भजनी क्षेत्रके शिक्षाके विकास हुइना जरुरीः सांसद चौधरी

पहुरा समाचारदाता
भजनी, २३ माघ । भजनी क्षेत्रके विकासके लाग शिक्षाके विकास हुइना जरुरी रहल प्रतिनिधी सभा सदस्य गंगाराम चौधरी बटैले बाटै ।
भजनीमे राष्ट्रपति रनिङ्ग शिल्ड अन्तर विद्यालय खेलकुद प्रतियोगिताके उद्घाटन कैटी उहाँ ओइसीन बटाइल हुइट । उहाँ भजनी क्षेत्रके विकासके लाग शिक्षाके विकास हुइना जरुरी रहल कहटी शिक्षाके नीतिगत विकास कैना स्थानिय सरकारसे नीति सुधार कैना आवश्यक फेन बटाइल रहिट ।
उहाँ कहलै, ‘गैल बरस भजनी नगरपालिकाके विद्यालयहे एसईई परिक्षाके नतिजा हेरेबर दुःख लागल बा । भजनीके शैक्षिक नतिजासे चर्चा परिचर्चा पाइल रहे । इहीसे हम्रहीनहे लज्जीत बनैले बा । ओहेमारे आब एसईई परिक्षामे जिरो नतिजा लनुइया विद्यालयहे नगरपालिकासे डेजैना सेवा सुविधासे बञ्चित ओ मजा नतिजा लनुइया विद्यालयहे पुरस्कृत करे परल ।’

कार्यक्रमके बर्का पहुना सेमत रहल उहाँ प्रतियोगिताके सफलताके शुभकामना समेत डेहल रहिट । उहाँ महुन्याल माविके पूर्व विद्यार्थी समेत रहल ओ आजप अपने विद्यालयमे हुइटी रहल प्रतियोगिताके समुद्घाटन करेपाइबर गौरवान्वित हुइल बटैलै ।
विद्यार्थीके चौतर्फी विकासके लाग खेलकुद आवश्यक रहल भजनीके नगरप्रमुख केवल चौधरी बटैलै । उहाँ शिक्षक विद्यार्थीके पह्राइहे किल नैहोके अतिरिक्त क्रियाकलापमे फेन ध्यान डेहे पर्ना बटाइल रहिट ।
‘स्वास्थ्यके लाग खेलकुद राष्ट्रके लाग खेलकुद’ मुल नारा रहल खेलकुद प्रतियोगिता माघ २२ गतेसे २७ गतेसम महुन्याल माविके प्राङ्गणमे हुइना बा ।
कार्यक्रममे नगर उपप्रमुख राजु तिरुवा, प्रमुख प्रशासकीय अधिकृत नीलम कुमार न्यौपाने, राजनीतिक दलके राज बुढा ओ सुनिल कठरिया लगायत शुभकामना मन्तव्य राखल रहिट ।
