बोक्सी आरोपमे कुटपिट करुइयाहे कार्वाहीके माग

पहुरा समाचारदाता
धनगढी, ९ पुस । कैलालीके भजनीमे ३० वर्षीय महिला उप्पर बोक्सीके आरोपमे ज्यान मर्नाहस कुटपिट कैगिल घटनामे संललग्नहुकनहे कर्वाहीके माग कैगिल बा ।

मंगरके रोज राष्ट्रिय आदिवासी जनजाती महिला महासंघ, थारु महिला संजाल, नेपाल आदिवासी जनजाती महासंघ सुदूरपश्चिम प्र्रदेश, थारु कल्याणकारिणी सभा कञ्चनपुर, संखी संजाल कैलाली, थारु महिला सभा, थरुहट÷थारुवान राष्ट्रिय मोर्चा कैलाली, नेपाल रानाथारु समाज केन्द्रीय समिति, थारु कल्याणकारिणी सभा धनगढी नगर समिति, नगर भल्मन्सा समिति धनगढी, थारु नागरिक समाज कैलाली ओ थारु विद्यार्थी समाज कैलालीसे संयूक्त विज्ञप्ती निकारके घटनामे संलग्नहुकनहे कानूनी कार्वाही कैना माग करले बटै ।

यिहे गैल पुस ४ गते बोक्सीके आरोपमे ३० बर्षीय सरिना (नाम परिवर्तन) उप्पर बोक्सीके आरोपमे कैगिल निर्मम यातना तथा जघन्य अपराधके घटनाप्रति अपनेहुकनके गम्भीर ध्यानाकर्षण हुइल संयुक्त विज्ञप्तीमे कहले बटै ।

संघ संस्थासे संयुक्त रुपमे निकारल विज्ञप्ती अनुसार गाउँक घरगोटयार मिल्के बोक्सीके आरोपमे सुरुमे पुस १ गते कुटपिट कैगिल रहे । कुटपिटके क्रममे जबरजस्ती मै बोक्सी हूँ गल्ती कैनु माफ कैडेउ कहे लगाइल मने उहाँ उहे बमोजिम माफी मागे नैमानलपाछे उहाँहे फेरसे पुस ४ गते दिनके ३ बजे ५÷६ जना मिलके भल्मन्सा ओ गुरुवाके आदेशमे उहाँक घरमे आके कुटपिट करटी अन्दाजी ५०० मिटरसम भुटला परके तन्टी लैजाके समाजके आघे पानीसे लहवा लहवा कुटपिट करल रहे ।
लाठी ओ जुत्ता लगाइल गोरले शरीरभर निलडाम हुइना करके कुटपीट करल ओ २ घण्टा लगातार निर्मम यातना डेसेकलपाछे घेँचा काटके मारडेना कहटी कोडरा समेत ल्यानल रहे । उहे क्रममे उहाँक गोसिया, भैया ओ उहे समयमे प्रहरी पुग्के पीडितके बचाइल रहे ।

बचैना क्रममे उहाँक भैयाहेफे कुटपिट करल ओ बच्चनहेफे बोक्सीके सन्तानहे सकाई परठ कहटी मानसिक यातना डेके ओ नालामे धकेल सरिना बटैली । अपनसंगे लर्कनफे पिटट डेखके पीडित बरु मही मुवा डेउ लर्कन नामारो कहनु मने मोर बाट कोई नैसुनल । अपनहे मुना गरि पिटेबेर बचाउ कहेबेर टै बोक्सीनिया टुहिन के बचाई कहिके मुवैना योजनाके साथ मारपिट करल उहाँ कहली ।

महीहे घरसे तानके लैगिल बेला भल्मन्सा लालबहादुर चौधरी कुर्सीमे बैठल रहिट । मारपिट हुईबेर उ बचैना, रोक्ना प्रयास नैकरलै, उल्टे उहाँ मोवाइलमे घटनाके भिडियो रेकर्ड कराटिहिट पीडित सरिना कहली ।

निरन्तर यातनापाछे अचेत अवस्थामे हुइलपाछे ५ बजे ओर भजनी नगर पालिकाके स्वास्थ्य केन्द्रमे लैजाके समान्य उपचार करल ओ उ ठाउँमे उपचार सम्भव नैहुइलपाछे धनगढी रेफर करल रहे ।

अब्बे पीडितके धनगढी स्थित नवजीवन अस्पतालमे उपचार हुइटी रहल बा । उपचारके क्रममे डाक्टर अभिन कुछ समय अस्पतालमे धारे पर्ना ओ कुटपिटसे शरिरके मांसपेशीमे नैमजा असर परल बा । जिहीसे रगतके संक्रमण हुई सेक्ना ओ मुटुमे प्रत्येक्ष असर पुगे सेक्ना बटैले बटै । घटनाके सम्बन्धमे ६ जानेक नाउँमे जाहेर डेहलमे ४ जाने प्रहरी हिरासतमे रहल बटै । पक्राउ परलमे भजनी–१ के रुपा चौधरी, लहानु डगौंरा, मनोज चौधरी ओ बाबुराम डगौंरा रहल बटै । कलेसे २ जाने फरार रहल प्रहरी जनैले बा ।
उ गाउँक भल्मन्सा लालबहादुर चौधरी भर पीडितहे कुटपिट होसेकलपाछे अपने उहाँ पुगल बटैलै । माता सवार हुइल रुपा अपनहे भिडियो बनाइ कहलपाछे माताके आज्ञा अनुसार भिडियो बनैना नाटक करल भल्मन्सा बटैलै ।

भल्मन्सा कहलै, ‘घटना हुइटा कना खबर पाके मै उहाँ पुग्नु । मै घटनास्थल पुगेबेर पीडितहे कुटपिट होसेकल रहे । रुपाहे अभिन माता सवार रहिस । महीहे कहल भिडियो रेकर्ड कर । उहे क्रममे महीहेफे दुई लटठी मारल ।’

ओस्टेक करके उ संघ संस्थासे दोषीहे कार्वाही कैना ओ पीडितहे न्याय डेहे पर्ना माग करटी राष्ट्रिय मानव अधिकार आयोग सुदूरपश्चिम प्रदेश कार्यालयमे ज्ञापनपत्रफे बुझैले बटै ।