कैलारीमे ख्रीष्टमस विशेष कार्यक्रम मनागिल
पहुरा समाचारदाता
धनगढी, १० पुस । कैलारी गाउँपालिकाके हसुलियामे ख्रीष्टमस विशेष कार्यक्रम मनागिल बा ।
कैलारी गाउँपालिकास्तरीय ख्रीष्टमस विेशेष कार्यक्रम २०८१ मुल आयोजक समितिके आयोजनामे बुधके रोज ख्रीष्टमस विशेष कार्यक्रम मनागिल हो ।
आयोजक समितिके अध्यक्ष तथा महिमा चर्चके रेभ पा. ज्ञानु चौधरीके अध्यक्षतामे हुइल कार्यक्रममे वरका पहुना कलवरी चर्च धनगढीके रेभ डा. जितेन्द्र श्रेष्ठ, विशिष्ट पहुना सुदूरपश्चिम प्रदेशसभा सदस्य माननीय घनश्याम चौधरी, कैलारी गाउँपालिकाके उपाध्यक्ष भगवती कुमारी चौधरी रहल रहिट ।
ख्रीष्टमस विशेष कार्यक्रममे शुभकामना डेटी अध्यक्ष रेभ पा. ज्ञानु चौधरी दिवस अपन संस्कृति ओ मौलिकताके जर्गेना कैना एक ठो माध्यम बनल उहाँ बटैलै । उहाँ कहलै, ‘कैलारी गाउँपालिकामे पहिल चो हुइल पालिकास्तरीय ख्रीष्टमस विशेष कार्यक्रममे भारी सहभागितासे प्रेरणा डेले बा ।’
यहाँफे इसाई संगठन गठन नैकरल हो । यी भेलासे बाध्यता बनाइल ओरसे कैलारी गाउँपालिका स्तरीय इसाई समाज भावी दिनमे गठन कैना बटैलै । जिहीसे मण्डलीहे ओ सरकारसे सहकार्य समन्वय करके हातेमालो करटी असल नागरिक, सभ्य नागरिकके पहिचान स्थापित करैना जमर्को कैना आशा लेहलफे उहाँ बटैलै ।
कार्यक्रमके वरका पहुना कलवरी चर्च धनगढीके रेभ डा. जितेन्द्र श्रेष्ठ ख्रीष्टमस विशेष कार्यक्रममे शुभकामना डेटी प्रभु येशुख्रिष्टके जन्म सक्कु जनहनहे मजा डगर डेखाइक लाग, पापीहुकनहे पापसे छुटकरा डेुवाइक लाग हुइल बटैलै ।
कार्यक्रमके विशिष्ट पहुना सुदूरपश्चिम प्रदेशसभा सदस्य माननीय घनश्याम चौधरी ख्रीष्टमस विशेष कार्यक्रममे शुभकामना डेटी नेपाल धर्म निरपेक्ष हुसेकल ओरसे जौन धर्म मन्सेसेफे खुशी रना बटैलै ।
उहाँ कहलै, ‘विश्वमे सबसे ढेर विक्री हुइना बाइबल रहल ओरसे बाइवलके लावा करार डेउखुरी थारु भाषामे प्रकाशित हुइलपाछे यी समुदायके व्यक्तिहे पह्रना बुझना सहजुल हुई ।’
कार्यक्रमके विशिष्ट पहुना कैलारी गाउँपालिका उपाध्यक्ष भगवती कुमारी चौधरी ख्रीष्टमस विशेष कार्यक्रममे शुभकामना डेटी धर्म कहलेक अनुशासनमे बन्धना ओ अनुशासनमे रहे सिखैना माध्यम रहल बटैली । संविधानमे धर्म निरपेक्षताके बाट उल्लेख हुइल ओरसे जौनफे धर्म मने पैना स्वतन्त्र रहल उहाँ बटैली ।
कैलारी गाउँपालिका वडा नम्बर ४ के वडा अध्यक्ष ठागुराम चौधरी सविधानमे स्वतन्त्रताके बाट उल्लेख कैसेकल ओरसे सक्कु जाने एक दुसरहे सम्मान करे पर्ना बटैलै ।
नेकपा एमालेके नेता होरीलाल चौधरी कौनो धर्ममे गलत नैरहल बटैलै । ख्रीष्टमस विशेष कार्यक्रममे शुभकामना डेटी नेपालके संविधानमे हक अधिकारके बाट उल्लेख कैसेकल ओरसे जौनफे धर्म माने पैना स्ततन्त्र रहल बटैलै ।
कैलारी गाउँपालिकाके पूर्व अध्यक्ष लाजुराम चौधरी पहिले पहिले इसाई धर्म मनुइयाहे कोठामे बैठके प्रार्थाना कैना अवस्था रहल मने अब्बे लोकतन्त्र आइलपाछे स्वतन्त्र रुपमे धर्म मनाई ओ प्राथार्ना कैना वातावरण बनल बटैलै ।
नेकपा माओवादी केन्द्र कैलारी गाउँपालिका अध्यक्ष बतासु चौधरी ख्रीष्टमस विशेष कार्यक्रममे शुभकामना डेटी कैलारीमे पहिल चो भारी सहभागिता हुके दिवस मनाइल बटैलै ।
कार्यक्रमके उदघाटन वरका पहुना, विशिष्ट पहुनाहुकनसे केक काटके, दिप प्रज्वलन ओ व्यानर बाचन कैके हुइल रहे । सुरुवाटी चरणमे रेभ. पा. राजु चौधरी प्रार्थना बाचन करल रहिट । ओस्टेक डेउखरिया थारुमे अनुवाद कैके प्रकाशित लावा करार पुस्तकके विमोचनफे कैगिल बा ।
कार्यक्रममे कैलारी गाउँपालिकास्तरीय ख्रीष्टमस विेशेष कार्यक्रम २०८१ मुल आयोजक समितिके सल्लाहकार सदस्य रामकुमार महतो स्वागत मन्तव्य व्यक्त करल रहिट । संचालन विजय चौधरी, रामसमझ चौधरी करल रहिट । ख्रीष्टमस विशेष कार्यक्रममे कैलारी गाउँपालिकाभिटर रहल टमान मण्डलीसे नृत्य डेखागैल रहे ।
कार्यक्रममे कैलारी गाउँपालिलका वडा नम्बर ५ के वडा अध्यक्ष विष्णु प्रसाद चौधरी, वडा नम्बर ६ वडा अध्यक्ष प्रेमबहादुुर चौधरी, कार्यपालिका सदस्य जगमा चौधरी, सुन्दरी चौधरीलगायत जनप्रतिनिधि, टमान राजनीतिके प्रतिनिधि, टमान मण्डलीके पास्टरहुकनकेफे सहभागिता रहे ।
ख्रीष्टमस विशेष कार्यक्रममे धनगढी उमहानगरपालिका वडा नम्बर १९ सेफे सहभागिता जनागिल रहे । ख्रीष्टमस विशेष कार्यक्रम सुरु हुइना आघे टमान मण्डलीसे सहभागिता हुई आइलहुक्रे हसुलिया बजारमे ¥यालीफे प्रदर्शन करल रहिट ।
