“वित्तीय लगानीके लाग वित्तीय साक्षरता आवश्यक”
पहुरा समाचारदाता
धनगढी, ५ फागुन । नेपाल धितोपत्र बोर्डके प्रमुख कार्यकारी निर्देशक डा. नवराज अधिकारी असल वित्तीय लगानी करेक लाग पुँजी बजारसम्बन्धी वित्तीय साक्षरता आवश्यक रहल बटैले बटैं ।
नेपाल धितोपत्र बोर्ड ललितपुरके आयोजना तथा नेपाल पत्रकार महासंघ सुदूरपश्चिम प्रदेश समितिके सहकार्यमे अँट्वारके रोज धनगढीमे हुइल सुदूरपश्चिम प्रदेशके आर्थिक पत्रकारके लागि एक दिने पुँजी बजारसम्बन्धी अन्तरक्रिया तथा प्रशिक्षण कार्यक्रममे प्रमुख कार्यकारी निर्देशक डा. अधिकारी वित्तीय साक्षरताके लाग सरोकारवालासँग समन्वय कैके आगे बह्रे परना बटैले रहैं ।
उहाँ कलैं, “धितोपत्र बजार पुँजी आवश्यक रहल संगठित संस्थाहे दीर्घकालीन पुँजी उपलब्ध करैना ओ लगानी करे चाहल लगानीकर्ता वा बचतकर्ताहे लगानीके अवसर प्रदान करना प्रभावकारी माध्यम हो ।”
उहाँ धितोपत्र बजार वित्तीय प्रणाली अन्तर्गत पारदर्शी, सूचनामे आधारित व्यवस्थित बजार रहल बटैलैं । धितोपत्र सम्बन्धी ऐन, २०६३ के व्यवस्था अनुसार कजार कलेक ‘धितोपत्र खरिदकर्ता तथा विक्रेताहे एक ठाउँमे नान्के निरन्तर रुपमे धितोपत्रके खरिद, विक्री वा विनिमय कार्य सम्पन्न करना बजार, स्थान वा सुविधा’ हो ।
कार्यक्रममे सुदूरपश्चिम विश्वविद्यालयके व्यवस्थापन संकायके डिन प्रा डा. पदमराज जोशी शेयर लगानीकर्ताहुक्रे लगानीसम्बन्धी सही सूचना प्राप्त कैके लगानी करलेसे उचित लाभ लेहे सेक्ना बटैलैं । “यकर लाग वित्तीय साक्षरताके अति आवश्यक रहल बा,” उहाँ कलैं । “गलत सूचना ओ हल्लाके आधारमे शेयर बजारके कारोबार हुइ नैपरल,” उहाँ कलैं, “सूचनाके अभावमे शेयर बजारमे लगानी करलेसे जोखिम रहे सेकठ । टबेमारे सही सूचना ओ वित्रीय साक्षरता बह्रैना आवश्यक बा ।”
अस्टेक, कार्यक्रममे नेपाल धितोपत्र बोर्डके सहायक निर्देशक अजय ढुंगाना शेयर बजारमे लगानी करेबेर आधारभूत विश्लेषण ओ प्राविधिक विश्लेषण कैके लगानी करे परना बटैले रहैं । उहाँ शेयर बजारमे लगानी करेबेर संस्थाके वार्षिक नाफा, खुद नाफा, लाभांश दर, वार्षिक विद्युती विक्री, सम्पत्तिमे प्रतिफल, सञ्चालकके योग्यता, ऋणके मात्रा, भविष्यके बृद्धि, भविष्यके योजनाके साथै बजारके ट्रेन्ड, तटस्थ विश्लेषण, बजारके मनोविज्ञान बुझेपरना उहाँ बटैले रहैं ।
अस्टेक, कार्यक्रममे सिडिएस एण्ड क्लियरिङ लिमिटेडके वरिष्ठ आइटी अधिकृत किशोरप्रसाद भट्ट शेयर लगानी करेबेर प्राविधिक ज्ञानके आवश्यकता रहल बटैले रहैं । उहाँक अनुसार धितोपत्र अभौतिकीकरण करल संगठित संस्थाके दुई सय ४९, निक्षेप सदस्यता प्रदान करल कम्पनी एक सय १७, राफसाफ सदस्यता ९२, केवाइसी दर्ता एक सय ९ ओ सि–आस्बा बैंक ४३ ठो रहल बा । अस्टेक, कार्यक्रममे नेपाल एक्सचेन्ज लिमिटेडके वरिष्ठ अधिकृत कुलचन्द्र रिजाल कर्पाेरेट मार्केटिङसम्बन्धी जानकारी करैले रहैं ।
कार्यक्रममे पत्रकार कर्ण शाह, दिलबहादुर छत्याललगायतहुक्रे मन्तव्य व्यक्त करले रहैं ।
नेपाल पत्रकार महासंघ सुदूरपश्चिम प्रदेश समिति अध्यक्ष भरत शाहके अध्यक्षतामे हुइल कार्यक्रमके सञ्चालन समितिके महासचिव शिवराज भट्ट करले रहैं । कार्यक्रममे सञ्चारकर्मीहुकनके सहभागिता रहल रहे ।
