करागारसे भागल १२ बरसपाछे पक्राउ
पहुरा समाचारदाता
धनगढी, ३० माघ । कर्तव्य ज्यान मुद्दामे सजाय भोग्टी रहल बेला कैलाली कारागारसे भागल देवसिंह ठकुरी कना दिपक बहादुर सिंहहे प्रहरी पक्राउ करले बा ।
१२ बरस पाछे पक्राउ परल ठकुरीहे जिल्ला प्रहरी कार्यालय कैलाली बुधके रोज पत्रकार सम्मेलन कैटी सार्वजनिक करले बा । कैलालीके गोदावरी नगरपालिका वडा नम्बर ११ ओलानीके ४८ वर्षिय ठकुरी २०६९ कैलाली काराकारसे फरार हुइल रहिट । ठकुरीहे बुधबार बिहान कञ्चनपुरके गड्डाचौकी क्षेत्रसे पक्राउ करल प्रहरी जनैले बा । जिल्ला प्रहरी कार्यालय कैलालीके एसपी पदमबहादुर बिष्टले कैलाली प्रहरीसे खटल पाँच सदस्यीय टोली ठकुरीहे पक्राउ करल बटैलै ।
‘कैलाली जिल्ला अदालतसे कर्तव्य ज्यान मुद्दामे सर्वस्वसहित जन्मकैदके फैसला सुनाइलपाछे कैद भुक्तान करटी रहल समयमे ०६९ साल कुँवार २२ गते ठकुरी आँखीक उपचार करैना बहानामे कैलाली कारागारसे फरार हुइल रहिट,’ एसपी बिष्ट कहलै, ‘उहाँ भारतमे नुकके बैठ्टी आइल अवस्थामे ०८० अगहनमे भारतीय प्रहरी पक्राउ करल रहिट । भारतीय कारागारसे धरौटीमे रिहा हुइल खबर पाइलपाछे हम्रे गड्डाचौकी टोली पठाइल रही ।’ ०८० अगहनमे उहाँहे बैंक तथा सुनचाँदी पसल लुटपाट करल अभियोगमे भारतीय प्रहरी मुम्बईमे पक्राउ करल रहे ।
ठकुरीउपर ०६२ कुँवार २ गते गोदावरीके मानबहादुर सुनारके हत्या करल अभियोग रहल बा । ओस्टके ०६४ साल फागुन २४ गते गोदावरीके भक्तबहादुर कना बमबहादुर साउँदहे गोली प्रहार कैके हत्या करल मुद्दामे जिल्ला अदालत कैलाली सर्वस्वसहित जन्मकैदके फैसला सुनाइल रहे ।
ठकुरी ०६६ असार १० गते हातहतियारसहित पक्राउ परल रहिट । ओहेक्रममे फेन उहाँविरुद्ध हाततियार तथा खरखजना मुद्दा फेन चलाइल रहे । साथे उहाँउपर अपहरण तथा शरीर बन्धक अभियोग फेन रहल बा । ०६५ असार १० गते धनगढी उपमहानरपालिकाके फूलबारीके शोभान टमटाके अपहरण करल अभियोग फेन रहल जिल्ला प्रहरी कार्यालय जनैले बा ।
