थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २९ माघ २६४८, मंगर ]
[ वि.सं २९ माघ २०८१, मंगलवार ]
[ 11 Feb 2025, Tuesday ]

नवज्योति कृषि सहकारीके १६औं वार्षिक साधारण सभा

पहुरा | १९ पुष २०८१, शुक्रबार
नवज्योति कृषि सहकारीके १६औं वार्षिक साधारण सभा

अध्यक्ष पदमे मेघनाथ राना निर्वाचित

पहुरा समाचारदाता
धनगढी, १९ पुस ।
नवज्योति कृषि सहकारी संस्था लिमिटेडके १६औ वार्षिक साधारण सभा तथा पाँचौ अधिवेशन शुकके रोज निम्जल बा ।

संस्थाके अध्यक्ष सीताराम रानाके अध्यक्षतामे हुइल कार्यक्रममे उहाँ वार्षिक प्रतिवेदन प्रस्तुत करल रहिट ।
संस्थाके पुँजी संरचनाबारे जानकारी डेटी अधिकृत शेयर पुँजी ५ करोड रहलमे जेम्ने मन्से २०८० साल असार मसान्तके शेयर पुँजी १ करोड १६ लाख ७१ हजार १ सय रहलमे २०८१ असार मसान्त सममे चुक्ता शेयर पूजी रू.१ करोड २९ लाख १२ हजार ६ सय पुगल बा । कलेसे २०८० असार मसान्त सममे शेयर सदस्य संख्या ८६१ जाने रहलमे ओकर वृद्धि हुके २०८१ असार मसान्तसममे शेयर संख्या ११४० जाने पुगल उहाँ जनैलै । अब्बे हालसम १२ सय ९० पुगसेकल अध्यक्ष जनैलै ।
जगेडा कोषमे १ करोड ११ लाख ५ हजार ६ सय ६८ रुपैया ४८ पैसा पुगल बा ।

संस्थाके निक्षेप संकलनमे गैल वर्षक निक्षेप रू १२ करोड ४१ लाख ४६ हजार ३ सय ४४ रूपैया १७ पैसा रहलमे यी वर्ष २०८१ साल असार मसान्तसम्ममे संस्थाके कुल निक्षेप रकम १५ करोड ६१ लाख ५२ हजार ९ सय २३ रूपैया ६३ पैसा निक्षेप उहाँ जनैलै ।

कर्जा प्रवाह ओर संस्थाके शेयर सदस्यके आर्थिकस्तर वृद्धि तथा समाजिक आवश्यकता परिपुर्ति कैना उद्देश्यसे नवज्योति कृषि सहकारी संस्था लिमिटेडसे कर्जा लगानी तथा असुलीमे समय सापेक्ष परिमार्जन करटी कर्जामे टमान शिर्षक कृषि, व्यापार, हायर प्रचेज, घर निर्माण, शिर्षकमे कर्जा प्रवाह करेबेर शेयर सदस्यहे स्वरोजगार तथा आत्मानिर्भरतामे सहयोग करले बा । यी संस्थासे गत आ.व. २०७९÷०८० के असार मसान्तसममे १० करोड ३० लाख ३५ हजार ५ सय ९४ रुपैया ९६ पैसा लगानी रहल रहे । कलेसे आर्थिक वर्ष २०८०÷०८१ मे १० करोड ३३ लाख ४९ हजार १ सय ६२ रूपैया ०८ पैसा लगानी रहल अध्यक्ष जनैलै ।

मुनाफा आर्जन ओर सहकारी सस्थाके आय स्रोत कहल कर्जा लगानीसे व्याज, रसायनिक मल विक्री ओ सुपथ पसलसे आम्दानी आ.व. २०८०÷०८१ के कारोवारसे रू ३ लाख ८७ हजार ४ सय १२ रुपैया ०६ पैसा शुद्ध नाफा आर्जन करल बा ।
आ.व. २०८१÷०८२ के लाग लक्षित कार्यक्रम ओर खराव कर्जा वृद्धि हुई नैडेना जनचेतनाके कार्यक्रम कैना, ओ भाखा नाघल कर्जाहे ५ प्रतिशतसे कम कैना, सेयर सदस्य वृद्धि कैना कहले बा ।

सहकारीहे सवल बनैना सहकारीके छाता संगठन, स्थानीय निकाय तथा अन्य दातृ संघ, संस्थासंग समन्वय कैना, शेयर सदस्यके क्षमता अभिवृद्धिके लाग टमान मेरके बेमौसमी खेती ओ कृषि सम्बन्धी, सहकारी शिक्षाके व्यवस्था मिलैना कहल बा ।
संचालक समिति, उपसमिति तथा कर्मचारीके क्षमता अभिवृद्धिके लाग टमान मेरके तालिमके व्यवस्था मिलैना कहल बा ।
ओस्टेक रासायानिक मलसंगे दैनिक उपभोग्य बस्तुके खरिद विक्री करेक लाग पसलहे आउर व्यवस्थित कैना, कृषक शेयर सदस्यहुकनहे मध्य नजर करके कृषियन्त्र अनुदानके व्यवस्था मिलैना पहल कैना अइना दिनके लक्ष्य रहल अध्यक्ष बटैलै ।

