बालविवाह अभिसाप होः राज्यमन्त्री बम

पहुरा समाचारदाता
धनगढी, १४ माघ । बालविवाह मुक्त समाज बनाइक लाग धनगढी उपमहानगरपालिका–१७ धुरझन्ना उत्तरखरैनी शिविरसे बालविवाह मुक्तके लाग अभियान भेला तथा हस्ताक्षर संकलन सुरु करल बा ।
‘बालबालिकामा लगानीः सु्निश्चित भविष्यके थालनी कना मुल नाराके साथ व्याकवार्ड सोसाइटी एजुकेशन(बेस)के आयोजना तथा कमैया प्रथा उन्मुलन समाजके सहकार्यमे अभियान भेला तथा हस्ताक्षर संकलन सुरु करल हो ।
व्याकवार्ड सोसाइटी एजुकेशन (बेस)के केन्द्रीय कार्यवाहक अध्यक्ष यज्ञराज चौधरीके अध्यक्षतामे हुइल कार्यक्रममे यी अभियान सुदूरपश्चिम प्रदेश, कर्णाली ओ लुम्बिनी प्रदेशसे बालविवाह मुक्तके लाग अभियान भेला तथा हस्ताक्षर संकलन सुरु करल बटैलै । उहाँ कहलै, ‘बाल विवाह गैर कानूनी हो । २० बरस तरे भोज करे नैपैना ऐन कानून बनल बा । मने उ कानूनके खिल्ली उरैटी अभिनसम बालविवाह हुइटी रहल ओरसे ओकर न्यूनिकरण करलेक लाग अभियानके सुरुवाट करल बटैलै ।
कार्यक्रममे सुदूरपश्चिम प्रदेश सरकारके आर्थिक मामिला राज्यमन्त्री प्रकाश बहादुर बम बालविवाह अभिसाप रहल बटैलै । उहाँ कहलै, ‘बालविवाह सक्कु समुदायमे बा । तराईमे बसोबास करुइयाके केल नाही, पहाडके विकट क्षेत्रमेफे बालविवाह व्याप्त रहल बा ।’
राज्यमन्त्री बम कहलै, ‘पहाडमे ब्राहमण समुदायमे धार्मिक पुन्य कमाइक लाग, छाईनके महिना हुइना पहिले भोज कैना परिचलन रहे ।’ बालविवाह रोक्ना अभिनफे जनचेतनाके आवश्यकता रहल फे राज्यमन्त्री बम बटैलै । मोवाइलके कारणफे बालविवाह बह्रल उहाँ बटैलै ।
ओस्टेक बाल विवाह मुक्त नेपालके ‘बाल विवाह विरुद्धके हमार प्रतिवद्धता पत्रमे हस्ताक्षर करले रहिट । उ पत्रमे बाल विवाह एक सामाजिक समस्या ओ कानूनी अपराध हो, जे बाल बालिकाके संरक्षण, सुरक्षा, शिक्षा, स्वास्थ्य तथा मानसिक, शारीरिक, सामाजिक, आर्थिक विकासमा बाधा पुगाइठ कलेसे बाल अधिकारके उल्लंघन करठ ओ बाल विवाहके कारण बालबालिकाके सर्वाङिगण विकासमे अवरोध हुइठ । टबमारे मै÷हम्रे बालविवाह अन्त्यके लाग सक्कु मेरसे प्रतिवद्ध बटु÷बटी । उल्लेख हुइल बा ।

ओस्टेक करके सुदूरपश्चिम प्रदेश सभा सदस्य माननीय तुल्सी देवकोटा २० बरससे तरेक बालबालिका मानसिक ओ शारिरीक रुपमे परिपक्वा नैहुइल ओरसे बालविवाह करे नैहुइना बटैली । छोट उमेरमे भोज करके लर्कन जन्मैलेसे डाई ओ लर्कनके स्वास्थ्यमे समस्या अइना ओरसे छोट उमेर भोज करे नैहुइना उहाँ बटैली । विद्यालयमे स्तरमे सचेतनामुलक नाँचलगायत टमान मेरिक वक्तृत्व प्रतियोगिता संचालन कैना जरुरी रहल उहाँ बटैली । ओस्टेक करके उहाँफे ओस्टेक बाल विवाह मुक्त नेपालके ‘बाल विवाह विरुद्धके हमार प्रतिवद्धता पत्रमे हस्ताक्षर करले रहिट ।
मुक्तकमैया महिला विकास मञ्चके संस्थापक अध्यक्ष कौशिला चौधरी अपनेफे भारी उमेरमे भोज करलपाछे उहाँसम पुगल बटैली । उहाँ कहली, ‘मै फे मुक्त कमलरी हुइटु । मने छोट उमेरमे भोज नैकैनु, परोड शिक्षासे पह्राई सुरुवाट कैनु पाछे संस्था खोल्के जनचेतना फैलैनु आज ढेर जाने रोजगारी पाके आपन जीवन मजासे चलैना अवसर पैले बटै ।’
