आजसे धनगढीमे शैक्षिक महोत्सव
पहुरा समाचारदाता
धनगढी, ८ पुस । आज (पुस ९ गतेंसे धनगढीमे वृहत राष्ट्रिय पुस्तक प्रदर्शनी तथा शैक्षिक महोत्सव सुरु हुइना हुइल बा ।
‘नवौं वृहत राष्ट्रिय पुस्तक प्रदर्शनी तथा शैक्षिक महोत्सव २०८१’ के उद्घाटन सुदूरपश्चिम प्रदेशके मुख्यमन्त्री कमलबहादुर शाहसे हुइना जनाइल बा । नेपाल पुस्तक तथा स्टेशनरी व्यवसायी संघ कैलालीके आयोजनामे हुइना शैक्षिक महोत्सवमे सुदूरपश्चिम प्रदेशके साथे डेश ओ विदेशमे रहल प्रकाशक, स्टेश्नरी वितरक, शैक्षिक संस्था, मसलन्द सामग्री, शिक्षण संस्था ओ शिक्षासे सम्बन्धित निकाय सहितके एकसय ढेर स्टल रहना संघके अध्यक्ष भीम पडाल जानकारी डेलै । उहाँ महोत्सवमे विद्यालय स्तरीय नृत्य, कविता, वक्तृत्वकला ओ चित्रकला प्रतियोगिता फेन आयोजना हुइना बटैलै । उहाँ कहलै, ‘ओम्ने आधारभूत ओ माध्यमिक तह कैके डुई विधामे प्रतिस्पर्धा हुइना बा ।’
महोत्सवमे रमाइलो मेलाके साथे राष्ट्रिय कलाकारहुक्रनके फेन प्रस्तुती रहना बटैटी उहाँ सुदूरपश्चिमके परिकारसहितके खाना ओ खाजाके स्टल राखल बटैलै । शिक्षा ओ खेलकुदसँग सम्बन्धित टमान विषयमे बहस फेन सञ्चालन हुइना जनाइल बा ।
उक्त बहलमे मदन पुरस्कार विजेता साहित्यकारहुक्रनके साथे टमान क्षेत्रके ख्यातिप्राप्त व्यक्तित्वहुक्रनके फेन सहभागीता रहना जनाइल बा । महोत्सव पुस १५ गतेसम धनगढी उपमहानगरपालिका–१ पशुपति टोलमे हुइना बा ।
महोत्सवहे आयोजना करक लाग डुई करोडसे ढेर खर्च हुइना जनाइल बा । कलेसे महोत्सवहे डुई लाखसे ढेर जाने अवलोकन कैना ओ ५ करोडसे ढेरके कारोवार हुइना अनुमान करल बा ।
महोत्सव अवलोकनके लाग विद्यालय ओ क्याम्पसके विद्यार्थीहुक्रे सामुहिक रुपमे पोशाकमे अइलेसे निःशुल्क प्रवेश, अन्य विद्यार्थी स्वस्फुर्त रुपमे आइलमे रु ५० टिकट दर राखल बा कलेसे सर्वसाधारणके लाग रु. १०० राखल बा । जेष्ठ नागरिक ओ फरक क्षमता रहल व्यक्तिके लाग महोत्सवमे प्रवेश निःशुल्कके व्यवस्था करल जनाइल बा ।
