शिक्षकके मनोवल उच्च रख्ना जरुरीः गापा अध्यक्ष

पहुरा समाचारदाता
हसुलिया, ३ फागुन । नेपाल शिक्षक संघ कैलारी गाउँपालिका स्थानीय कार्य समितिके छैठौ प्रतिनिधि भेला शुकके रोज हसुलियामे सम्पन्न हुइल बा ।

कैलारी गाउँपालिका अध्यक्ष राजसमझ चौधरीके प्रमुख आतिथ्यतामे हुइल कार्यक्रममे सम्बोधन करटी उहाँ शिक्षकहुकनके पिरमर्का अपनेहुक्रे लग्गेसे बुझल बटैलै ।

शिक्षकहुकनके टमान माग मुद्दा रहल बा, गाउँपालिका अध्यक्ष कहलै, ‘स्थानीय तहसे अवगत बा । स्थानीय तहसे सम्बोधन करेसेक्ना माग पुरा कैना प्रयाय जारी बा । शिक्षकहुकनके मनोवल बह्रलेसे काम कैना सहजता हुई सेकठ ।’
नीजि ओ स्थानीय भाषाके शिक्षकहुकनहे गाउँपालिका शिक्षकके रुपमे नियूक्तके माग उठाइल बेला हम्रे तयार रहल मने बाहिय अनुदान कटना डर रहल उहाँ बटैलै ।

कार्यक्रममे विशिष्ट पहुना नेपाल शिक्षक संघके प्रदेश अध्यक्ष डिल्लीराज पन्त शिक्षा ऐन पास नैहो शिक्षकहुक्रे मारमे परल बटैलै । शिक्षकहुकनके उठाइल आन्दोलनमे नेपाल शिक्षक संघके भारी योगदान रहल उहाँ बटैलै ।

कार्यक्रममे विशिष्ट पहुना नेपाली काँग्रेस जिल्ला उपसभापति खेमराज चौधरी, नेपाल शिक्षक संघके केन्द्रीय प्रतिनिधि मिना बोहरा, नेपाली काँग्रेस महासमिति सदस्य मनिराम चौधरी, नेपाली काँग्रेस महासमिति सदस्य रामचरण चौधरी, नेपाली काँग्रेस क्षेत्र नम्बर ३ के क्षेत्रीय सभापति रिता चौधरी, नेपाल शिक्षक संघके अर्थ सचिव देवराज जोशी, दिपेन्द्र माविके प्रअ विनोद प्रसाद भट्टराईलगायत मन्तव्य राखल रहिट ।

कार्यक्रममे नेपाल शिक्षक संघ कैलारी गाउँपालिका अध्यक्ष सन्तोष कुमार चौधरी वार्षिक प्रतिवेदन प्रस्तुत करटी पाँच बुँदे मागपत्र सहित गाउँपालिका अध्यक्ष राजसमझ चौधरीहे ज्ञापनपत्र बुझाइल रहिट ।

ज्ञापनपत्रमे स्थानीय भाषा शिक्षक÷नीजि स्रोत शिक्षकहुकनहे गाउँपालिका शिक्षकके रुपमे नियुक्त कामय करेपर्ना, स्थानीय भाषा शिक्षकहे प्रावि तृतीय श्रेणी सरह तलब भत्ताके व्यवस्था करे पर्ना, साथे अन्य शिक्षक सरह पोशाक भत्ताके फे व्यवस्था करे पर्ना माग करे पर्ना माग करल बा ।

ओस्टेक करके सामुदायिक विद्यार्थीहुकनहे बालमैत्री बनैना सफा, स्वच्छ, आर्कषण केन्द्रके योजनासहित आर्कषक कार्ययोेजना लागु कैना ओर पहल करेपर्ना, शिक्षकहुकनके क्षमता विकासके लाग शिक्षकके मागमे आधारित शिक्षक तालिम एवं तालिम भत्ता वाफत रकममे नेपाल सरकारले तोकल बमोजिम व्यवस्था करेपर्ना, नेपाल सरकारले शिक्षकहे मासिक रुपमे तलब भत्ता डेना निर्णय करसेकल तथा अन्य स्थानीय निकायसे उ निर्णयहे कार्यान्वयन करसेकल ओरसे हमार यी पालिकासेफे नेपाल सरकारक निर्णयहे कार्यान्वयन करेपर्ना माग कैगिल बा ।

