थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २९ माघ २६४८, मंगर ]
[ वि.सं २९ माघ २०८१, मंगलवार ]
[ 11 Feb 2025, Tuesday ]

वनदेवी सामुदायिक वनके १६औं वार्षिक साधारण सभा

पहुरा | १४ पुष २०८१, आईतवार
वनदेवी सामुदायिक वनके १६औं वार्षिक साधारण सभा

पहुरा समाचारदाता
भजनी, १४ पुस ।
कैलाली जिल्लाके भजनी नगरपालिका वडा नम्बर २, ६ ओ ८ कटानपुरमे पर्ना वनदेवी सामुदायिक वन उपभोक्ता समुहके १६औं वार्षिक साधारण सभा निम्जल बा ।

समुहके अध्यक्ष बाबुराम चौधरीके अध्यक्षतामे हुइल कार्यक्रममे वरका पहुना प्रतिनिधि सभा सदस्य माननीय गंगाराम चौधरी रहल रहिट । उहाँ भजनी सिएफसीसी अन्र्तगत रहल वनमे अतिक्रमण कम रहल बटैलै । सामुदायिक वनमे रहल समस्या समाधानके लाग संघीय सरकारसे करे सेक्ना सहयोगके लाग प्रतिवद्धता जनैलै ।

खास पहुना सब डिभिजन वन कार्यालय भजनीके अधिकृत लाल बहादुर विक वन बचैनासे वयवस्थाथापन कर्ना भारी बाट रहल कहटी ठाँउ अनुसार बोटविरुवा लगैना आग्रह करलै ।
भजनी नगरपालिकाके नगरप्रमुख केवल चौधरी पुरैना तलुवा प्रदेश सरकार ओ स्थानीय सरकार मिल्के पर्यटकीय ठाँउ बनैना कहटी काम कैना मौका आइल बटैलै ।

पल्टुपुर गाउँक भल्मन्सा बलबहादुर बुढा, हरियाली पार्वती समुहके अध्यक्ष राहुल बुढा विद्युटके पोलमे रहल तारहे ध्यान डैडेना आग्रह करलै ।

सिएफसीसी भजनीके अध्यक्ष खोजराम चौधरी सुशासनमे टेक्के आयव्यय सुनाइल बटैलै । भजनी ८ वडाके सदस्य गंगाराम चौधरी, चरा विज्ञ हिरुलाल डगौरा, सिएफसिसीके पुरान अध्यक्ष विजयराज श्रेष्ठ सामुदायिक वनके हिसाब पारदर्शी हुइल कहटी खुसी व्यक्त करलै । समुहके लेखापल सुदीप चौधरी ४८ लाख ४७ हजार २८५ रुप्या बराबरकेआयव्यय प्रस्तुत करल रहिट ।

इहे विच पहुनाहुकनहे मायाके चिन्ह, कदर पत्र दोसल्ला ओह्राके सम्मान कैगिल बा । कलेसे विपन्न वर्गके विद्यार्थीनहे झोला हस्तान्तरण कैगिल बा । इहे विच झुम्रा नाँच प्रस्तुत कैगिल बा । थारु महालोक गायक मनिराम चौधरी बनुवा बचैना गित गाके चैनार करल रहिट । कार्यक्रमके संचालन पत्रकार धर्मेन्द्र विष्ट ओ स्वागत समुहके उपाध्यक्ष केशवराज राजवंशी करल रहिट ।

जनाअवजको टिप्पणीहरू