युनिकके अर्ध वार्षिक प्रगति समिक्षा कार्यक्रम सम्पन्न

पहुरा समाचारदाता
बाँके, २० माघ । देशके प्रतिष्ठत लघुवित्त तथा अन्तर्राष्ट्रियस्तरके स्मार्ट क्याम्पियन सर्टिफिकेट (प्रमाणपत्र) प्राप्त युनिक नेपाल लघुवित्त वित्तीय संस्था लिमिटेड आपन अर्ध वार्षिक प्रगति समिक्षा तथा कर्मचारी क्षमता विकास तालिम सम्पन्न करले बा ।
युनिक नेपाल लघुवित्त वित्तीय संस्था लिमिटेडसे शनिच्चरके लुम्बिनी प्रदेशके बाँके जिल्लाके कोहलपुरमे एक भब्य कार्यक्रमके बिच संस्थाके अर्ध वार्षिक प्रगति समिक्षा कार्यक्रम तथा कर्मचारी क्षमता विकास तालिम सम्पन्न करल हो ।
संस्थाका कार्यकारी निर्देशक लघुवित्त विज्ञ तथा सामाजिक अभियन्ता डा.गोपाल दहितके अध्यक्षतामे हुइल कार्यक्रमके बर्का पहुना संस्थाके सञ्चालक समिति अध्यक्ष शिव बहादुर चौधरी, खास पहुनामे सञ्चालक समिति सदस्य पुरन प्रसाद चौधरी, जागेश्वर प्रसाद चौधरी, सन्तराम धरकटुवा थारु, बालिका चौधरी, जगतराम थारु रहल रहिट ।
पहुनामे संस्थाके एचआर तथा तालिम सेक्सन प्रमुख मान बहादुर थारु, लघुवित्त सेक्सन प्रमुख मदन चौधरी, आइटी प्रमुख रमेश चौधरी, वरिष्ठ अधिकृत तुलाराम चौधरी, आन्तरिक लेखा परिक्षक तथा बरिष्ठ अधिकृत विनोद कुँवर, लेखा तथा प्रशासन प्रमुख अयोध्या चौधरी, स्टोर सेक्सन प्रमुख नरेन्द्र चौधरी, कर्जा अधिकृत तुला चौधरी, अधिकृत राजेन्द्र चौधरी, ईलाका कार्यालय धनगढीके प्रमुख सन्त कुमार चौधरी लगायत रहल रहिट ।
कार्यक्रममे संस्थाके सुदुरपश्चिम प्रदेश ओ लुम्बिनी प्रदेशमे रहल जिल्ला कैलाली, कञ्चनपुर, बाँके, बर्दिया, दाङ्ग, कपिलवस्तु सहित ४१ ठो शाखाके शाखा प्रमुखहुक्रे े आव ०८१÷८२ के अर्ध वार्षिक प्रगति विवरण प्रस्तुत करल रहिट ।
कार्यक्रममे संस्थाहे आघे बह्रैना ओ हालके प्रगतिके अवस्था साथे थप सुझाव डेहक लाग कार्यक्रमके आयोजाना करल कार्यकारी निर्देशक डा. दहित बटाइल रहिट । कार्यकारी निर्देशक डा. दहित आव ०८१÷८२ के भावी मार्ग चित्र, निति तथा कार्यक्रमको उद्देश्य, उद्यसिलता विकास कैना, कर्मचारी आपन क्षमता विकास कैटी आघे बह्रे पर्ना साथे परिवर्तित नीति नियम तथा निर्देशिकाबारे सक्कु जाने सजग हुइपर्नामे जोड डेहल रहिट ।
पुर्वमन्त्री समेत रहल दहित एकठो गैरसहरकारी संस्थाके रुपमे ग्रामिण क्षेत्रमे काम कैटी ओकर सफलतासे आज वित्तिय क्षेत्रमे फेन कुछ करे परठ् कहटी युनिक नामक संस्थासे सेवा कैटी आइल बटैलै । उहाँ सुरुके दिनमे संस्थाके अवस्था ओ निरन्तर मिहिनेतसे आज अवस्थामे आइलमे खुसी व्यक्त करल रहिट ।
ओस्टके कार्यक्रमके बर्का पहुना तथा सञ्चालक समिति अध्यक्ष शिव बहादुर चौधरी हम्रे निरन्तर ईमान्दारी पुर्वक दत्त चित्त, अनुशासित होके कार्य सम्पदान करेबर सफल हुइना ओ संस्था फेन मजा हुइटी जैना बटाइल रहिट ।
सञ्चालक समिति सदस्य तथा कार्यक्रमके खास पहुना पुरन प्रसाद चौधरी संस्थाके ढेर सकारात्मक पक्ष रहल ओ थप सुधार तथा इ क्षेत्रके बलगर संस्थाके रुपमे रहक लाग कमी कमजोरी हटैटी आघे बह्रे पर्ना बटाइल रहिट । साथे इ क्षेत्रमे संस्थाके छुट्टै छाप रहल ओरसे उहीहे निरन्तरता डेके आघे बह्रे पर्ना जोड डेहल रहिट ।
सञ्चालक समिति सदस्य बालिका चौधरी संस्थासे अबलम्बन करल नीति नियम तथा सरोकारवाला निकायके जारी नीति नियमहे ध्यानमे राखके चनाख होके कार्य सम्पादन करे पर्नामे जोड डेहल रही ।
संस्थासे २०५७ साल से पाछे परल वर्ग थारु, दलित, मुसलिम, आदिवासी, जनजाती, सिमान्तकृत समुदाय गरिबीके रेखाटर रहल महिला डिडीबाबुनहे लघुवित्त कार्यक्रमसे आर्थिक रुपमे सबल बनैटी आइल बा ।
हाल संस्थामे करिब ८३ हजारसे ढेर महिलाडिडी बहिनीया लघुबित्त सेवा लेटी समुहमे रहल बाटै । संस्थासे कैलाली, कञ्चनपुर, बाँके, बर्दिया, दाङ, कपिलवस्तु, गरी ६ जिल्लामे ४१ शाखा मार्फत सेवा प्रवाह कैटी आइल बा ।
