कैलारीके उदासीपुर ओ पवेरामे प्रजनन स्वास्थ्य शिविर सम्पन्न
पहुरा समाचारदाता
हसुलिया, ६ फागुन । कैलाली जिल्लाके कैलारी गाउँपालिका वडा नम्बर ८ उदासीपुर ओ वडा नम्बर ५ पवेरामे प्रजनन स्वास्थ्य जाँच शिविर हुइल बा ।
कैलारी गाउँपालिका स्वास्थ्य शाखाके आयोजनामे वडा नम्बर ८ स्थित उदासीपुर प्राथमिक स्वास्थ्य केन्द्रमे कुल २८९ जाने विरामीहुक्रे सेवा लेहलमे पाठेघरके क्यान्सर परीक्षण १२६ जाने कराइलमे नेगेटिभ १२४ जाने, २ जाने पोजेटिभ डेखल बा । ओम्नेसे यौनजन्य रोगके उपचार ८८ जानेक कैगिल बा । एक जाने पाठेघर खसलके उपचार कैगिल बा ।
ओस्टेक मंगरके रोज वडा नम्बर ५ पवेरा स्वास्थ्य चौकीमे कुल १९४ जाने सेवा लेहल रहिट । ओम्नेसे पाठेघरके क्यान्सर परिक्षण १६७ जाने कराइलमे सक्कु जानेक नेगेटिभ डेखल बा । ओस्टेक यौनजन्य रोगके उपचार ४९ जानेक करल बा । एक जाने पाठेघर खसलके उपचार हुइल कैलारी गाउँपालिका स्वास्थ्य शाखा प्रमुख नरेशकुमार चौधरी जनैलै ।
पवेरामे हुइल प्रजनन स्वास्थ्य शिविरके उदघाटन कार्यक्रमके प्रमुख अतिथि कैलारी गाउँपालिका वडा नम्बर ५ के वडा अध्यक्ष विष्णु प्रसाद चौधरी रहल रहिट । प्रजनन स्वास्थ्य शिविरमे सेती प्रादेशिक अस्पतालके स्त्रीरोग विशेषज्ञसे जाँच कैगिल रहे । शिविरमे कैलारी गाउँपालिकाके स्वास्थ्य शाखा प्रमुख नरेशकुमार चौधरी, शाखाके प्रतिनिधिहुक्रे, स्वास्थ्य चौकीमे कार्यरत स्वास्थ्यकर्मीहुकनके सहभागिता रहे ।
