उपकुलपति जोशीहे बालकृष्ण सम स्मृति राष्ट्रिय सम्मान
पहुरा समाचारदाता
धनगढी, २७ माघ । सुदूरपश्चिम प्रज्ञा–प्रतिष्ठानके उपकुलपति तथा संस्कृतिविद् डा. टीएन जोशीहे नेपाल नाट्य–प्रतिष्ठानसे राष्ट्रिय सम्मान प्रदान करले बा ।
शनिच्चर पोखरामे आयोजित नाट्य सम्राट बालकृष्ण समके १२२ औं जन्मजयन्ती समारोह तथा नाट्य विमर्श विशेष समारोहमे डा. जोशीहे उ राष्ट्रिय सम्मान प्रदान करल हो ।
समारोहमे उपकुलपति जोशीहे कार्यक्रमके प्रमुख अतिथि नेपाल सरकारके पूर्व गृहमन्त्री तथा गण्डकी प्रदेशके पूर्व मुख्यमन्त्री खगराज अधिकारी, विशिष्ट अतिथि गण्डकी प्रदेशके सामाजिक विकास मन्त्री बिन्दुकुमार थापा ओ नेपाल नाट्य–प्रतिष्ठानके केन्द्रीय अध्यक्ष प्रा.डा रामचन्द्र पोखरलसे संयुक्त रूपमे अभिनन्दन करलै ।
उपकुलपति जोशीहे सुदूरपश्चिमके मौलिक पर्व गौरा लोकनृत्यमे विशेष अनुसन्धान करके विद्यावारिधि कैनाके साथे नेपाली साहित्यमे पुगाइल विशिष्ट योगदानके लाग उ राष्ट्रिय सम्मान प्रदान करल आयोजक नेपाल नाट्य प्रतिष्ठानके अध्यक्ष प्रा.डा. रामचन्द्र पोखरेल बटैलै ।
प्रतिष्ठानके अध्यक्ष डा. पोखरेलके अध्यक्षतामे सम्पन्न विशेष समारोहमे नेपाल संगीत तथा नाट्य प्रज्ञा–प्रतिष्ठानके पूर्व कुलपति तथा वरिष्ठ साहित्यकार सरूभक्त, छन्द नायक माधव बियोगी, प्राडा रामनाथ ओझा, नाट्य निर्देशक कृष्ण उदासी, खगराज आचार्य, ओ डा. नारायण प्रसाद पन्तहेफे सम्मानित करल बा । समारोहमे गण्डकी प्रदेशके विशिष्ट स्रष्टा, लेखक, प्राध्यापक तथा प्राज्ञके उपस्थिति रहे ।
