धनगढी अटोक्रस ओ अटोर्याली हुइना
पहुरा समाचारदाता
धनगढी, २३ पुस । सुदूपश्चिम खेलकुद विकास परिषदमे दर्ता रहल सुदूरपश्चिम अटोमोबाइल संघसे धनगढी अटोक्रस ओ अटोर्याली कैना जनैले बा ।
मंगरके रोज धनगढीमे पत्रकार सम्मेलनके आयोजना करके पहिल चो दुई ठो इभेन्ट करे लागल संघके प्रदेश अध्यक्ष पुष्कार ओझा जनैलै ।
शिवपुरीधामसे सुरु हुके परशुरामधाम मोटर र्यालीके साथे दोधारा चाँदनीमे अटोक्रस ओ प्रदेशके पहिल मार्शल ट्रेनिंग, रेसिंग ओ र्याली करे जैटी रहल उहाँ पत्रकार सम्मेलनमे जानकारी डेलै ।
अइना फागुन १६ ओ १७ गते आयोजना कैना नेपाल अटोमोबाइल्स एसोसिएसनके गाइडलाइन अनुसार हुइना उ इभेन्टस् भव्य ओ सभ्य रुपमे सम्पन्न कैना पुष्कर ओझाके संयोजकत्वमे रहल ५ सदस्यीय व्यवस्थापन समिति गठन करल बा । उ इभेन्टमे कुल १२ लाख पचास हजार खर्च हुइना अनुमान करल उहाँ जनैलै ।
उ इभेन्ट नेपाली युवाके लाग एक ठा आकर्षक खेल हो । जिहीहे हम्रे सुदुरपश्चिममे सस्थागत शुरुआत करे जैटी रहल बटी, उहाँ कहलै, ‘धनगढीसे शुरू कैना उ इभेन्टमे न्यूनतम ५० ठो कार ओ जीप सहभागी रही । जिहीसे समय, दूरी ओ गतिके सन्तुलन मिलैटी आयोजकसे तोकल रुटमे शिवपुरी धामसे परशुराम धामसम गाडी हक्ही । अटोक्रस ओ अटोर्याली सुदूरपश्चिमके धार्मिक पर्यटनमेफे महत्वपूर्ण भूमिका खेली । साथे र्यालीसे ड्राइभ टुरिजम, सडक सुरक्षा ओ सकारात्मक गति सन्देशफे दि ।’
प्रत्येक गाडीमे २ जानेक टीम हुइना र्यालीके दर्ता शुल्क जम्मा पाँच हजार तोकल बा ओ ओकर विजेटासे क्रमश ८१ हजार, २७ हजार ओ ९ हजार नगद, शिल्ड, प्रमाणपत्र प्राप्त कैना आयोजक जनैले बा । कलेसे सहभागीनहे प्रमाणपत्र प्रदान कैजैना कहल बा ।
सहभागीहे दुई ठो लन्च, एक ठो डिनर ओ ब्रेकफास्ट तथा आवासके व्यवस्था कैजैना बा । दौरान चाँदनी दोधारामे आकर्षक अटोक्रस आयोजना कैजैना बा । ओम्ने २० ड्राईभर सहभागी हुइना अवसर पैही ।
संसारके सुन्दर पुलके वरपर हुइना यी इभेन्टमे विजेता ढेरमे दुनु अन्तर्राष्ट्रिय सहभागिताके अवसर पैही । जौनफे क्षमता ओ डिजाईनके निजी कार ओ जीपहे र्यालीमे समावेश कराजैना बा कलेसे अटोकसमे हजारसे १६ सय सिसी समके कार केल हुई पर्ना बा । सुदुरपश्चिम खेलकुद विकास परिषद के मुख्य सहयोग हुइना यी इभेन्टमे कैलाली उवासंघ, डिलर्स एसोसिएसन लागायतके संघ संस्था ओ टमान कम्पनीके सहभागिता हुइना आयोजक जनैले बा ।
