पवेरा गाउँक भल्मन्सामे रामबहादुर महतो छनौट

पहुरा समाचारदाता
धनगढी, १० माघ । कैलाली जिल्लाके कैलारी गाउँपालिका वडा नम्बर ५ पवेरा गाउँक भल्मन्सामे रामबहादुर महतो छनौट हुइल बटै ।
विफेक रोज हुइल गाउँ समाजके भुरा खेलसे रामबहादुर महतो भल्मन्सामे छनौट हुइल हुइट । गाउँक अघरीयामे फेरसे रामनाथ महतो ओ गुरुवामे कन्हैया महतो दोह¥याइल बटै ।
छनौट प्रक्रिया सुरु हुइना आघे पवेरा गाउँक निवर्तमान भल्मन्सा खुशीराम चौधरीके अध्यक्षतामे हुइल भुरा खेलमे गाउँ समाजके सचिव विपराम चौधरी बरस भर हुइल, कैगिल प्रगती विवरण सुनाइल रहिट ।
कार्यक्रममे गाउँ समाजके सल्लाहकार समितिके संयोजक रामकुमार महतो, सल्लाहकार सदस्य तेजराम चौधरीलगायतसे लौवा नेतृत्व छनौट करेबेर गाउँक सर्वमान्य ओ गाउँक विकास करे सेक्ना व्यक्ति अइलेसे मजा रना सल्लाह डेहल रहिट ।
कार्यक्रमके संचालन तथा सहजीकरण पवेरा गाउँ समाज समितिके सहसचिव तथा गाउँक बुद्धिजीवि परसराम चौधरी ओ स्वागत मन्तव्य समितिके उपाध्यक्ष प्रेमबहादुर चौधरी करल रहिट । पवेरा गाउँमे २१८ घरघुरी रहल बा ।
ओस्टेक लोहरपुर गाउँक भुरा खेलसे लौवा भलमन्सामे कलिराम चौधरी, अघारीमे जीत बहादुर चौधरी ओ सचिवमे राम दयाल चौधरी छनौट हुइल बटै ।

ओस्टेक करके विफेक रोज कैलाली जिल्लाके घोडाघोडी नगरपालिका वडा नम्बर ११ सिसैया गाउँमे हुइल भुरा खेलसे भल्मन्सामे कृष्णप्रसाद चौधरी, चौकीदारमे राजेश कठरिया ओ सचिवमे सुन्दर चौधरी चयन हुइल बटै ।
