थारु भाषा, रिति संस्कृति हमार पहिचानसे जोरल बाः गाउँपालिका उपाध्यक्ष भगवती

पहुरा समाचारदाता
धनगढी, २० पुस । थारु समुदायके भाषा, रिति संस्कृति, खानपान पहिचानसे जोरल कैलारी गाउँपालिकाके उपाध्यक्ष भगवतीकुुमारी चौधरी बटैले बटी ।
थारु होमस्टे गाउँ भादा पर्यटन विकास तथा व्यवस्थापन समितिके आयोजनामे थारु होमस्टे गाउँ भादाके प्रचारप्रसार एवम् प्रवद्र्धनके साथे थारु समुदायके कला, संस्कृति जर्गेना कैना उद्देश्यके साथ कैलालीके धनगढी उपमहानगरपालिका–१६ स्थित भादा गाउँमे हुइटी रहल थारु होमस्टे महोत्सवमे शनिच्चरके रोज कार्यक्रममे सम्बोधन करटी उहाँ उ बाट बत्वाइल रही ।
उहाँ कहली, ‘थारु समुदायके अपने भाषा, कला, संस्कृति, परम्परा बा, यिहे हमार पहिचान हो । हम्रे यिहीहे आ–आपन ओरसे संरक्षणसंगे प्रवद्र्धन करे सेक्लेसे हमार पहिचान कबु नैहेराई । हमार अपने मौलिक खानपान बा, आपन पहिरन, अपन गीतबाँस बा टबमारे यिहीहे जोगैना आवश्यक बा ।’
भादामे आयोजना हुइलक महोत्सवमे थारु समुदायके मेरमेराइक गीतबाँस प्रस्तुतीकरणसे यकर संरक्षण ओ प्रवद्र्धनमे टेवा पुगल, यूवा पुस्ताहुक्रे कला, संस्कृतिके बारे जाने पैना, सिखे पैना मौका भेटाइल ओ थारु कलाकारहुक्रे आपन प्रस्तुती डेखैना अवसर पाइल गाउँपालिका उपाध्यक्ष बटैली ।
समितिके अध्यक्ष लक्ष्मीनारायण चौधरी होमस्टेके प्रचारप्रसार तथा प्रवद्र्धनके साथ थारु समुदायके संस्कृति, खानपान, भेषभूषा, सीपकला, प्राकृतिक सम्पदाके सदुपयोग एवम् जगेर्ना कैना उद्देश्यसे हरेक वर्ष महोत्सव आयोजना करल जनैलै ।
संरक्षणके लाग सक्कु जाने करी काम, संस्कृति भेष भुषा राखी हमार पहिचान कना मुल नाराके साथे आयोजना हुइल महोत्सवमे थारु खानपानके परिकार, थारु सीपकला तथा भेषभूषा, थारु देउथान अवलोकन, लहरुमे गाउँके अवलोकन, थारु संग्राहालयके अवलोकन, काठे पिङलगायत आकर्षणके रुपमे रहल बा ।
