शिक्षकहुकनहे लाग समावेशी शिक्षा तालिम सुरु
पहुरा समाचारदाता
हसुलिया, ६ फागुन । कैलाली जिल्लाके कैलारी गाउँपालिकास्थित सामुदायिक विद्यालयके शिक्षकहुकनके लाग समावेशी शिक्षा सम्बन्धी तीन दिने तालिम सोम्मारसे सुरु हुइल बा ।
कैलारी गाउँपालिकाके समन्वयमे नवजीवन सेवा संघके आयोजनामे ‘रुपान्तरित व्यक्ति, रुपान्तरित समुदाय शिक्षा परियोजना’ अन्र्तगत सामुदायिक विद्यालयके वालविकास शिक्षक सहितके सहभागितामे तीन दिने तालिमके सुरुवाट हुइल हो । कैलारी गाउँपालिका उपाध्यक्ष भगवतीकुमारी चा्रैधरीके अध्यक्षतामे हुइल कार्यक्रममे तालिमसे शिक्षकहुकनके क्षमता अभिवृद्धि हुइना ओ सीमान्तकृत, अपाङता रहल विद्यार्थीनहे समावेशी शिक्षा प्रदान कैना सहजुल हुइना बटैली ।
कार्यक्रममे कैलारी गाउँपालिका शिक्षा शाखा प्रमुख गणेश प्रसाद मिश्र शिक्षकहुकनहे सक्रिय सहभागिता जनाके तालिममे सिखल सीपके सदुपयोग कैना आग्रह करलै ।
कार्यक्रमके उद्देश्यबारे नवजीवन सेवा संघके कार्यक्रम प्रवन्धक एकिन्द्र ठकुल्ला जानकारी डेहल रहिट । विद्यालयमे रहल सीमान्तकृत, अपाङता रहल बालबालिकाहुकनहे समेटके कैसिक लैजाई, नयाँ तरिकासे पाठनशैलीके विकासबारे जानकारी डेहल लाग तालिमके आयोजना करल उहाँ बटैलै ।
तालिमके पहिल चरणमे कैलारी गाउँपालिकाभिटर रहल वडा नम्बर १, ३, ४, ५ ओ ७ के सामुदायिक विद्यालयके शिक्षक, शिक्षिकाहुकनके सहभागिता रहल नवजीवन सेवा संघके फिल्ड संयोजक प्रमिन्द्र श्रेष्ठ जनैलै । ओस्टेक दुसरा चरणमे हुइना तालिममे वडा नम्बर २, ६, ८ ओ ९ के सामुदायिक विद्यालयके शिक्षक, शिक्षिकाहुकनके सहभागिता रना उहाँ जनैलै ।
तालिम उदघाटन कार्यक्रममे कैलारी गाउँपालिकाके प्रमुख प्रशासकीय अधिकृत खगेन्द्रराज जोशी, सामाजिक विकास शाखा प्रमुख यगम कलेल, नवजीवन सेवा संघके सामुदायिक परिचालकद्वाय अंगदुलारु चौधरी ओ प्रेमबहादुर चौधरीलगायत संघके प्रतिनिधिहुकनके सहभागिता रहे ।
फागुन ७ गते संचालन हुइना तीन दिने तालिममे सहजीकरण तथा प्रशिक्षण मीनबहादुर शाही डेटी रहल बटै । तालिममे २४ जाने शिक्षक ओ २२ जाने शिक्षिका कैके ४६ जानेक सहभागिता रहल बा ।
