बारबर्दियाके बरघरहुकनके प्रश्नः मेयरसाब, बरघर विधेयक खै ?
पहुरा समाचारदाता
जयनगर, ९ पुस । बारबर्दिया नगरपालिकाके थारु गाउँके अगुवा बरघरहुक्रे पालिकासे पहिल चो बरघर ऐन पारित करल मने विधेयक नैबनाके बरघर सञ्जालमार्फत् कौनो काम करे नैसेकल पीडा पोख्ले बटंै ।
लमही–५, दाङस्थित थारु साहित्य संस्कृति प्रतिष्ठानके आयोजनामे पुस ८ गते सोम्मार बर्दियाके बारबर्दिया नगरसभा हलमे बरघरके समावेशी मापन भेलामे उ पीडा पोखल हो ।
करिब एक सय जाने बरघरहुकनके उपस्थिति रहल उ कार्यक्रममे बारबर्दिया नगर बरघर सञ्जालके निवर्तमान अध्यक्ष कालीराम चौधरी बरघर विधेयक पारित नैहोके बरघर सञ्जालके नाममे छुट्टे खाता खोले नैसेकल, पालिकामे फेन कौनो प्रोपोजल डेहे नैसेकल बटैलैं ।
ओहोर, बरघर सञ्जालके अध्यक्ष बहादुर बैरागी सेकटसम सब बरघरहे पारिश्रमिकके व्यवस्था हुइपरना, नगर बरघर सञ्जालके पदाधिकारीहे इन्धन, रिचार्जके व्यवस्था हुइपरना आवाज उठैलैं । उहाँ आब बरघरहुक्रे भोकभोके लम्मा समय खटे नैसेक्ना, पारिश्रमिकके व्यवस्था नैकरल बरघर प्रणाली धरापमे परे सेक्ना बटैलैं ।
नगर बरघर सञ्जालके निवर्तमान सचिव कृष्णप्रसाद चौधरी सवाल बरघरहुक्रे पहिलेक जस्टे सामाजिक सम्मान नैपाइल, पालिका समेत विधेयक नैबनाइल ओरसे मान्यता डेहल अनुभूति नैहुइल धारणा ढरलैं ।
कार्यक्रममे बारबर्दिया नगरपालिकाके प्रमुख छविलाल चौधरी पालिकासे बरघर विधेयक पारित करना मने यीबारे पर्याप्त गृहकार्य हुइ नैसेकल बटैलैं । नगर बरघर सञ्जालके पदाधिकारीहुक्रे सार्वजनिक कार्यक्रममे गुनासो करनासे विधेयक मस्यौदामे सघैना उहाँक आग्रह रहे । साथे, मरुवा, भूइहार थानमे पूजा पुज्ना गाउँके बरघर असली बरघर रहल ओरसे विधेयकमे मरुवाके प्रसंग थपल उहाँक कहाइ रहे । उहाँ बरघरहुक्रे फेन सरकारके एक अंग रहल ओरसे हीनताबोध महसुस करे नैपरना धारणा ढरलैं ।
बारबर्दिया–७, बौद्धनगर (मरघट्टी) के बरघर गीता चौधरी पुरुषहुकनके तुलनामे महिला बरघरहे नैमानल गुनासो करलि । मने अइसिन कटिमे महिलाहुक्रे नेतृत्व लेना सवालमे पाछे परे नैपरना, कुछसे जिम्मेवारी पाइल औरे महिलाहे फेन हौसला बह्रैना ओरसे पुरुषहुक्रे महिलाहे गाउँक जिम्मेवारी डेना तयार हुइपरना उहाँक कहाइ रहे ।
२ नं वडाके वडाध्यक्ष रामफेरन थारु अपने कौनो काम करनाआघे अपन वडाके बरघरसंग सल्लाह लेहलमे बरघरहुकनसंग सहकार्य कैके जनप्रतिनिधि एकडम आघे बह्रैना तयार रहल बटैलैं । उहाँ ६० प्रतिशत बरघरहुक्रे टोल विकास समितिमे फेन रहल ओरसे विकासके काममे वाधा नैरहल जिकिर करलैं ।
थारु साहित्य संस्कृति प्रतिष्ठानके अध्यक्ष छविलाल कोपिलाके अध्यक्षतामे हुइल कार्यक्रममे प्रतिष्ठानके कार्यकारी निर्देशक डा कृष्णराज चौधरी सर्वहारी तथा फिल्ड अधिकृत बिमला चौधरी बरघरमे महिला तथा युवाहुकनके सहभागितामे जोड परियोजनाबारे प्रकाश परले रहैं । कार्यक्रममे प्रतिष्ठानके कार्यसमिति सदस्य यम चौधरी स्वागत करले रहैं ।
