पटेला थारु संग्रहालय प्रचारप्रसार ओ संरक्षणके लाग माघ महोत्सव
पहुरा समाचारदाता
धनगढी, १६ माघ । पटेला थारु संग्रहालयके प्रचारप्रसार ओ संरक्षणके लाग पटेलामे माघ महोत्सव सुरु हुइल बा ।
कैलालीके धनगढी उप–महानगरपालिका वडा नं ७ स्थित पटेलामे थारु सांस्कृतिक संग्रहालय संरक्षण समितीके आयोजनामे माघ १६ ओ १७ गते २ दिने थारु समुदायके महत्वपूर्ण चाड माघ पर्वके अवसरमे माघ महोत्सव २०८१ के सुरु हुइल हो ।
धनगढी उमहानगरपालिका वडा नम्बर ७ के वडा अध्यक्ष मोती रानाथारुके अध्यक्षतामे हुइल उदघाटन कार्यक्रमके प्रमुख अतिथी नेपाल सरकारके पूर्व वन तथा वातावरण मन्त्री नारदमुनी राना ओ विशिष्ट अतिथी धनगढी उप–महानगरपालिकाके नगर उप–प्रमुख कन्दकला राना रहल रहिट ।
कार्यक्रममे धनगढी वडा नं ८,१०,१२,१६,१७,१८ के वडा अध्यक्ष , जनप्रतिनिधि, भलमन्सा, कर्मचारी, टमान संघ संस्थाके प्रतिनिधि, कलाकार, स्थानीयहुकनके उपस्थिति रहे ।
कार्यक्रममे वडाके सामाजिक विकासके लाग सहयोगी व्यक्ति, उत्कृष्ट विद्यालय ओ उत्कृष्ट खेलाडीहे सम्मान करल हुइट ।
उदघाटन समारोहमे थारु समुदायके परम्परागत संस्कृति, भेषभूषा, खानपान, नृत्य तथा विविध कार्यक्रम प्रस्तुत करल रहे ।
थारु समुदायके परम्परागत नृत्य, थारु खानपान (ढिक्री, घोंगी, सिढरा, गुर्जी आदि),कृषि तथा हस्तकला प्रदर्शनी, लक्ष्मी राना, मनमती बखरिया, राज चौधरी, रतिराम चौधरी तथा स्थानीय कलाकारहुकनके प्रस्तुती रहल रहे ।
सांस्कृतिक पहिरन, लोक नाच गान, ओ पटेला थारु संग्रहालयके प्रचारप्रसार ओ संरक्षण कैना उद्देश्यके साथ २ दिने महोत्सवके आयोजना करल बा ।
