१२ दिने रुपान्तरण प्रशिक्षक प्रशिक्षण तालिम सम्पन्न

पहुरा समाचारदाता
धनगढी, २३ माघ । कैलालीके धनगढीमे १२ दिने रुपान्तरण प्रशिक्षक प्रशिक्षण तालिम बुधके रोज सम्पन्न हुइल बा ।
यूनिसेफ नेपाल ओ सामुदायिक विकास केन्द्र (सिडिसी) डोटीके आयोजनामे किशोरी सशक्तीकरण परियोजना मार्फत तालिम हुइल हो । तालिम समापन कार्यक्रम कैलारी गाउँपालिका उपाध्यक्ष भगवती कुमारी चौधरीके वरका पहुनामे हुइल रहे ।
कार्यक्रममे सम्बोधन करटी उहाँ कहली, ‘किशोरीहुक्रे पहिले अपने रुपान्तरण हुई परल ओकर पाछे समाजहे रुपान्तरण कैना गाह्रो बाट नैहो । किशोर किशोरी रुपान्तरण हुइलेसे समाजमे रहल ओ हुइना करल कुरुरिति हटाई सेक्जाई ।’
समाजमे वालविवाह, परम्परागत गलत अभ्यास समाजमे अभिन परल बा,’ गाउँपालिका उपाध्यक्ष कहली,‘किशोर किशोरी उहीहे रुपान्तरण करे सेक्ना अवस्था बा । उहीसे पहिले अपने रुपान्तरण हुइना आवश्यक बा ।’
सहभागि किशोर किशोरीहुकनहे शुभकामना डेटी १२ दिनमे सिखल बाटहे आ आपन विद्यालय, समाज ओ संघरीयामे सिखैना उहाँ आग्रह करली ।
कैलारी गाउँपालिका, टीकापुर नगरपालिका ओ बडिमालिका नगरपालिकासे कुल २२ जाने किशोर किशोरीहुँक्रे १२ दिनसम मोर संसार, आत्म जागरण, अधिकार ओ कर्तव्य, लिङ लैंगिकता, सामाजिक समावेशिकरण, किशोरावस्था, मजा बानी, पोषण, प्राथमिक उपचार, नागरिक सहभागिता, प्राकृृतिक स्रोत, प्रकोपसे हुई सेक्ना जोखिम, व्यवस्थापन, खर्च ओ बचत, जिविकोपार्जनके विकल्प, यौन तथा प्रजनन स्वास्थ्य ओ लैंगिकतामे आधारित हिंसाबारे सिखागैल रहे ।

तालिममे सहजीकरण प्रशिक्षण मन्दिप सुरी ओ विन्जु बराल करल रहिट । तालिम प्रश्चात साथी शिक्षकसे अपन समुदायमे रहल १३ से १९ वर्षसमके २५ जानेक समुहमे साप्तहिक रुपमे स्कुल भिटर ओ समुदायमे करके ४२÷४२ सत्र सञ्चालन÷सहजीकरण करही ।
तालिम समापन कार्यक्रममे यूनिसेफ फिल्ड कार्यालय धनगढीसे बाल संरक्षण शाखामे कार्यरत प्रकाश कैनी, सृजना नेपाल, सामुदायिक विकास (सिडिसी) केन्द्रके कार्यकारी निर्देशक हेमराज जोशी, कार्यक्रम संयोजक तिलक चौधरी, सर्मिला पौडेल, सामुदायिक विकास केन्द्रमे कार्यरत रहल कर्मचारीहुकनके सहभागिता रहे ।
