प्रेस सेन्टर कैलालीके पदाधिकारीसे सपथ ग्रहण
पहुरा समाचारदाता
धनगढी, १९ माघ । प्रेस सेन्टर नेपाल कैलालीके नवनिर्वाचित पदाधिकारी तथा सदस्यहुक्रे पद तथा गोपनियताके सपथ लेले बाटै ।
शनिच्चरके धनगढीमे आयोजित एक कार्यक्रमके बीच छठौं जिल्ला अधिवेशनसे निर्वाचित पदाधिकारी तथा सदस्यहुक्रे सपथ लेहल हुइट । नवनिर्वाचित समितिहे नेकपा (माओवादी) केन्द्रके प्रदेश कमिटी सह–सचिव तथा फ्र्याक्सन इन्चार्ज केशवनाथ योगी सपथ ग्रहण कराइल रहिट । नवनिर्वाचित समितिके पदाधिकारी तथा सदस्यहे निर्वाचन समितिके संयोजक मदनराज जोशी प्रमाण पत्र प्रदान करल रहिट ।
माघ ४ गते सम्पन्न अधिवेशनसे सुरेन्द्र ताम्राकारके अध्यक्षतामे सर्वसम्मत समिति चयन करल रहे । उपाध्यक्षमे मंगल बास्कोटे, महिला उपाध्यक्षमे जगतकुमारी जैशी, सचिवमे राम दहित, सह– सचिव हिक्मत भुल, कोषाध्यक्षमे खेमराज पाण्डेय, सदस्य दीपक टमट्टा, सागर चौधरी, राजेन्द्र विश्वकर्मा, शान्तिप्रसाद जोशी, दिपक बम, मनिषा सुनार, यज्ञराज उपाध्याय ओ दशिराम चौधरी चयन हुइल रहिट ।
अध्यक्ष मण्डलके अध्यक्ष तथा प्रेस सेन्टरके केन्द्रीय उपाध्यक्ष रामसिंह ठगुन्नाके अध्यक्षतामे हुइल सपथ ग्रहण कार्यक्रममे माओवादी केन्द्रके केन्द्रीय सदस्यह ओमप्रकाश पुन,रमेशसिंह धामी, लक्षीराम आचार्य, संगठनके केन्द्रीय सचिव हरिश विक, केन्द्रीय सदस्य मुकेश टेर्रां, प्रदेश अध्यक्ष भुवन बोहरा, महासचिव कर्ण चन्द, निवर्तमान कैलाली जिल्ला अध्यक्ष तेजराज भट्टलगायतके उपस्थिति रहल रहे ।
