“भलमन्सा प्रथाहे कानूनी मान्यता डेहे परल”

पहुरा समाचारदाता
धनगढी, २८ पुस । धनगढी उपमहानगरपालिकाके उपप्रमुख कन्दकला राना भलमन्सा प्रथाके संवद्र्धन, संरक्षण तथा प्रभावकारी बनाइक लाग भलमन्सा ऐनके विधेयकहे पास कैके कानूनी मान्यता डेहे परना बटैले बटि ।
नगर भलमन्सा समिति धनगढीसे शनिच्चरके रोज धनगढीमे आयोजना करल माघक शुभकामना आदानप्रदान कार्यक्रममे उपप्रमुख राना स्थानीय सरकारके सहयोगमे भलमन्सा प्रथाहे मान्यता डेके बलगर बनाइ सेक्नामे बटैले रहि । उहाँ धनगढी उपमहानगरपालिका भलमन्साहुकनके लाग टमान कार्यक्रम नानल फेन बटैले रहि ।
कार्यक्रममे समाजसेवी एवं थारु बुद्धिजीवी यज्ञराज चौधरी भलमन्साहुक्रे समाजके न्यायपालिका, व्यवस्थापिक ओ कार्यपालिकाके काम करटि रहल ओरसे भलमन्सा प्रथाहे समृद्ध बनाइ परना बटैले रहैं ।
“भलमन्सनके न्याय सम्पादन जीत–जीतके रहठ,” उहाँ कलैं, “समाजमे उत्पन्न द्वन्द्वहे पुलिस प्रशासन, अदालत गैलेसे एकके जीत ओ डोसरके हार हुइठ । मने, भलमन्साके न्याय सम्पादनमे सब पक्षके विजयी हुइना अवस्था सिर्जना करठ ।” उहाँ थारु समुदायके माघ मनैना परम्पराके साथे थारु जातिके धर्म संस्कृतिके बारेमे फेन जानकारी करैले रहैं ।

अस्टेक, कार्यक्रममे धनगढी संजीवनी अस्पतालके डा. सुमन चौधरी भलमन्सा प्रथाहे सामाजिक कामके सँगे स्वास्थ्यसँग फेन जोरके लैजाइ परना बटैले रहैं । उहाँ थारु समुदायमे डेखा परल सिकलसेल एनिमिया सम्बन्धी भलमन्साहुक्रे गाउँघरमे चेनता बह्राइ परना बटैले रहैं ।
“सिकेलसेल थारु समुदायमे डेखा परना एक वंशाणुगत रोग हो । यी नेपाल लगायत दक्षिण एशिया, अफ्रिका, अमेरिकालगायतमे फेन बा,” उहाँ कलैं, “सिकलसेल लागल व्यक्ति उपचार कराइ परठ । यकर लाग सबजे यी सम्बन्धी बुझे परना आवश्यक बा ।” उ अवसरमे भलमन्साहुनहे धनगढी संजीवनी अस्पतालमे सुहलियत डेना फेन घोषणा करलैं । भलमन्साहुक्रे यिहे माघ १ गतेसे सहुलियत पैना उहाँ बटैलैं । ओकर लाग भलमन्साहुक्रे नगर भलमन्सा समितिके सिफारिस भर लेहे परना बा ।
कार्यक्रममे धनगढी उपमहानगरपालिका वडा नम्बर ७ के वडाध्यक्ष मोती राना सामाजिक कार्य, सामाजिक विवादलगायतके काममे भलमन्सा प्रथाके महत्वपूर्ण योगदान रहल बटैलैं ।
उहाँ थारु, रानाथारु, कठरिया थारुलगायतके समाजहे एकतावद्ध रहलके प्रमुख कारण भलमन्सा प्रथा रहल बटैलैं । भलमन्साहुक्रे न्यायके पक्षमे काम करेपरनामे फेन जोड करले रहैं ।

धनगढी गाउँके भलमन्सा सरोज चौधरी समाजहे नेतृत्व करे सेक्ना व्यक्तिहे भलमन्सा बनाइ सेक्लेसे भलमन्सा प्रथाके गरिमा और बह्रना बटैलैं । उहाँ भलमन्साहे कानूनी मान्यता डेनाके साथे भलमन्सा चुनेबेर सक्षम, योग्य, निश्पक्ष व्यक्तिहे भलमन्सा बनाइ परना बटैले रहैं ।
कार्यक्रममे धनगढी उपमहानगरपालिका वडा नम्बर ८ के वडाध्यक्ष जुगराम चौधरी, वडा नम्बर १० के वडाध्यक्ष शिवकुमार राना, वडा नम्बर १७ के वडाध्यक्ष माधव राना, वडा नम्बर ६ के वडाध्यक्ष भागीराम चौधरी, वडा नम्बर १६ के वडाध्यक्ष रामलाल चौधरी, वडा नम्बर १५ के वडाध्यक्ष सुकदेव राना, वडा नम्बर १९ के वडाध्यक्ष बाँधुराम चौधरी, विश्व हिन्दू परिषद सुदूरपश्चिम प्रदेश प्रमुख महेन्द्र पन्त, हरिकेश विष्टलगायत मन्तव्य व्यक्त करले रहैं ।
नगर भलमन्सा समिति धनगढीके अध्यक्ष रोहित चौधरीके अध्यक्षतामे हुइल कार्यक्रममे स्वागत समितिके उपाध्यक्ष रामनारायण चौधरी करले रहैं ।
