एक वर्षमे ३ सय ६४ जाने पीडित
पहुरा समाचारदाता
धनगढी, १६ पुस । सन २०२४ जनवरीसे डिसेम्वरसमके एक बर्षके अवधिमे कैलाली जिल्लामे राज्य, गैरराज्य पक्षसे ३ सय ६४ जाने पीडित हुइल इन्सेक सुदूरपश्चिम प्रदेश कार्यालय धनगढी जनैले बा ।
मंगरके रोज हुइल नेपाल मानव अधिकार बर्ष पुस्तक प्रकाशन पूर्व अर्धवार्षिक तथा वार्षिक समीक्षा कार्यक्रममे प्रदेश संयोजक खडकराज जोशी उ जानकारी डेहल रहिट । सन् २०२४ जनवरीसे डिसेम्बरसमके अवधीमे कैलाली जिल्लामे संकलन करल ३ सय ६४ घटनामे २ सय ९७ महिला, ४६ बालिका ओ १६ पुरुष करके ३ सय ६४ जाने पीडित हुइल उहाँ जनैलै ।
यी अवधीमे कैलाली जिल्लामे गैरराज्यसे २ सय ९७ जाने पीडित महिला मध्ये २ सय २६ जाने घरेलु हिंसा, बलात्कार तथा बलात्कार प्रयाससे करके ५० जाने महिला पीडित हुइल उहाँ जनैलै ।
ओस्टेक करके बलात्कार ओ यौनदुव्र्यवहारसे ४६ जाने पीडित हुइल बटै । गैरराज्यसे आर्थिक सामाजिक तथा सांस्कृतिक अधिकारसे चार जाने ओ जातिय विभेदसे दुई जाने पीडित हुइल संयोजक बटैलै । ओस्टेक करके नागरिक तथा राजनितिक अधिकारसे १५ जाने पीडित हुइल बटै, जेम्ने मध्ये पाँच जाने राज्यसे पीडित हुइल उहाँ जनैलै ।
एक वर्षके अवधीमे बालत्कार, बलात्कारके प्रयास, यौनदुव्र्यवहार, अमानविय व्यवहार, बहुविवाह ओ हत्या घटनाके ३४ जाने आरोपित धरौटीमे छुटल बटै । बलात्कार, बलात्कार प्रयास ओ यौनदुव्र्यवहार घटनाके अरोपित ६ जाने व्यक्तिहे सफाई डेहल बा । कलेसे बलात्कार घटनामे कसूर ठहर करके चार जनहनहे कैद सजायके फैसला करल बा । एक बर्षमे अवधिमे दुई जाहनहे बोक्सीके आरोपमे कुटपिटफे हुइल बा ।
मानव अधिकार अवस्थाके वारेमे जानकारी करैना उद्देश्यसे अनौपचारिक क्षेत्र सेवा केन्द्र (इन्सेक) सुदूरपश्चिम प्रदेश कार्यालय, धनगढीसे नेपाल मानव अधिकार वर्ष पुस्तक प्रकाशन पूर्व अर्धवार्षिक तथा वार्षिक समीक्षा करटी आइल बा ।
यकरे निरन्तरता स्वरुप कैलाली जिल्लामे सन् २०२४ जनवरीसे सन् २०२४ डिसेम्बर सम हुइल मानव अधिकार उल्लंघनके घटनाके पुष्टि तथा पुर्नपुष्टि कैना उद्देश्यसे समिक्षा कार्यक्रमके आयोजना करल हो । कार्यक्रममे सहजीकरण इन्सेक प्रलेख अधिकृत कृष्ण विक ओ जिल्ला प्रतिनिधि मैनामोती चौधरी करल रहिट । समिक्षा कार्यक्रममे जिल्ला प्रहरी कार्यालयके प्रतिनिधि, मानव अधिकारके क्षेत्रमे कार्यरत टमान संघसंस्थाके प्रतिनिधि संचारकर्मीहुकनके सहभागिता रहे ।
