हम्रे जिल्लासे केन्द्रसम संगठित हुइटी बाटीः डा. रावल
पहुरा समाचारदाता
धनगढी, २४ माघ । मातृभूमि जागरण अभियानके सञ्चालक डा. भीम रावल अब्बे अपने मातृभूमि जागरण अभियानके अध्यक्ष वा नेता नैरहल बटैले बाटै ।
धनगढीमे पत्रकारहुक्रनसँगके भेटघाटमे उहाँ अब्बे टमान व्यक्तिहुक्रनसे छलफल ओ संवाद हुइटी रहल कहटी कुछ समय पाछे अभियानहे दलके रूपमे आघे बह्रैना रावल बटाइल रहिट ।
‘अब्बे ढेरसे सङ्गठित व्यक्तिहुक्रनसे मोर वार्ता जारी बा । ढेउर क्षेत्रमे क्रियाशील व्यक्तिहुक्रनसे फेन हम्रे बातचित करटी राखल बाटी ओहेमारे हम्रे केन्द्रमे कुछ व्यक्तिहुक्रे जम्मा होके हमार पार्टी अइसीन हुइल, अइसीन पद मिलल् कना उ सङ्गठन निर्माणके मजा बात नैहो’, उहाँ कहलै, ‘मै मातृभूमि जागरण अभियानमे कौनो नेता हुँ अध्यक्ष हुँ फेन कहले नैहुँ । मै प्रस्तावक किल कनाके तात्पर्य का हो कलेसे टरे जिल्लामे मनैनहे नेतृत्वमे सङ्गठित करे लागल बाटी ।’
केन्द्रमे ढेर मनैनसँग बातचित हुइटी रहल कहटी उ छलफल ओ वार्ता पाछे किल सङ्गठित केन्द्रीय स्वरूप डेना ओ उहे केन्द्रीय स्वरूपहे राजनीतिक शक्तिके रूपमे रूपान्तरण कैना योजना रहल उहाँ सुनैलै ।
उहाँ सक्कु वर्ग ओ समुदायहे आपन अभियानमे जोरजैना आग्रह कैटी भ्रष्टाचारमे मुछल व्यक्ति, राष्ट्ररहित विपरीत रहल व्यक्ति ओ समाजमे गलत छाप रहलसँग सहकार्य हुइ नैसेक्ना बटाइल रहिट ।
डा. रावल वर्तमान गठबन्धनके सरकारके समेत औचित्य नैरहल टिप्पणी करल रहिट । संविधान संशोधन ओ स्थिर सरकारके लाग डुई पार्टी मिलल् कहिके एमाले–कांग्रेससे जनतासँग झुठ् बोलल् उहाँके कहाइ रहे ।
‘अब्बे राष्ट्रिय सभामे बहुमत नैहो कहिके पन्छे खोजल बाटै’ उहाँ कहलै, ‘उ बात डुुई दलहे गठबन्धन करेबर पटा नैरहे ?’ स्थिर सरकारके लाग कहटी डुई दलसे गठबन्धन कैके आधा कार्यकाल बह्रना सम्झौता कैके सम्झौतामे अस्थिर सरकार बनाइल उहाँके आरोप रहे ।
औरे प्रसङ्गमे रावल प्रधानमन्त्री केपी शर्मा ओली अध्यादेशसे शासन करे खोजके फेनसे तानाशाही चरित्र डेखाइल बटाइल रहिट ।
’ओलीके तानाशाही चरित्र फेनसे एकफेरा छर्लङ्ग हुइल बा,’ उहाँ कहलै, ’आघेक कार्यकालमे एकपाछे औरे अध्यादेश लानल रहिट । अब्बे फेन उहे डगरामे ओली लागल बाटै । इ बेर टे अभिव्यक्ति स्वतन्त्रता कुण्ठित कैना मेरके अध्यादेश लन्ना बात सुनल बा ।’
रावल २६ माघमे धनगढीमे जागरण भेला कैना जानकारी डेले बाटै । ‘कैलाली ओ कञ्चनपुरके जागरण अभियान शनिच्चरके आयोजना कैटी बाटी’, उहाँ कहलै, ‘भेलामे जौन फेन पार्टीमे आबद्ध रहल देशभक्त नागरिकहे उपस्थितिके लाग आह्वान करटुँ ।’
