थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २९ माघ २६४८, मंगर ]
[ वि.सं २९ माघ २०८१, मंगलवार ]
[ 11 Feb 2025, Tuesday ]
‘ लैङिक समानता तथा सामाजिकीकरणके सवालमे प्रदेशस्तरीय सरोकारवालासंगके समन्वय वैठक ’

राज्यमन्त्री खडका कहली, महिला कबसम समावेशी कोटामे सीमित

पहुरा | ११ माघ २०८१, शुक्रबार
राज्यमन्त्री खडका कहली, महिला कबसम समावेशी कोटामे सीमित

पहुरा समाचारदाता
धनगढी, ११ माघ ।
सुदूरपश्चिम प्रदेश सरकारके सामाजिक विकास राज्यमन्त्री सरस्वती खडका महिलाहुकनहे समावेशी कोटामे सीमित राखल बटैले बटी ।

ओरेक नेपालके आयोजना तथा यूमन वुमेनके सहयोगमे शुकके रोज धनगढीमे आयोजना करल लैङिक समानता तथा सामाजिकीकरणके सवालमे प्रदेशस्तरीय सरोकारवालासंगके समन्वय वैठकमे उहाँ बाट बत्वाइल रहिट ।
महिलाहुक्रनहे आघे बह्रे नैडेना प्रवृति अभिनसम कायमे बा,’ राज्यमन्त्री खडका कहली, ‘संविधानमे ३३ प्रतिशत महिलाके सहभागिता अनिवार्य करले बा । उ कारण केल महिला सहभागिता डेखल हो, मने कौनोफे ठाउँमे खुला प्रतिस्पर्धा करेबेर महिलाहुकनके भारी चुनौतीके सामना करे परल बा ।’

उहाँ कहली, ‘समावेशी कोटा छुटयाइना मजा बाट हो, महिला हुइलक कारण मै फे समावेशी कोटासे यहाँसम पुगल हुँ, मने महिलाहुकनहे कबसम समावेशी, सामानुपतिक कोटामे सिमिट रख्ना टे ?, महिलाहुक्रे खुलामे टिकट पैलेसे जिटे सेक्ना की नै प्रश्न आइठ ।’

राज्यमन्त्री खडका कहली आज जेसी पोलिसी पास हुइल बा, वालबालिका नीति पास हुइल बा, वर्गिय प्रतिष्ठान नीति पास हुइल बा, कुलपति, कुल–उपपति मध्ये एक जाने महिला अनिवार्य हुई परल कना नीति पास हुइल बा ।
महिलाहुक्रे महिलाहुकनहे सहयोग कैना जरुरी बा । महिलाके नेटवर्क बल्गर बनैलेसे काम कैना सहजुल हुइना ओ आघे बह्रना सहजुल हुइना उहाँ बटैली ।

वडामे महिला जनप्रतिनिधिहुकनहे योजना मग्ना प्रक्रियासे सिखाई पर्ना जरुरी बा,’ उहाँ कहली, ‘महिला जनप्रतिनिधिहुक्रे मोर गाउँपालिकामे, वडामे यी ठाउँमे यी चिजके आवश्यकता बा कहिके टेवुल बजाके माग करेसेके परल । अवाज उठाई नैसेक्लेसे भोट डेके पठाइल जनता, नागरिक समाज ओकर खोजी करलेसे काल्हके दिनमे का डेखैना टे ?’

सक्कु चिज राजनिति भितर बा, राजनीति विना संसारमे कुछ काम नैहो, नेतामे कौन व्यक्ति खराब हुइही उ अलग बाट हुई सेकठ, सब जाने ओसिन नैरहना ओरसे एकदुसरहे सक्कुहुनके आश्यकता परेसेकठ टबमारे सक्कु जाने सकारात्मक ढंगसे आघे बह्रना जरुरी रहल राज्यमन्त्री खडका बटैली ।

जिल्ला समन्वय समिति कैलालीके सभापति टिकाकुमारी चौधरी भुल स्थानीय तहमे उपप्रमुखहे योजना अनुगमनके संयोजक बनाइल मने प्राविधि ज्ञान नैहुइल कारण बाट विगरेबेर पाछे गारी खैना बाहेक कुछ नैरहल बटैली । २०७४ सालके स्थानीय तह निर्वाचनपाछे महिला जनप्रतिनिधिहुक्रे ढेर तालिम पाइल मने २०७९ सालके जनप्रतिनिधिहुकन तालिम नैपाके ढेर बाटके ज्ञान नैरहल बटैली ।

