संस्कृति बचाइकलाग साँस्कृतिक कार्यक्रम कैना जरुरी

सागर कुस्मी
शुक्लाफाँटा, ०५ माघ । कञ्चनपुरके शुक्लाफाँटा नगरपालिका वडा नम्बर १० मे संस्कृति बचाइक लाग पहिल माघ मिलन कार्यक्रम हुइल बा । कार्यक्रम झलारी मुक्त कमैयाँ बस्तीके आयोजनामे हुइल रहे ।
कार्यक्रमके बर्कापहुना शुक्लाफाँटा नगरपालिकाके नगर उपप्रमुख कल्पना पन्त जोशी रहिंट । उहाँ कहलैं, ‘कार्यक्रम भलनन्सा, चौकिदार मिलके मजा काम कर्टी जाइटैं । गाउँक झैझगरा, आपसी मेलमेलाप, कुलाही, बेगारी असिन काम गाउँक अगुवनके नेतृत्वसे हुइटी जैना मजा पक्ष हो । गाउँक विकासके कामसे लेके सक्कु गतिविधि भलमन्साके अगुवाइमे हुइना हुइलेक ओर्से गाउँक अगुवा ओइनहे मिल्के मजासे काम हुइटी जैना बाट बटैलैं ।’
उहाँ कहलैं, संस्कृति बचाइक लाग गाउँ गाउँमे सांस्कृतिक जागरण कार्यक्रम कैना जरुरी बा, इहिसे अइना पुस्टाहे अपन भासा संस्कृतिप्रति लगाब बर्हाइठ । अइना दिनमे असिन मेरके माघ मिलन कार्यक्रम करेसेक्लेसे समुदायके पहिचान हुइना फेन बटैलैं ।
वडा नम्बर ३ के वडा अध्यक्ष नरेन्द्र बखरिया पहिल कार्यक्रमके सफलताके कामना डेटि कहलैं, ‘अपन संस्कार संस्कृति सकुहुन मन परठ । संस्कृति बचाइक लाग सकारात्मक सोंच हुइ परठ । ओहेमारे बरस बरस कर्ना बखेरी गाउँक अगुवा हुक्रे लागे परठ कना सन्देश डेलैं ।’
वडा नम्बर ४ के वडा अध्यक्ष कमल ठकुल्ला थारु समुदायके माघ के उपलक्ष्यमे सकुहुन सुभकामना डेलैं । उहाँ, ‘समुदायके हरेक काम भलमन्सा मार्फत हुइना हुइलेक ओर्से असिन कार्यक्रम लगटार करटी जैना सल्लाह फेन डेलैं । थारु समुदायके भासा संस्कृति जोगाइक लाग अब्बक युबा जागरुक हुइना बटैलैं ।’
अस्टेके गाउँक बुद्धिजीवी केशब डँगौरा, कहलैं, ‘हमार कला संस्कृति नैबचाब कलेसे पक्काफे हेरैना निस्चित बा ओहेमारे इहि बचाइक लाग हम्रे थारु जागे पर्ना बा । कला संस्कृति हमार पहिचान हो इहिसे हमार समुदाय के फेन पहिचान बनठ ।’
समुदायमे टमान विधामे योगदान पुगाइल ज्येष्ठ व्यक्तित्व ओइन सम्मान कैल बा । सम्मान हुउइयामे झलारी मुक्त कमैयाँ बस्ती बैठुइया गुल्पी देवी चौधरी, ओस्टेके ज्येष्ठ नारी व्यक्तित्व बिसपती चौधरी, लहिया देवी चौधरी रहिंट । कार्यक्रममे झुमरा नाच, डिननचुवा नाच, चम्पन माग नाटक, रानाथारुनके नाच, मेरमेरिक गीतबाँस फेन डेखागैल रहे ।
कार्यक्रमहे आकुर चौकस कराइक लाग घैलाफोर फेन ढारगैल रहे । घैलाफोरमे जनप्रतिनिधि लोगनहे खेलागैल । घैलाफोरमे पुरस्कार जिटुइयामे वडा नम्बर १० के वडासदस्य सरस्वती चुनारा रहिंट । महिला ओइनके लाग गुब्बारा फोर्ना ओ छोटछोट लर्कनके लाग चक्लेट लुटैना खेलफेंन ढारगैल रहे ।
गाउँक भलमन्सा बुद्धिराम चौधरीके घरगोसियाइ हुइल ओ स्वागत मन्तव्य केशब डगौंरा डेले रहिंट कलेसे कार्यक्रम संचालन रामप्रसाद राना कैलैं । इ माघ मिलन कार्यक्रमहे सफल पारक लाग वडा नम्बर १० कार्यालय सहयोग करले रहे । कार्यक्रममे सहभागी हुइल पहुननहे सुरिक सिकार, मच्छी, घोंघी, सुटहीक टिना, खरिया, फुलौरी, अचार लगायत मेरमेराइक मिठमिठ खानखानसे फेन स्वागत सत्कार कैगैल रहे ।
ओरौनीमे गाउँक भलमन्सा बुद्धिराम चौधरी सक्कुहुन धन्यवाद डेटी अइना सालसे इ मेरिक कार्यक्रम आकुर मजासे कर्टी जैना बाट बटैलैं । शुक्लाफाँटा नगरपालिका १० मे पर्ना झलारी मुक्त कमैयाँ बस्ती एक ठाउँ बस्ती हो । कुछ बरससे यहोंर इ बस्ती साँस्कृतिक, सामाजिक काममे सक्रिय हुइल बिल्गाइठ ।
