थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २९ माघ २६४८, मंगर ]
[ वि.सं २९ माघ २०८१, मंगलवार ]
[ 11 Feb 2025, Tuesday ]

पहुरा दैनिकसे सुझाव संकलन

पहुरा | १४ माघ २०८१, सोमबार
पहुरा दैनिकसे सुझाव संकलन

पहुरा समाचारदाता
पहलमानपुर, १४ माघ ।
कैलालीके धनगढीसे प्रकाशित हुइना थारु भाषाके एक ठो केल दैनिक पत्रिका पहुरासे घोडाघोडी क्षेत्रमे पाठकवर्ग, सहयोगी संस्थाके प्रतिनिधि ओ सुभेच्छुकहुकनसे सुझाव सल्लाह संकलन कैले बा ।

घोडाघोडी नगरपालिका–११ आम्बासामे हुइल कार्यक्रम पहुरा दैनिकके पहलमानप्ुर व्युरो शाखाके प्रमुख जीवन चौधरीके घरगोस्यामे हुइल रहे । कार्यक्रमके वरका पहुना बसन्ता वन उपभोक्ता वन समन्वय समिति पहलमानपुरके अध्यक्ष पुष्कलबहादुर बम रहल रहिट ।

कार्यक्रममे सम्बोधन करटी उहाँ पहुरा दैनिक गाउँ ठाउँके हुइल घटना, समस्या जनसमुदायसम पुगैनाके साथे थारु समुदायके भाषा कला, संस्कृति जर्गेना कैना भारी योगदान पुगाइल बटैलै ।

उहाँ कहलै, ‘पहुरा दैनिक विगतके दिनसे गाउँ ठाउँके आवाज उठैटी आइल बा । यिहीहे दिगोपनाके लाग स्थानीयस्तरसे सहयोग कैना जरुरी बा । पत्रकारिता समाजके दर्पण हो । कुछ घटना हुइल कलेसे सत्य तथ्य प्रकाशन कैना यकर धर्मफे हो ।’

घोडाघोडी नगरपालिका–१२ के वडा अध्यक्ष रामदुलारे चौधरी ईन्टरनेट सेवा सूचारु हुइलपाछे संचारक्षेत्र भारी फडको मारल बटैलै । उहाँ कहलै, ‘गाउँमे हुइल घटना होए वा देश विदेशके घटना हेरक लाग दुसरा दिन अशरा लागे पर्ना रहे । अब्बे अनलाइन, फेसबुक ओ टमान साामाजिक सञ्जालके व्यवस्था हुइलपाछे मोवाइलमे इन्टरनेट जोरके समाचार ओ पत्रपत्रिका पह्रे सेक्ना अवस्था रहल बटैलै ।

घोडाघोडी नगरपालिका–११ के वडाअध्यक्ष दानसिंह जोगी पहुरा दैनिक कुहीहे भेदभाव नैरके आवाज उठैटी ओरसे यिहीहे निरन्तरता डेना सक्कु जानेक सहयोग आवश्यक रहल बटैलै ।

घोडाघोडी नगरपालिका नगर कार्य समिती सदस्य आकश परियार यी दैनिक थारु समुदाय केल गैरथारु समुदायके पहिचानहे जोगैनाके साथे समाजहे सचेत बनाइल बटैलै ।
उहाँ कहलै, ‘गलट करुइया व्यक्ति संचार क्षेत्रके आघे डर मन्ना करठै । संचार क्षेत्रके प्रवेश नैहुइलेसे भ्रष्टाचार, अन्याय और ढेर मौलैना उहाँ बटैलै ।

ग्रामीण बहुउद्देश्यीय कृषि सहकारी सस्था लिमिटेडके अध्यक्ष खम्मा बहादुर शाह पहुरा दैनिकसे समान व्यवहारसे समाचार सन्देश डेटी रहल बटैलै । उहाँ कहलै, ‘गाउँमे रहल छोट छोट संस्थाके गतिविधि राष्ट्रिय संचारमाध्यम प्राथमिकता नैपाइठ मने पहुरा दैनिक उ अभिनसम ठाउँ डेहल उहाँ बटैलै ।

श्रीराम जानकी सामुदायिक वनके अध्यक्ष चन्द्रबहादुर चौधरी विगत बहुट लम्मा समयसे पहुरा यहाँके रिति रिवाज सूचना समाचार सत्यके डेना प्रयास करल बटैलै ।

पशुपति सामुदायिक वन भजनीके अध्यक्ष भीमबहादुर चौधरी पहुरा सक्कु कुहीहे भेदभाव नैकरके अपन अनुभव सुनैलै । जमुनी महिला सामुदायिक वनके अध्यक्ष बुधराम चौधरी पहुरा दैनिक सत्यतत्य समाचार प्रकाशन करके सक्कु जनहनहे सहयोग करल कहटी यिहीहे जोगाइल लाग सबजाने सोचे पर्ना बटैलै । कार्यक्रममे हस्य कलाकार सुर्दिन चौधरी पहुरा दैनिक भाषा कला, संस्कृतिहे जोगैनाके साथे कलाकारहुकनफे सहयोग करल बटैलै ।

पहुरा दैनिकके पहलमानपुर व्युरो शाखा प्रमुख जीवन चौधरी यी पत्रिकाहे स्थानीय तह, संघ संस्था, सामुदायिक वन, व्यवसायीहुक्रे सहयोग ओ साथ डेले पहलमानपुरसे यी दैनिक प्रकाशन कैना बटैलै । ओस्टेक उहाँ अभिनसम यी दैनिकहे सहयोग ओ सुझाव कैके सहयोग करुइयाप्रति हार्दिक आभारफे व्यक्त करलै ।

जनाअवजको टिप्पणीहरू