कैलालीमे श्रमजीवी पत्रकार संघके शाखा गठन

पहुरा समाचारदाता
धनगढी, २१ पुस । कैलालीमे श्रमजीवी पत्रकार संघ नेपालके शाखा गठन करल बा । जिल्लामे सञ्चालित टमान सञ्चार माध्यममे कार्यरत श्रमजीवी पत्रकारहुकनके भेलासे अँट्वारके राज मीन ठकुरीके अध्यक्षतामे समिति गठन करल हो ।
समितिके उपाध्यक्षमे वीरेन्द्र भट्ट, उपाध्यक्ष (पिछरल क्षेत्र) मे अंकुश कुँवर, महिला उपाध्यक्षमे निर्मला शाही, सचिवमे सुरेन्द्र ताम्राकार, कोषाध्यक्षमे पुष्कर पौडेल, सहसचिवमे ध्रुव ओझा ओ सहसचिव (समावेशी) मे रञ्जना बिसी सर्वसम्मत चयन हुइल बटैं ।
अस्टेक समितिके सदस्यमे राजकुमार साउँद, शारदा फुलारा, प्रेम चौधरी, शान्तिप्रसाद जोशी, महादेव गिरी, प्रेम ताडी ओ हरिश भट्ट रहल बटैं ।
गठन पश्चात बैठल समितिके बैठकसे टमान निर्णय करले बा । समिति मुख्य रुपमे अर्धवार्षिक बुलेटिन प्रकाशन करना निर्णय करले बा । उ बुलेटिनमे जिल्लाके श्रमजीवी पत्रकारहुकनसे लिखल समाचार तथा लेखरचना प्रकाशित करना समितिके अध्यक्ष मीन ठकुरी बटैले बटैं ।