कार्यक्रममे वेलौरी नगरपालिकाके उपप्रमुख जोगराम चौधरी तीन तहके सरकार समन्वयत्मक भूमिकासे चुक्टी रहल बटैलै । कौनोफे योजना नीति निर्माण कार्यान्वयन करेबेर बाट मिल्लेसे पास हुइना नैमिल्लेसे आलताल कैना प्रवृति रहल उहाँ बटैलै । उप प्रमुख चौधरी संकुचित विचारहे फरछवार बनाके आघे बह्रना जरुरी रहल बटैलै ।

धनगढी उपमहानगरपालिका वडा नम्बर १८ के वडा अध्यक्ष भुवन रिजाल महिला जनप्रतिनिधिहुकनके सशक्तीकरण कैना आवश्यक रहल बटैलै । उप प्रमुखहुकनहे आर्थिक अधिकार नैडेहल कारण काम कैना गाह्रो हुइल उहाँ बटैलै ।

दलित महिला अधिकार मञ्चके अध्यक्ष सावित्रा घिमिरे स्थानीय तहमे टमान संघ संस्थाके कार्यरत रहल ओरसे समन्वय करके सक्कु वर्गहे समेटके लैजाई पर्ना बटैली । अभिनसम ढेर ऐन तथा नीति बनल मने कार्यान्वयन नैहुइल कारण विभेदके अन्त्य हुई नैसेकल उहाँ बटैली ।

फाया नेपालके अध्यक्ष गोमा आचार्य सुदूरपश्चिम प्रदेश अब्बे कर्णाली प्रदेशसेफे पाछे परल बटैली । उहाँ कहली, ‘महिलाहुकनहे आघे बह्राइक लाग जेकर थेन जा जा क्षमता बा एक आपसमे साटासात करेपर्ना जरुरी रहल बटैली ।
गैरसरकारी संस्था महासंघ कैलालीके अध्यक्ष चेतमान साउद महिला हिंसाके घटना हुइबेर उ समाजके तरेक तहसे हेरैटी रहल बटैलै । उहाँ सक्कु तहके फोन नम्बरसहितके हाते पुस्तिका तयार पारे पर्ना बटैलै ।

सुदूरपश्चिम समाजके राज चौधरी ढेर ठाउँमे जेसी पोलिसी बनल मने कार्यान्यवनके अभाव रहल बटैलै । पिसविन कैलालीके अध्यक्ष कमला बुढाथोकी महिला जनप्रतिनिधिहुक्रे कतिपय ठाउँमे अधिकार पैनासे बञ्चित हुइल बटैली । लैङिक ंिहसा निवारणके लाग लैङिक हिंसा निवारण कोष कार्यान्वयन नैहुइलफे बटैली ।

कैलारी गाउँपालिकाके महिला तथा वालबालिका शाखा प्रमुख बालकुमारी चौधरी जेसि पोलिसी कार्यान्वयनमे समस्या हुइल बटैली । सामाजिक विकास सबसे भारी विकास रहल मने उ चाही कौनो विकास नैहो कना बुझाई रहल उहाँ बटैली ।
कार्यक्रममे ओरेक नेपालके कार्यक्रम संयोजक मिलन कार्की ओरेक नेपाल अन्र्तगत परियोजनासे संचालन करल गतिविधिबारे जानकारी डेहल रहिट । मधेश, कर्णाली प्रदेश संगे सुदूरपश्चिम प्रदेशके पाँच जिल्लाके १२ ठो स्थानीय तहमे कार्यक्रम संचालन करल उहाँ बटैली ।

उहाँ लैङिक जवाफदेहिता ओ समावेशी शासन अन्र्तगत निर्वाचित महिला प्रतिनिधिहुकनके क्षमता विकास कैटी रहल बटैली । परियोजनाके अपेक्षित गतिविधिमे आवश्कता मुल्याङकन, क्षमता विकास, सामाजिक उत्तरदायित्व सम्बन्धी प्रशिक्षण, रिफलेक्टिभ संवाद, लैङिक समानता च्याम्पियन प्रवद्र्धन, उपमेयरहुकनके हतोपुस्तिका विकास कैना उहाँ जनैली ।
ओकर प्रक्रियामे प्रशिक्षण ओ कार्यशाला, सामुदायिक संलग्नता, नियमित प्रतिक्रिया ओ समायोजन, नीतिगत हस्तक्षेप, नियमित फलोअप ओ सल्लाह रहल उहाँ जनैली ।

कार्यक्रममे सजहीकरण ओरेक नेपाल कैलालीके जिल्ला संयोजक गीता चौधरी करल रही । कार्यक्रममे चुरे गाउँपालिकाके उपप्रमुख धनादेवी थापामगर, टमान संस्थाके प्रतिनिधि, जिल्ला प्रहरी कार्यालय कैलालीके महिला सेलके प्रतिनिधिगायतके सहभागिता रहे ।

जनाअवजको टिप्पणीहरू