कालिका इंगलिस बोर्डिङ स्कूलके १७ औं वार्षिकोत्सव

विद्यार्थीनके क्षमताके पहिचान कैना जरुरी बाः गापा उपाध्यक्ष
पहुरा समाचारदाता
हसुलिया, २७ पुस । कैलाली जिल्लाके कैलारी गाउँपालिका वडा नम्बर १ हसुलियामे कालिका इंगलिस बोर्डिङ स्कूलके १७ औं वार्षिकोत्सव कार्यक्रम भव्यताके साथ सम्पन्न हुइल बा ।
कैलारी गाउँपालिका उपाध्यक्ष भगवतीकुमारी चौधरीके वरका पहुनामे हुइल कार्यक्रममे उहाँ अब्बेक अवस्थामे विद्यार्थीनके क्षमताके पहिचान करके आघे बह्रना जरुरी बटैलै ।
उहाँ कहली, ‘हरेक विद्यार्थीमे फरक फरक क्षमता रहठ । उ बाट अभिभावक, शिक्षकहुक्रे बुझे पर्ना जरुरी हो । ओइनके क्षमता पहिचान विना कर लगाके प्रदान कैना शिक्षा आब काम नैलागी ।’

अब्बेक यूवा पिढी लागु औषधके दुव्र्यशनमे फस्टी गैल ओरसे उहीहे न्यूनिकरण करेक अभिभावकके ढेर भुमिका रहठ,’ गाउँपालिका उपाध्यक्ष कहली, ‘बालबालिका विद्यालय गैल बेला समयमे पुग्ठै की नै, समयमे घर अइठै की नै । कैसिन लर्कनसे संगत करठै निगरनी कैना जरुरी बा ।’
आपन लर्का केल नाही परोसीके लर्का विगरलै कलेसे सक्कु जाने सुधारके लाग लागे पर्ना उहाँ बटैली । कालिका इंगलिस बोर्डिङ स्कूलसे गुणस्रीय शिक्षामे टेवा पुगाइल उहाँ बटैली । संस्थागत विद्यालयमे यिहे समाजके विद्यार्थी अध्ययनरत रहल ओरसे स्थानीय सरकारसे संस्थागत विद्यालयहेफे सहयोग कैना उहाँ आग्रहफे करली ।
कैलारी गाउँपालिका शिक्षा विकास शाखा प्रमुख गणेश प्रसाद मिश्र, दिपेन्द्र माविके प्रअ विनोद भट्टराई यी विद्यालयसे गुणस्तरीय शिक्षा प्रदान कैनामे महत्वपूर्ण भूमिका निर्वाह करल बटैले रहिट ।

कार्यक्रममे २०८० सालके एसइइमे सहभागी विद्यार्थीके अभिभावक तथा वनदेवी प्रावि मन्झराके प्रअ रामप्रसाद चौधरी, कक्षा १० मे अध्ययनरत विद्यार्थी समिक्षा शाहलगायत मन्तव्य व्यक्त करल रहिट ।

विद्यालये संस्थापक भीमबहादुर चौधरीके अध्यक्षतामे हुइल कार्यक्रममे प्रअ प्रभुराम चौधरी विद्यालयके प्रगती विवरण, अइना दिनमे विद्यालयसे लेहल लक्ष्य रणनीतिबारे अपन बाट राखल रहिट ।

बार्षिकोत्सवके अवसरमे गैल बरसके एसइईमे उत्कुष्ट नतिजा ल्यानल रेशम चौधरी (३.६९ जिपिए), रक्षा चौधरी (३.६१ जिपिए) ओ आर्यन चौधरी (३.६१ जिपिए) ल्यानुइया विद्यार्थीनहे सम्मान कैसिल बा ।
ओस्टेक करके बार्षिकोत्सवके अवसरमे हुइल टमान प्रतियोगितामे भाग लेहल, ओ उत्कृष्ट विद्यार्थीनहे सम्मान तथा प्रमाणपत्र वितरण कैगिल बा । कार्यक्रममे संचालन शिक्षक सतिस चौधरी ओ राधा चौधरी करल रहिट ।

स्वागत मन्तव्य अंग्रेजी शिक्षक राजेन्द्र प्रसाद चौधरी करल रहिट । यिहे अवसर नर्सरीसे कक्षा १० समके विद्यार्थी शिक्षकहुक्रे सांस्कृति नृत्य डेखैले रहिट ।
