शैक्षिक क्षेत्रके विकासके लाग सुधारके कार्य आवश्यकः मुख्यमन्त्री शाह

पहुरा समाचारदाता
धनगढी, ९ पुस । सुदूरपश्चिम प्रदेशके मुख्यमन्त्री कमलबहादुर शाह शैक्षिक क्षेत्रके विकासके लाग सुधारके ढेर कार्य आघे बह्रैना आवश्यक रहल बटैले बाटै ।
धनगढीमे मंगरसे सुरु हुइल नवौं बृहत् राष्ट्रिय पुस्तक प्रदर्शनी तथा शैक्षिक महोत्सवके उद्घाटन कैटी उहाँ शिक्षामे सुधारके ढेर काम कैना आवश्यक रहल औंल्याइल हुइट ।
मुख्यमन्त्री सङ्घीय सरकार, प्रदेश सरकार ओ स्थानीय सरकारसे जनता आउर ढेर मर्यादित ओ सहज रूपमे शिक्षा प्राप्त करे सेक्ना वातावरण निर्माण कैना जरुरी रहल उल्लेख करलै । उहाँ जनताको बिचमे सहज तरिकासे शिक्षाके पहुँच पुगाइक लाग कार्यक्रम करे पर्ना औंल्यइटी ओँहर प्रदेश सरकार आघे बह्रल बटैलै । शिक्षामे सबके पहुँच पुग्ना मेरके वातावरण बनैना कार्यमे सबके साथ सहयोग आवश्यक रहल उहाँके कहाइ रहे ।
पुस्तक प्रदर्शनीहे व्यावसायिकतासँग किल जोरके हेर्नासे समग्रतासँग जोरके हेरे पर्र्ना मुख्यमन्त्री शाहके जोड रहे । उहाँ पुस्तक प्रदर्शनीहे ज्ञान प्राप्ति कैना उपलब्धिसँग फेन जोर्ना आवश्यक रहल उल्लेख करलै ।
समाज रुपान्तरणमे पुस्तकके भूमिका महत्त्वपूर्ण रहल उहाँके कहाइ रहे । अब्बे राष्ट्रिय, अन्तर्राष्ट्रियस्तरमे लावा लावा प्रविधि आघे बह्रनामे पुस्तकके महत्त्वपूर्ण देन रहल उहाँ बटैलै ।
दिनदिने पठन संस्कृतिके ह्रास हुइटी रहल प्रति चिन्ता व्यक्त कैटी शिक्षाविद डा. हेमराज पन्त मनै पुस्तक पह्रना आवश्यक रहल औंल्याइल रहिट ।
उद्घाटन कार्यक्रममे सङ्घीय सांसद् डिल्लीराज पन्त, प्रदेश सभा सदस्य गीता चौधरी, तारा जोशी, टमान विद्यालयके विद्यार्थी लगायतके उपस्थिति रहल रहे । महोत्सव उद्घाटन अवसरमे शिक्षासहित टमान क्षेत्रमे योगदान पुगाइल व्यक्तिहे सम्मान करल रहे ।
नेपाल पुस्तक तथा स्टेशनरी व्यवसायी संघ कैलालीके आयोजनामे सुरु हुइल पुस्तक प्रदर्शनी तथा शैक्षिक महोत्सव पुस १५ गतेसम सञ्चालन हुइना बा ।