कार्यक्रमके संस्थाके प्रवन्धक उग्रसेन राना बर्ष भर कैगिल प्रगती विवरण प्रस्तुत करल रहिट । यी सहकारी वि.सं. २०६६ सालमे सामुदायिक बचतकोषसे शुरू हुके २०६७ साल अगहन ५ गते सहकारी प्रशिक्षण तथा डिभिजन कार्यालय धनगढी विधिवत रूपमे सहकारी कैलालीमे दर्ता हुइल रहे ।

सहकारीके उदघाटन कार्यक्रम संविधानसभा सदस्य तथा सुदूरपश्चिम प्रदेश सभाके निवर्तमान प्रदेश सभा सदस्य मालामति रानाके वरका पहुनामे हुइल कार्यक्रममे उहाँ शेयरहुक्रे अब्बे लगानीहे पहिचान करे नैसेकल बटैली । उहाँ कहली, ‘यी सहकारीमे अब्बे करोडौ रुप्या निक्षेप संकलन हुइल बा । शेयर सदस्यहुक्रे लोके मजा वातावरण बनल बेला लगानीहे पहिचान करे नैसेकल अवस्था बा ।’

मुलुकमे सहकारी ठगी प्रकरणके बाट आइबेर यहाँके स्थानीयस्तरमे संञ्चालन रहल सहकारी ओसिन नैरहल उहाँ बटैली । उहाँ अपने सांसद पदमे रहेबेर टमान क्षेत्रमे सहयोग करल बटैली । ओस्टेक करके सरकारसे सहकारी सम्बन्धी अध्यादेश ल्यानल ओरसे सहकारीसे चासो डेहे पर्ना उहाँ बटैली ।

धनगढी उपमहानगरपालिका वडा नम्बर ७ मोती रानाथारु सहकारी स्थापना हुइलपाछे साह्रो गाह्रो परल बेला सहयोग पुगल बटैलै । नवज्योति कृषि सहकारीसे सुपथ मोलमे पसल संचालन करल शेयर सदस्यहुकनहे सहुलियत हुइल मने शेयर सदस्यहुक्रे मौका फाइदा नैउठाइल बटैलै ।

प्रदेश नीति तथा योजना आयोगके उपाध्यक्ष डा. जीवन राना यी सहकारीसे किसान, व्यवसायहुकनहे ढेर सहयोग मिलल बटैली । उहाँ अपने भर्खर प्रदेश नीति तथा योजना आयोगके उपाध्यक्ष बनल ओरसे सहकारी क्षेत्रहे करे सेक्ना सहयोग कैना प्रतिवद्धता जनैली ।

नवजीवन सहकारी संस्था लिमिटेड संचालक समिति सदस्य केशव मिश्र सहकारीसे यहाँके महिलाहुकनहे टमान व्यवसाय कैना बातावरण सृजना करल बटैलै ।

वडा नम्बर १७ के वडा अध्यक्ष माधव राना सहकारीके बार्षिक साधारण सभा शुभकामना तथा नव निर्वाचित कार्यसमितिहे बधाई ज्ञापन करल रहिट ।

कार्यक्रममे संचालक समिति सदस्य मनोज विक्रम चौधरी, शान्तिकुञ्ज हरिद्वारके प्रेमचन्द्र राना, निवर्तमान वडा सदस्य यमुना जोशी भट्ट, दाइनो कृषि सहकारीके लेखा समिति संयोजक निर्मला राना, शेयर सदस्य कौशिला राना, देवहरिया सामुदायिक वनके अध्यक्ष शारदा प्रसाद रानालगायत मन्तव्य व्यक्त करल रहिट । कार्यक्रममे स्वागत मन्तव्य उपाध्यक्ष मेघनाथ राना करल रहिट । संचालन सचिव भिरा राना करल रहिट । कार्यक्रममे विशिष्ट अतिथि सहकारीके पूर्व अध्यक्ष तथा सल्लाहकार संयोजक प्यारेलाल राना विशिष्ट पहु्ना रहिट ।

यिहे विच सहकारीसे बार्षिक साधारणके अवसरमे असल ऋणी सुग्रीव राना, महेन्द्र बन्जरा, दयालु रानाहे दोसल्ला ओ सम्मानपत्रसे सम्मान करले बा ।

ओस्टेक करके जेष्ठ शेयर सदस्यहुकनहे कम्मल ओरहाके सम्मान कैगिल बा । सम्मानित हुइलमे फिरुवा रानाथारु, छोटेलाल राना, शंकरी रानाथारु, लोघरी डगौंराथारु, नन्द रानाथारुहे सम्मान कैगिल बा ।

नवज्योति कृषि सहकारी संस्था लिमिटेडके १६औ वार्षिक साधारण सभा तथा पाँचौ अधिवेशनसे लौवा कार्यसमिति सर्वसम्मतसे चयन कैगिल बा ।अध्यक्षमे मेघनाथ रानाथारु, उपाध्यक्षमे भिराराम राना, सचिवमे मनोज विक्रम चौधरी निर्विरोध निर्वाचित हुइल बटै । ओस्टेक सदस्यमे भजन राना, महेन्द्र चौधरी, भैलुराम रानाथारु, लिलाकुमारी पौडेल, अनिता चौधरी, अर्जुन चौधरी निर्विरोध चयन हुइल बटै ।

लेखा समिति संयोजक भीम पडाल,सदस्यमे आशादेवी चौधरी, हर्षराज राना रहल बटै । ऋण उपसमितिमे जगतराम राना ओ शिक्षा उपससमितिमे मथुरा राना रहल बटै ।

जनाअवजको टिप्पणीहरू