बोण्ड स्कूलके १७औं वार्षिकोत्सव

‘विद्यार्थीके भविष्य बनैना शिक्षक ओ अभिभावकके बराबर भूमिका’

पहुरा समाचारदाता
हसुलिया, २९ माघ । कैलाली जिल्लाके कैलारी गाउँपालिका वडा नम्बर ५ पवेरामे रहल बोण्ड र्इंगलिस बोर्डिङ स्कूलके १७औं वार्षिकोत्सव तथा अभिभावक दिवस सम्पन्न हुइल बा ।

विद्यालय व्यवस्थापन समितिके अध्यक्ष बजारीराम चौधरीके अध्यक्षतामे हुइल कार्यक्रममे कैलारी गाउँपालिका वडा नम्बर १ के वडा अध्यक्ष धोजहरिपाल बोहरा प्रमुख अतिथि रहल रहिट । कार्यक्रममे सम्बोधन करटी उहाँ विद्यार्थीके भविष्य बनैना शिक्षक ओ अभिभावकके बराबर भूमिका रहल बटैलै ।

बालबालिकाहुकनहे घरसे विद्यालय पठाडेली कहटी की लर्का पह्ररजैही कना नैहो,’ उहाँ कहलै, ‘लर्कनके गृहकार्य चेक कैना, बालबालिका विद्यालयसे समयमे घर लौटल की नै । कैसिन संघरीयनसे संगत करठ । उ चाही अभिभावकहुकनसे चासो धारे पर्ना आवश्यक बा ।’

उहाँ कहलै, ‘घर पहिल विद्यालय हो, अभिभावक पहिल शिक्षक हुइट । घरमे मजा संस्कार सिखैले विद्यार्थीके पह्राईमे ओस्टेफे सुधार ल्याने सेक्जाइठ ।’ अभिभावक आपन लर्कनके पह्राईके लाग जटराफे लगानी लगैना तयार हुइना ओरसे विद्यार्थीके भविष्य मजा बनैना आर्दश शिक्षकके भूमिकाफे बरवार रहना वडा अध्यक्ष बोहरा बटैलै ।

अब्बेक यूवा लागु औषध दुव्र्यसनीसंगे मोवाइलके कारणफे विग्रटी रहल ओरसे अभिभावकहुक्रे ढेर सचेत हुई पर्ना उहाँ बटैलै ।
कैलारी गाउँपालिका शिक्षा शाखा प्रमुख गणेश प्रसाद मिश्र गाउँपालिकाके शिक्षाके सूचक सुधर्नामे बोण्ड स्कूल साथ डेहल बटैलै । गाउँपालिकासे संचालन कैना शैक्षिक गतिविधि, अतिरिक्त क्रियाकलाप होए वा खेलकुद कार्यक्रममे यी स्कूल एक स्थान ओगटना सफल हुइल उहाँ बटैलै ।

आवके शिक्षा अन्तर्राष्ट्रियस्तरमे प्रतिस्पर्धा करे सेक्ना मेरके हुई पर्ना उहाँ बटैलै । शैक्षिक गुणस्तर बह्राइक लाग विद्यार्थीनहे आब पाँच ठो वर्गिकरण करके सिकाई प्रणाली अपनैना ओ विद्यार्थीके तुल्ना भौतिक पूर्वधार ओर ध्यान डेना उहाँ सुझाव डेलै ।
विद्यालयके संस्थापक प्रिन्सिपल तिलक बोहरा विद्यालयहे यहाँसम पुगैना अभिभावकहुकनके योगदान रहल बटैलै । उहाँ कहलै, ‘यी विद्यालयमे अध्ययन करल विद्यार्थी कक्षा आठके पालिकास्तरीय परिक्षा मजा स्थान हासिल करटी रहल बटै । विद्यालय संस्कारसंगे व्यवहारिक शिक्षामे जोर डेटी आइल बा ।’

कार्यक्रममे एन प्याब्सन कैलारी गाउँपालिका अध्यक्ष तथा ब्राइटस्टार बोर्डिङ स्कूलके प्रिन्सिपल मणिप्रसाद चौधरी, अभिभावक तथा पवेरा गाउँक भल्मन्सा रामबहादुर कठरिया, अभिभावक तथा जनकल्याण माविके तेजराम चौधरी, विद्यार्थी आराध्य बोहरा, ग्रेसी चौधरीलगायत मन्तव्य व्यक्त करल रहिट ।

विद्यालयके भाइस प्रिन्सिपल बमबहादुर धामी १६ बर्ष पहिले विद्यालय संचालन करेबेर जम्मा ६०÷७० जाने विद्यार्थीसे सुरुवाट करल मने अब्बे ५६५ जाने विद्यार्थी रहल बटैलै । उहाँ कहलै, ‘बोण्ड स्कूल गुणस्तरीय शिक्षा प्रदान करटी अभिभावकहुकनके मन जिटना सफल हुइल बा । पहिले विद्यार्थी खोजे पर्ना अवस्था रहे । अब्बे अभिभावक ओ विद्यार्थीनके आर्कषण बह्रल बा ।
कार्यक्रममे गैल बर्षके शैक्षिक क्षेत्रमे उत्कृष्ठ स्थान हासिल करुइया विद्यार्थी ओ यी बर्षके बार्षिकोत्सवके अवसरमे हुइल टमान खेलकुद प्रतियोगितामे विजयी हुइलहुकनके पुरस्कार वितरण कैगिल बा । ओस्टेक करके विद्यार्थीहुकनसे सामुहिक तथा एकल नृत्य डेखागैल बा ।