँट्वारके सकारे धनगढीमे आयोजना करल पत्रकार सम्मेलनमे उहाँ ओइसीन बटाइल हुइट ।
राजनीतिक स्थायित्वके लाग डुुई बरवार दल मिलके सरकार बनल उल्लेख कैटी उहाँ कहलै, “सरकार असफल हुइ कलेसे देशमे अराजकता निम्टि । कौनो फेन हालतमे इ सरकार चले परल ।”
जौ म्यान्डेट लेके इ सरकार गठन हुइल हो, उ जैसिक हुइलेसे फेन पूरा करे पर्ना कोइरालाके जिकिर रहे । उहाँ संविधान सुधार ओर सरकारसे ध्यान डेहे नैसेकल बटैलै ।
“इ सरकार गठनके मूलभूत एजेण्डा संविधान संशोधन कैना रहे”, नेता कोइराला थप्लै, “मने संविधान सुधार ओर सरकारके ध्यान गैल नैडेखजाइठ् । नेपाली कांग्रेस ओ नेकपा (एमाले) से किल चाहके संविधान संशोधन नैहुइ । यकर लाग अन्य दलसँग छलफल करे परठ् । ओइसीन छलफल हुइल नैडेखजाइठ् ।”
उहाँ मुलुकमे राजनीतिक, आर्थिक, साँस्कृतिक अवस्था एकदम नाजुक रहल कहटी उहीहे नेपाली कांग्रेस ओ नेकपा (एमाले) सुधार करे पर्ना बटैलै । नेता कोइराला आगामी बरस हुइना नेपाली कांग्रेसके १५ औं महाधिवेशनके लाग पार्टी कार्यकर्ता जुर्मुराइ लागल उल्लेख करलै ।
पत्रकारनसे पुँछल जिज्ञासाके जवाफमे उहाँ सभापतिके उम्मेदवार बनक लाग विधानमे सक्कु चीज स्पष्ट लिखल ओरसे विधानके दायराभित्रे पर्ना जे फेन पार्टीके सभापतिके उम्मेदबार बने सेक्ना बटैलै ।
ओस्टके, एक छुट्टे प्रसङ्गमे नेता कोइराला कैलालीके गेटामा स्वास्थ्य विज्ञान विश्वविद्यालय हाली सञ्चालनके लाग अपने सेक्नासम पहल कैना उल्लेख करलै । “मेडिकल कलेज चलाइबर सुरुमे कुछ अप्ठयारा आइठ् । काहे कि, मै फेन एकठो मेडिकल कलेज चलाइल मनै हुइटु” उहाँ कहलै, “मै यहाँ कुछ अप्ठ्यारा नैडेख्ठुँ । इहीहे तत्काल सञ्चालन करे सेकजाइ । ओकर लाग मै सेक्नासम पहल करम ।”
