गेटामे ३०० शैय्याके अस्पताल सञ्चालन हुईः मन्त्री पौडेल

पहुरा समाचारदाता
धनगढी, २३ पुस । स्वास्थ्य तथा जनसंख्या मन्त्री प्रदीप पौडेल गेटामे ३ सय शैय्याके अस्पताल हाली सञ्चालनमे लन्ना प्रतिवद्धता करले बटैं ।
गेटामे निर्माण हुइल भवन तथा सञ्चालित अस्पतालके स्थलगत निरिक्षण कैटी मन्त्री पौडेल छात्रवृतिके चिकित्सक पठाके हुइलेसे फेन इहे बरस ३ सय शैøयाके अस्पताल सञ्चालन कैना प्रतिवद्धता करल हुइट ।
उहाँ सुदूरपश्चिम प्रदेशके लाग मेडिकल कलेज आवश्यक रहल ओरसे मन्त्रालयसे अतिआवश्यक पर्ना उपकरणके विषयमे गृहकार्य करटी रहल बटैलै ।
उहाँ छात्रवृत्तिके १० जाने चिकित्सक ओ २० जाने नर्सिंग कर्मचारीसहित प्राविधिकहे गेटा पठाके हुइलेसे फेन तीन सय शय्याके अस्पताल सञ्चालन कैना दाबी करलै ।
मन्त्री पौडेल गेटाके संगठन तथा व्यवस्थापन सर्वेक्षण (ओएनएम) के तयारी करल बटैलै । गेटामे ३ सय शैयाके अस्पताल सञ्चालन करक लाग ६२ करोड ढेर रकम कर्मचारीके लाग किल हुइना बटैटी मन्त्री पौडेल उ बजेट आगामी बरस बिनियोजन कैना मेरके हाल नेपाल सरकारसे छात्रवृत्तिमे अध्ययन करल १० जाने चिकित्सक तथा २० जाने नर्सिंग कर्मचारीसहित प्राविधिकहे हाली गेटा पठैना बटैलै ।
‘शिक्षा, विज्ञान तथा प्रविधि मन्त्रालय विश्व विद्यालयके प्रक्रियामे बा, उहाँ कहलै, ‘विश्व विद्यालयके काम नैरुकी, गेटामे तीन सय शय्याके अस्पताल सञ्चालन करी, एमबीबीएसके अध्यापन सुरु करी, आयोगसे फेन यम्ने काम करे ।’
गेटामे आकस्मिक सेवासहितके २४ घण्टा स्वास्थ्य उपचार सेवा डेना मन्त्री पौडेल निर्देशन डेले बटै । ‘प्रयोगशाला उपकरण फेन आइल बावै,’ उहाँ कहलै, ‘अपनेहुक्रे जत्रा जाने बाटी, मजा काम करबी, निजी अस्पतालसे फेन यहोर ढेर महत्व डेबी ।’ गेटामे आकस्मिकसहितके बहिरंग (ओपिडी), प्रयोगशाला, एक्सरे सेवा सञ्चालनमे रहल बावै ।
ओस्टेक करके मंगरके रोज नेपाल प्रेस यूनियन कैलालीके आयोजनामे कैगिल पत्रकार सम्मेलनमे सम्बोधन कैटी सेती प्रादेशिक अस्पातलमे अलगे सिकलसेल एनिमिया वार्ड बनैना मन्त्री पौडेल बटैलै ।
यकर लाग संघीय सरकार सहयोग पुगाई,’ मन्त्री कहलै, ‘ढेरमे १० बेड नैहुई टे पाँच बेड रना मेरके वार्ड हाली संचालनमे आई । मित्रराष्ट्र भारतके सहयोगमे सिकलसेल एनिमियाके समस्या रहल विरामीहुकनहे एकदम हाली निशुल्क औषधी उपचार उपलब्ध करैबी ।’
यी चाही ओसिन समस्यासे ग्रसित नागरिकहुकनहे भारी सहयोग पुग्न मन्त्री पौडेल बटैलै । यी विषयमे सहकार्य कैना कहिके कैलाली आइल उहाँ बटैलै ।
उहाँ कहलै, ‘सेतीमे भवनके पूर्वाधार कमी रहल बा । और सेवा विस्तार करेक लाग भौतिक पूर्वाधारके कमी डेखल बा । मुटु सेवा विस्तारके लाग गेटामे पूर्वाधार बा । उ विश्व विद्यालयके रुपमे विकसित हुइना कारणसे आब मुटुके उपचार सेवा गेटामे विस्तार हुई सेकी, ओकर लाग प्रक्रिया हाली आघे बह्राजाई ।’ प्रत्यारोपणके काम महिनामे दुई ठो करेसेक्लेसे तत्कालके लाग सुरुवाट हुई सेकी उ फे गेटामे हाली कैना प्रयास कैबी । बोन म्यारो क्यान्सरके उपचार सेवा उपलब्ध करैना प्रयास कैना मन्त्री बटैलै ।
सेतीमे और यूनिट संचालन कैना, गेटा ओ सेतीहे जोरके उपचार सेवा प्रदान सन्दर्भमे सहकार्य कैना जरुरी बा । नेपालमे तीन तहके सरकार बा । सक्कु एक्के देशके हो, देशके नागरिकहे सेवा प्रदान करेक लाग हो । सेतीमे पूर्वाधारके लाग प्रदेश सरकारसे बाट करल मन्त्री पौडेल बटैलै ।