नेपाल शिक्षक संघ कैलारी गाउँपालिका अध्यक्ष सन्तोषकुमार चौधरी विद्यालयमे सेवारत शिक्षक कर्तव्यनिष्ठ हुके अपन वृद्धि विवेक, योग्यता क्षमतासे भ्याइटसम सेवा प्रदान करल बटैलै ।

सामुदायिक विद्यालयके शिक्षक तथा कर्मचारीहुकनके मागप्रति जनप्रतिनिधिसे सकारात्मक सम्बोधन करके कार्य क्षेत्रमे आउर ढेर हौसलाके साथ लग्ना सुअवसर प्रदान कैना उहाँ आग्रह करलै ।

यिहे अवसरमे टमान विद्यालय ओ शिक्षकहुकनहे सम्मान कैगिल बा । सम्मानित हुइलमे वडा स्तरीय शिक्षक सम्मानमे वडा नम्बर १ स्थित दिमाविके निमावि तहके कलप विश्वकर्मा, वडा नम्बर २ विचैपुरके राष्ट्रिय मावि तहके राजकुमार चौधरी, वडा नम्बर ३ कालिका प्राविके विरबहादुर चौधरी, वडा नम्बर ४ के जनकल्याण माविके प्रावि शिक्षक हरिलाल चौधरी, वडा नम्बर ५ के सुनहरा ताल आविके भागीराम महतों, वडा नम्बर ६ के अपरम्पारके शिक्षक सीमाकुमारी महतो, वडा नम्बर ७ के राष्ट्रिय माविके शिक्षक रवि सापकोटा, वडा नम्बर ८ जनता आवि उत्तरकटैनीके शिक्षक भेषकुमार चौधरी, वडा नम्बर जनता मावि गदरियाके शिक्षक रामभरोस चौधरीहे उत्कृष्ट शिक्षकके रुपमे सम्मान करल बा ।

ओस्टेक सम्मानित हुइल शिक्षकमे छिमानन्द आविके फुलराम चौधरी, शिवशक्ति आविके जगलाल चौधरी, लिलावती चौधरी, दिमाविके प्लस टु संयोजक पिरमराज पन्तहे सम्मान कैगिल बा । सेवा निवृत शिक्षक छिमानन्द आविके भागवत प्रसाद पौडेल, दिमाविके रुक्मनी पौडेल, सुनहरा ताल आविके पार्वती चौधरीहेफे सम्मान कैगिल बा । ओस्टेक विद्यालय तथा प्रअ सम्मानितमे दिपेन्द्र माविके विनोद प्रसाद भट्टराई, कालिमाई आविके प्रअ दासीराम चौधरी, कालिका प्राविके प्रअ धनिराम चौधरी, मनकाममना प्राविके प्रअ बलिचररण चौधरी रहल बटै ।

कार्यक्रममे कैलारी गाउँपालिका वडा नम्बर ३ के वडा अध्यक्ष सन्तराम चौधरी, वडा नम्बर ४ के वडा अध्यक्ष ठागुराम चौधरी, नेपाली काँग्रेस कैलारी गाउँपालिका अध्यक्ष कृष्ण प्रसाद चौधरी, कैलारी गाउँपालिका शिक्षा समिति सदस्य भरतराम चौधरी नेपाल शिक्षक संघके प्रतिनिधि ओ संघके आवद्ध शिक्षकहुकनके सहभागिता रहे ।

कार्यक्रमके संचालन नेपाल शिक्षक संघ कैलारी गाउँपालिका अर्थ सचिव वृक्षलाल चौधरी ओ स्वागत मन्तव्य संघके उपाध्यक्ष रिमा चौधरी करल रहिट । यिहे विच जनकल्याण मावि के गाउँके विद्यार्थीहुक्रे थारु सास्कृतिक नृत्य प्रस्तुत करल रहिट ।