बालबालिका समाज परिवर्तनके संवाहक हुइटः गाउँपालिका उपाध्यक्ष

पहुरा समाचारदाता
धनगढी, १२ माघ । कैलारी गाउँपालिकाके उपाध्यक्ष भगवतीकुमारी चौधरी आजके वालबालिका समाज परिवर्तनके संवाहक रहल बटैली ।
सामुदायिक विकास केन्द्र डोटीके आयोजना तथा नेपाल सरकार ओ युनिसेफके सहकार्यमे ‘किशोर किशोरीहुकनके लाग समग्र विकाके लाग १२ दिने रुपान्तरण प्रशिक्षक प्रशिक्षण’ तालिमके उदघाटन कार्यक्रममे प्रमुख रहल उहाँ ओसिन बत्वाइल रहिट ।
आजके किशोर किशोरी काल्हके नेतृत्वकर्ता बन्ही,’ गाउँपालिका उपाध्यक्ष भगवती कहली, ‘यूवाहे अब्बे मजा शिक्षा, संस्कार सिखैलेसे समाजमे रहल नैमजा विकृति हटैटी । समाज रुपान्तरणके संवाहक बन्ही ।’

उहाँ कहली, ‘बालबालिका विद्यालय भर्ना हुइना मने उमेर बह्रलसंगे विद्यालय छोरके नैमजा कुलटमे फस्टी गैल संख्या बह्रल बा । दैनिक रुपमे लागु औषध दुव्र्यसनमे फस्के प्रहरी हिरासत फसल डेखल बा । गाउँमे कुरुटी बा, गलत परम्परा, संस्कार कायमे बा । अब्बे यूवाहे सचेत बनैलेसे नैमजा कुरिटी हटाई सेक्जाई ।’
हातमे १० ठो अंगरी ओरसे विद्यार्थीनहे लिखपह्रके गनना मेरिक काम करके डेखैना आग्रह करली ।
बालबालिकाके भविष्यहे मजा बनाइक लाग अभिभावकमे भारी जिम्मेवारी रहलफे उपाध्यक्ष बटैली । ओस्टेक उहाँ रुपान्तरण प्रशिक्षक प्रशिक्षण’ तालिममे सहभागी किशोर किशोरीहुकनके आपन सिखल सीप विद्यालयके और विद्यार्थीनहे सिखैना आग्रह करली ।
यूनिसेफके कार्यालय प्रमुख इन्द्र पन्त किशोर किशोरीहुकनके क्षेत्रमे देशभर टमान गतिविधि संचालन करल कहटी रुपान्तरण प्रशिक्षक प्रशिक्षण’ तालिममे सहभागीहुकनहे आपन सिखल ज्ञान सीप समाजमे रहल विकृति विगंति हटैनामे प्रयोग ल्यन्ना आग्रह करलै ।

सामुदायिक विकास केन्द्रके कार्यक्रम संयोजक तिलक चौधरी किशोरी सशक्तीकरण परियोजना अन्र्तगत पोषणके क्षेत्रमे गर्भावास्थासे पाँचसमके बालबालिका, बालसंरक्षणमे लैङिक हिंसा, विद्यालय सुरक्षामे खानेपानी सरसफाईके क्षेत्रमे काम करल बटैलै । ओस्टेक करके सामाजिक सुरक्षामे काम करल कार्यक्रम संयोजक बटैलै ।
यी परियोजनासे सिमान्तकृत समुदाय वादी, राजी, मुक्तकमैयाके बालबालिकाहे समेटके लैजैटी रहल बटैलै । उहाँ कहलै, ‘हरेक बालबालिका संरक्षित हुइना जरुरी बा । हिंसा, दुव्र्यवहार, शोषण, उपेक्षासे संरक्षित हुई साथे सशक्तीकरणफे हुइना जरुरी बा । तालिममे ४२ ठो शेसनमे रहिट छलफल करैना उहाँ जनैलै ।
सामुदायिक विकास केन्द्रके कार्यक्रम अधिकृत दिनेश बम समाजमे रहल गलत अभ्यासहे चिरेक लाग बालबालिकाके आवश्यकता बटैलै । जेकर सवाल ओकर सहभागिताके लाग कैलारी गाउँपालिका ओ टीकापुर नगरपालिकाके किशोर किशोरीहुकनहे सहभागिता कराइल बटैलै ।
किशोर किशोरीहुक्रे यहाँ सिखल बाट सीप और जनहनहे सिखाइक लाग प्रशिक्षक बनाइक लाग तालिमके आयोजना करल बटैलै । किशोर किशोरीहुक्रे आपन उमेर समुहमे सीप हस्तान्तरणसंगे समाज रुपान्तरणमे योगदान रना कना उद्देश्य लेहल उहाँ बटैले ।
किशोर किशोरीहुकनके लाग समग्र विकाके लाग १२ दिने रुपान्तरण प्रशिक्षक प्रशिक्षण’ तालिममे सहजीकरण विन्जु बराल ओ मन्दिप सुुरी करटी रहल बटै । उदघाटन कार्यक्रम सामुदायिक विकास केन्द्र डोटीके कार्य समिति सदस्य खडक बोहराके अध्यक्षतामे हुइल रहे । कार्यक्रममे सिडिसी डोटीके और कर्मचारीहुकनकेफे सहभागिता रहे ।
