सीप मेलामे तालिमके लाग ४ हजार ढेरके आवेदन

पहुरा समाचारदाता
धनगढी, २३ माघ । धनगढीमे हुइना सीप तथा रोजगार मेलाके लाग चार हजार ७२२ जाने आवेदन भरले बाटै । अइना फागुन ८ गतेसे चैत ८ गतेसम आयोजना हुइना मेलाके सुदूरपश्चिमके सक्कु स्थानीय तहसे युवाहुक्रे आवेदन भरल हुइट ।

धनगढी उपमहानगरपालिकासे १८ से ४० बरसके युवाहुक्रनहे स्वरोजगार हुइना सहयोग पुगैना टमान ८ विधामे २९ मेरके तालिम डेहे लागल हो । यम्ने एकचोटमे एक हजार ११२ जनहनहे टमान २९ मेरके तालिम डेहे लागल हो । कुछ विधामे न्यून आवेदन परल ओरसे तालिम लेना इच्छुक युवाहे फाराम भर्न आग्रह करल बा ।

एक महिनासम चल्ना तालिमके लाग कुछ विधामे अत्यधिक आकर्षण डेखल बा कलेसे कुछ विधामे न्यून आवेदन परल धनगढी उपमहानगरपालिकाके रोजगार संयोजक चन्द्र महरा बटैलै । उहाँ निर्माण विधाके तालिमके लाग कम निवेदन परल बटैलै ।

५० जाने आवश्यक रहल फेसन डिजाइन तालिमके लाग सर्वाधिक ६३० जनहनके आवेदन परल बा । ओस्टके, एडभान्स व्युटिसियन तालिमके लाग ५० सिट रलेसे फेन ५८७ जनहनके निवेदन परल बा । लेखा व्यवस्थापन तालिमके लाग ४६३ जनहनके आवेदन परल बा । एडभन्स टेलरिङके लाग ४१६ जनहनके आवेदन परलमे कफी वारिस्तामे ३७५ के आवेदन परल बा । कुछ विधामे ढेर आवेदन परलेसे फेन कुछमे भर आवश्यकतासे कम संख्यामे आवेदन परल रोजगार संयोजक महरा बटैले । कम आवेदन आइल विधामे आभिन आवेदन बुझाइ सेकजैना उहाँ बटैलै ।

विल्डिङ पेन्टरके तालिमके लाग २५ सिट रलेसे फेन २० जनहनके किल आवेदन परल बा । पुरोहितके लाग २५ जनहनमे जम्मा २२ जनहनके किल आवेदन परल बा । वेटरमे ५० जनहनके सिट बा कलेसे आवेदन केवल ३१ जनहनके किल परल बा ।

टायल मार्बल फिक्स्चर तालिमके लाग ५० जनहनके आवेदन मागलमे ३४ जनहनके किल निवेदन परल बा । निर्माण क्षेत्रके तालिम लेहक लाग कमजाने आवेदन डेहल उपमहानगरपालिका जनैले बा । मने कम निवेदन परल विधाके लाग इच्छुक व्यक्ति माघ २२ गतेपाछे समेत निवेदन डेहे सेकजैना नगरप्रमुख गोपाल हमाल बटैलै । इच्छुक युवाहुक्रनहे कम आवेदन परल तालिमके लाग निवेदन डेना आग्रह करल बावै ।

तालिमके लाग छनोट हुइल युवाहे एक महिनासम निःशुल्क तालिम डेजैना बा । तालिम ओराइलपाछे स्वरोजगार बन्ना अभिमुखीकरण तालिम समेत डेजैना बा । तालिम ओराइलपाछे युवाहुक्रनके लाग डुई दिने रोजगार मेला आयोजना कैना उपमहानगरपालिका जनैले बा ।