आवसे प्रदेशके सरकारी अस्पातलमे निःशुल्क रगत मिल्ना

पहुरा समाचारदाता
धनगढी, २१ पुस । सुदूरपश्चिम प्रदेश भिटरके सक्कु सरकारी अस्पातलमे आबसे निःशुल्क रगत सेवा मिल्ना बा ।

नेपाल रेडक्रस सोसाइटी रक्त सञ्चार केन्द्रसंग सहकार्य कैके सुदूरपश्चिम प्रदेश सरकार सामाजिक विकास मन्त्रालयसे यी सेवा शुरु करलक हो । अँटवारके रोज सुदूरपश्चिम प्रदेश सरकारके मुख्यमन्त्री कमलबहादुर शाह ओ सामाजिक विकास मन्त्री मेघराम खडका विगत लम्मा समयसे विरामी हुके सेती प्रादेशिक अस्पतालमे उपचारत निर्मल चौधरीके आफन्त रोशन चौधरीहे निःशुल्क रगत हस्तान्तरण करके उ सेवाके सुरुवाट करल रहिट । उहे क्रममे सम्बोधन करटी उहाँ अपने दुसरा चो मुख्यमन्त्री हुईबेर पहिल निर्णयमे सुदूरपश्चिमबासीहुकनहे सरकारी अस्पतालमे उपचारके क्रममे रगत चाहल बेला निःशुल्क रगत उपलब्ध करैना निर्णयमे हस्ताक्षर करल बटैलै ।

उहाँ सामाजिक विकास मन्त्रालयसे महत्वपूर्ण कार्यके थालनी करल उल्लेख करटी रेडक्रस निःस्वार्थमे सेवा कैना संस्था रहल ओ यम्ने दायाँबायाँ, भ्रष्टाचार नैहुइना करल ओरसे प्रदेश सरकारसे विश्वास करके रेडक्रससँग सहकार्य करल उल्लेख करलै ।
‘यी सहकार्य प्रदेश सरकारसे अस्पतालसंगफे करे सेकट’, मुख्यमन्त्री कहलै, ‘मने रेडक्रस आउर ढेर विश्वासिलो संस्था रहल ओरसेृ सरकारसे रेडक्रससँग सहकार्य करल हो ।’ प्रदेश सरकारसे सुम्पल जिम्मेवारी प्रभावकारी रूपमे निर्वाह कैना उहाँ रेडक्रसकर्मीहुकनहे आग्रह करलै ।

ओस्टेक करके सामाजिक विकास मन्त्री मेघराज खड्का निःशुल्क रक्त सेवासे विपन्न वर्ग लगायतके बिरामीके उपचारमे सहयोग पुग्न विश्वास व्यक्त करलै । उहे अवसरमे प्रदेशमे सबसे ढेर १०७ चो रक्तदान करुइया दीपक उपाध्यायहे रक्तदान सद्भावना दूत नियुक्त कैगिल बा ।

निःशुल्क रक्त सेवा निरन्तरताके लाग माननीय मुख्यमन्त्री कमलबहादुर शाहके विशेष पहल ओ निर्देशनमे रू १ करोड बजेट विनियोजन हुइल बा ।

सुदुरपश्चिम प्रदेशके नागरिकहुकनके उपचारके क्रममे आवश्यक पर्ना रगत तथा रंगतजन्य पदार्थके सहज ओ निःशुल्क उपलब्ध कराइक लाग नेपाल रेडक्रस सोसाइटी प्रादेशिक रक्त संचार केन्द्र धनगढी, कैलालीसे यी सम्झौता करल मन्त्री बटैलै ।
सुदुरपश्चिम प्रदेश सरकार, सामाजिक विकास मन्त्रालय धनगढी कैलानी पहिल पक्ष हो कलेसे नेपाल रेडक्रस सोसाइटी (कैलाली कंचनपुर, डडेल्धुरा, बैतडी, दार्चुला, बझाङ, डोटी, अछाम, बाजुरा जिल्ला शाखा ओ टिकापुर उपशाखा) रक्त संचार सेवा केन्द्र दुसरा पक्ष हो ।