धनगढी उपमहानगरपालिकासे शिक्षा विद डा. पन्तहे नागरिक अभिनन्दन

पहुरा समाचारदाता
धनगढी, ३० माघ । धनगढी उपमहानगरपालिकासे शिक्षा विद डा. हेमराज पन्तहे बुधके रोज नागरिक अभिनन्दन करले बा ।

कैलाली बहुमुखी क्याम्पसके पूर्व क्याम्पस प्रमुख डा. पन्त शिक्षा क्षेत्रमे पुगाइल योगदानके कदर करटी नागरिक अभिनन्दन करल नगर प्रमुख गोपाल हमाल बटैलै ।

धनगढी उपमहानगरपालिकाके संयोजन तथा टमान संघसंस्था समिलित समितिसे बुधके रोज (आज विहान) ८ बजे धनगढीके ट्राफिक चौराहसे बाजागाजासहित ¥याली निकारके प्राध्यापक पन्तहे पार्कमोडसम ल्यानके औपचारिक कार्यक्रमके आयोजना कैके नागरिक अभिनन्दनसहित सम्मान कैगिल समिति संयोजक तथा नगर प्रमुख हमाल बटैलै । शिक्षा विद पन्तहे नगर प्रमुख हमाल माला, खादा ओ सम्मानपत्रसहित अभिनन्दन करल रहिट ।

धनगढीस्थित पञ्चोदय माध्यमिक विद्यालयमे कैलाली वाणिज्य क्याम्पसके अध्यापन सुरु कैना महत्वपूर्ण भूमिका निर्वाह करल पन्तहे नागरिक अभिनन्दन करल हो । पन्त २०३७ साल माघ १ गतेसे कैलाली क्याम्पसमे पह्राई लागल रहिट । पन्त मासिक एक हजार रुपैयाँमे आइकमके विद्यार्थीननहे पह्राई लागल रहिट ।

१४५ विद्यार्थीसे सुरु करल कैलाली वाणिज्य क्याम्पसके नाम २०३८ सालमे कैलाली बहुमुखी क्याम्पस राखल रहे । भारतसे विद्यावारिधि करल पन्त २०४५ सालमे कैलाली बहुमुखी क्याम्पसके प्रमुख नियुक्त हुइल रहिट । प्राध्यापक पन्त २०६६ सालसम कैलाली बहुमुखी क्याम्पसके प्रमुख पदमे रहिके काम करल रहिट । डोटीके शिखर नगरपालिका–९ उच्चाकोट (सिद्धेश्वर गाउँ पञ्चायत) मे २०११ साल फागुन २१ गते जन्मल पन्त धनगढीहे कर्मथलो बनाइल हुइट ।

२०३७ सालसे हालसम धनगढीमे कर्मथलो बनाके सुदूरपश्चिमके शिक्षा क्षेत्रके विकासमे महत्वपूर्ण भूमिका निर्वाह करल ओरसे सम्मान कैगिल नगरप्रमुख गोपाल हमाल बटैलै ।

उहाँ कहलै, ‘कैलाली बहुमुखी क्याम्पस नैरहे । कैलाली व्यवस्थापन क्याम्पस रहे । पाछे केल कैलाली बहुमुखी क्याम्पस नाम धारल हो । सुरुमे भौतिक संरचनाफे नैरहे । विस्तारे संरचना तयार हुइल हो । अब्बेक अवस्थामे ल्यन्ना चिफसरके भूमिका महत्वपूर्ण बा । उहाँहे हम्रे नागरिक अभिनन्दन करल हुई ।’

हेमराज पन्तके बाबा खगेन्द्र नाथ आयुर्वेदाचार्य रहिट । हेमराज जन्मल वर्ष उहाँक बाबा डोटी सिलगढीमे आयुर्वेद औषधालयके प्रमुख रहिट ।

बाबक सरुवा डडेल्धुरा हुइलपाछे पन्तके प्रारम्भिक शिक्षा उहे हुइल रहे । उहाँ ८ कक्षासमके पढाइ उच्चाकोटके सीताराम माविसे पूरा करल रहिट । दरवार हाइस्कुलसे २०२८ सालमे एसएलसी पास करल पन्त त्रिचन्द्र कलेजसे २०३१ सालमे आइकम करलै । उहाँ शंकरदेव क्याम्पससे विकम करलै । २०३७ सालमे त्रिभुवन विश्वविद्यालयसे स्नातकोत्तरके पढाइ पूरा करलै ।
२०३१ सालमे १९ वर्षके उमेरमे सरस्वती ओझासँग वैवाहिक बन्धनमे बाँधल उहाँक दुई छावा ओ एक छाई बटै । २०६८ सालमे सरकारसे महेन्द्रनगरमे सुदूरपश्चिमाञ्चल विश्व विद्यालयके स्थापना हुइल । उहाँ ओकर रजिस्ट्रारमे नियुक्त हुइल रहिट । चार वर्षे कार्यकाल पुरा करलपाछे २०७२ सालमे उहाँसे बिदा हुइलै । ओ,लौटके फेर कैलाली बहुमुखी क्याम्पसमे पह्राई लग्लै । २०७४ सालमे उहाँ सेवा निवृत्त हुइलैं ।

अभिनन्दन कार्यक्रममे सम्बोधन करटी शिक्षा विद डा. पन्त धनगढी उहामहानगरपालिकाके नगर प्रमुख गोपाल हमाल एक ठो व्यक्ति नैहोके विचारधारा, फिलोसोपी रहल बटैलै । वहाँक टमान क्षेत्रमे योगदान रहल बा । सकारात्मक सोचके अब्बे विकास हुइटी रहलफे पन्त बटैलै । उहाँ बाँकी जीवन समाजसेवामे विटैना बटैलै ।

अभिनन्दन कार्यक्रममे नगर उपप्रमुख कन्दकला राना शिक्षा विद डा. पन्त समाजके आँखीक तारा बन्सेकल बटै । ओस्टेक उहाँ अइना दिनके सफलताके शुभकामना व्यक्त करल रही ।