थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २९ माघ २६४८, मंगर ]
[ वि.सं २९ माघ २०८१, मंगलवार ]
[ 11 Feb 2025, Tuesday ]

चैतन्य विद्यार्थी महोत्सव २०८१ हुइना

पहुरा | १५ पुष २०८१, सोमबार
चैतन्य विद्यार्थी महोत्सव २०८१ हुइना

पहुरा समाचारदाता
धनगढी, १५ पुस ।
कैलालीके धनगढी उपमहानगरपालिका–५ शिवनगरमे रहल चैतन्य पाठशाला यिहे पुस २७ गतेस माघ ५ गतेसम चैतन्य विद्यार्थी महोत्सव २०८१ आयोजना कैना जनैले बा ।

चैतन्यस विगत बर्षसे आयोजना करटी आइल स्टिम फेयर, वार्षिक खेलकुद सप्ताह ओ यी बर्षसे विन्टर क्याम्प रमाइलो मेलाहे जोरके संयूक्त रुपमे अइना पुस २७ गतेसे माघ ५ गतेसम चैतन्य विद्यार्थी महोत्सव २०८१ के आयोजना कैना सोम्मारके रोज पत्रकार सम्मेलनके आयोजना करके जानकारी डेगिल बा ।

शिक्षा ओ संस्कारके संगम, वेद ओ विज्ञानके संयोजन, प्रकृति ओ संस्कृतिके सम्मानके लाग चैतन्य पाठशालाके शैक्षिक अवधारणा ओ अभ्यास आघे बह्रटी रहल पाठशालाके अध्यक्ष गणेशप्रसाद जोशी जनैलै ।

महोत्सवमे मुख्यतः प्रस्तुत विधामे विद्यार्थीहुकनके संलग्नता रना बा । ओस्टे रक्तदान जीवनदानः मानव सेवाके लाग चैतन्य अभियानके यिहे अवसरमे करल घोषणा पत्र, विज्ञान प्रविधिके अन्वेशषण ओ प्रयोगात्मक परियोजनाके प्रयोग रना बा ।
कला, साहित्य, संस्कृति, रहनसहन, खानपान ओ मौलिकताके पहिचान ओ प्रदर्शनी, व्यक्तित्व विकासके वृहत आयामके क्षमताके लाग प्रतिस्पर्धा, रमाइलो खेल ओ सिकाई, सृजनसिलता ओ नवीन अभ्यासके प्रयोग हुइना बा ।

महोत्सवमे टमान महत्वपूर्ण खेलके प्रतिस्पर्धा ओ आयोजना, आट्र्स एक्जिविशन, सिकाइ, नृत्य, संगित ओ गायनके प्रतिस्पर्धा, चैतन्य गायन, चैतन्य नृत्य, चैतन्य ट्यालेन्ट हन्ट कम्पिटिशन, अभिभावक विच रमाइलो खेल ओ प्रतिस्पर्धात्मक खेल हुइना बा ।
रक्तदान, साइकल र्याली, कलश यात्रा, समाज सेवा, पाठ्यपुस्तक ओ पाठ्यक्रमसे बाहेर जाके विद्यार्थीनके अन्तरनिहित क्षमताके पहिचान ओ प्रस्फुटनके लाग अवसरके सृजना हुइना बा ।

विज्ञान ओ प्रविधि अन्तर्गत विद्यार्थीसे निर्मित आरसी प्लेन ओ ड्रोन उरैना, स्टिम डिपार्टमेन्टके विद्यार्थीसे निर्मित विज्ञान ओ प्रविधिके प्रदर्शनी आयोजक विद्यालयके अध्यक्ष जोशी बटैलै । महोत्सव उदघाटन आघे प्रभात फेरी, कलश यात्रा, सखिया नाँच, ज्ञानवद्र्धक पुस्तक प्रदर्शनी, टेक्रिङ, फयार क्याम्प, हर्स रिडिङ, योग ध्यान, संस्कृत, फुड फेस्टिवल, समुदाय ओ सम्पदाके सरसफाइ ओ सामुदायिक स्वास्थ्य जागरण हुइना अध्यक्ष बटैैलै ।

यी कार्यक्रमके सफल आयोजनाके लाग काठमाण्डौके रातो बंगला ओ अन्य प्रतिष्ठित विद्यालयसंगके समन्वय ओ सहयोग रना उहाँ बटैलै । ओस्टेक करके राष्ट्रके प्रतिभाशाली युवा वैज्ञानिक, समुदायके प्रतिष्ठित व्यक्ति, प्रेरक व्यक्तित्वके उपस्थिति रनाफे उहाँ जनैलै ।

यिहे चैतन्य पाठशालासे नेपाल पत्रकार महासंघके नवनिर्वाचितहुकनके बधाई तथा सम्मान कार्यक्रम कैगिल बा । कार्यक्रममे स्वागत मन्तव्य विद्यालयके प्रिन्सिपल कटकबहादुर सिंह ओ संचालन विन्दस बम करल रहिट ।
कार्यक्रममे विद्यालय व्यवस्थापन समितिके अध्यक्ष ईश्वर गिरी, विद्यालयके शिक्षकहुकनके सहभागिता रहे ।

जनाअवजको टिप्पणीहरू