मुक्तकमैया परिवारके ढेर बालबालिका आर्थिक अभावके कारण छोट उमेरमे भोज करल ओ अब्बे ढेर जाने समस्यामे परलफे उहाँ बटैली ।
धनगढी उपमहानगरपालिका–१७ के वडा अध्यक्ष माधव राना अपन यी दुसरा कार्यकाल रहल ओ पहिल कार्यकालमे मुक्तकमैया परिवारहे ढेर प्राथमिकता डेहल बटैलै । बालविवाह हुइना कना अभिभावक जिम्मेवार रहल ओरसे उहीहे न्यूनिकरणके लाग अभिभावक सचेत हुइना जरुरी रहल बटैलै । उहाँ थारु समुदायके भल्मन्साहुकनहे बालविवाह न्यूनिकरणमे अग्रसर बनाई पर्ना बटैलै । ओस्टेक करके वडा नम्बर १७ चारु ओरसे लडियासे घेरल कारण बर्षाके समयमे दुबान ओ कटानमे पर्ना ओरसे प्रदेश सरकारसे लडिया कटान ओ पुल निर्माणमे ध्यान डैडेना आग्रह करलै ।
धनगढी उपमहानगरपालिका भल्मन्सा नगर समितिके अध्यक्ष रोहितकुमार चौधरी वालविवाह न्यूनिकरणके लाग शिक्षित भल्मन्सा आइपर्ना ओ जनचेतना फैलाई पर्ना बटैलै । उहाँ कहलै, ‘शिक्षित ओ जागरुक भल्मन्सा नेतृत्वमे अइही कलेसे वालविवाह न्यूनिकरणके अभियान बनैना सहजुल हुई ।’
ओस्टेक करके उहाँ प्रदेश सरकार, स्थानीय सरकार भल्मन्सा प्रथाहे हाली कानूनी मन्यता डेना जरुरी रहल बटैलै । नेकपा माओवादी नगर समिति उपाध्यक्ष रामबहादुर चौधरी शिक्षा समाजमे वालविवाह कम हुइल बटैलै ।
मुक्तकमैया अगुवा चेतराम चौधरी थारु समुदायमे लौरा लवरीया एक दुसरहे मन पराइल कलेसे विन भोज करले संगे बैठना परिपाटी अब्बे डर लग्टीक अवस्थामे रहल बटैलै । कोई लउण्डी लउडक घर बैठे लागल कलेसे अभिभावक सम्झैना, बुझैना आवश्यक रहल बटैलै ।
कार्यक्रममे दैडवारी मुक्तकमैया बस्तीके सुशिला चौधरी अपने १४ बरसके उमेरमे वालविवाह करके अब्बे भारी समस्याके सामना करे परल अनुभव सुनैली । उहाँ कहली, ‘मै अब्बे १८ बरसके हुइल बटु । मोर दुई ठो लर्का बटै । मोर ससुइयया पहिले विटगैली । गोसिया भारतमे काम करठ । दुई लर्का लेके ससुरुवक सहरामे बैठल बटु । छोट उमेरमे भोज करके अब्बे भारी समस्याके सामना करले परटी बा ।’ उहाँ भुलके वालविवाह नैकैना और जनहन सुझाव सल्लाह डेली । ओस्टेक अमर मावि वनवेहराके विद्यार्थी निर्मला भुलफे अपन मन्तव्य व्यक्त करल रहिट ।
कार्यक्रममे स्वागत मन्तव्य वेस कैलालीके अध्यक्ष रामप्रसाद चौधरी करल रहिट । कलेसे संचालन अन्जान चौधरी करल रहिट । कार्यक्रममे वेस कैलालीके जिल्ला संयोजक लक्ष्मण चौधरी, केन्द्रीय कोषाध्यक्ष गोपाल चौधरीलगायत टमान सदस्यहुक्रे, कमैया प्रथा उन्मुलन समाजके अध्यक्ष सीताराम चौधरी, विल्ड अन एजुकेशनके टमान प्रतिनिधिहुकनके सहभागिता रहे ।
कार्यक्रम सचेतनामुलक सन्देशसहित थारु समुदायके नाँचके झाँकी डेखागैल रहे । ओस्टेक करके धनगढी उपमहानगरपालिका–१७ धुरझन्ना उत्तरखरैनीमे दिप प्रज्वलन कार्यक्रम कैगिल रहे । ओम्नेफे वेसके केन्द्रीय कार्यवाहक अध्यक्ष यज्ञराम चौधरी, वडा अध्यक्ष माधव राना, कमैया प्रथा उन्मुलन समाजके अध्यक्ष सीताराम चौधरी मन्तव्य व्यक्त करल रहिट ।
