क्याप्टेन वेद उप्रेतीके पायलट प्रेम उपन्यास सार्वजनिक
पहुरा समाचारदाता
धनगढी, २७ माघ । क्याप्टेन वेद उप्रेतीके नयाँ कृति ‘पायलट प्रेम’के धनगढीमे विमोचन करल बा ।
सुदूरपश्चिम विश्वविद्यालयके डिन प्रेमराज पन्त, सुदूरपश्चिम विश्वविद्यालयके पूर्व रजिस्ट्रार डा. हेमराज पन्त, लेखकके डाई सरस्वती उप्रेती लगायतसे शनिच्चरके राोज संयुक्त रूपमे उपन्यासके विमोचन करल रहिट ।
क्याप्टेन उप्रेतीसे अपन १३ औं कृतिके रूपमे पायलट प्रेम उपन्यास लिखल हुइट हो । यी उपन्यासभिटर पाइलटके चुनौतीपूर्ण जीवन, उतारचढाव, रोमान्सके बाट समेटल उहाँ बटैलै । पन्यासभिटर ९० प्रतिशत वास्तविक कथा समेटल उहाँ जानकारी डेलै । ओस्टेक करके, १० प्रतिशत काल्पनिक बाट राखल बा । उहाँ कहलै, ‘यी उपन्यास पाइलट अध्ययन कैना विद्यार्थीहे मार्गदर्शनसमेत हुई ।’ उप्रेती उपन्यासभिटर समेटल कथा अपनसेफे औरेक लाग रहल बटैलै ।
पुस्तकउप्पर समीक्षा करटी कैलाली बहुमुखी क्याम्पसके प्राध्यापक सीताराम भट्ट उपन्यासके बाहेर पायलट प्रेम कहलेसेफे भिटर जीवनवादी ओ आशावादी उपन्यास रहल बटैलै । उहाँ उपन्यासभिटर टमान मेरके प्रेमके व्याख्या करल उल्लेख करटी प्रेममे ब्रेकअप हुइलेसे निराश हुई नैहुइना सन्देश उपन्याससे डेहल उल्लेख करलै । लेखकसे दार्शनिकतामे बहटी आशावादीके मोटिभेसनल बाट, प्रकृति प्रेम ओ वियोगके बाट समेटल भट्ट बटैलै ।
दुसर टिप्पणीकर्ता कलमराज जोशी लेखक क्याप्टेन उप्रेतीसे जहाजके उडानकेल नैहुके शब्दके उडानफे उपन्यासमे भरल उल्लेख करलै । उहाँ जीवनहे बहुआयामिक तरिकासे आघे बह्रैना उपन्यास सन्देश डेहल बटैलै ।
